سەرۆک بارزانی د پەیامەکێ دا بۆ دەسهەلاتدارێن عێراقێ و جڤاکێ نێڤدەولەتی، ئێریشێن بەردەوام یێن بۆ سەر هەرێما کوردستانێ ب “شەڕفرۆشتنەکا ئاشکرا و زولمەکا مەزن” بناڤکرن. سەرۆک بارزانی بۆ جارا ئێکێ ئەشکەرا کر کو بتنێ د ماوێ ڤێ جەنگێ دا، پێنج جاران بارەگایێ بارزانی هاتیە ئارمانجکرن. وی جەخت ل سەر وێ چەندێ کر کو ئێدی ب شەرمەزارکرن و لژنەیێن ڤەکۆلینێ کێشە چارەسەر نابن و پێتڤیە بەغدا هەلوەستەکێ ئێکلاکەر هەبت.
ئیرۆ ئێک شەمبوویێ 29ی ئادارا 2026، سەرۆک بارزانی دەربارەی هێرشێن ڤێ داویێ یێن سەر هەرێمێ ڕاگەهاندنەک بەلاڤکر و تێدا ئاماژە دا ” هەرێما کوردستانێ چو جاران نەبوویە بەشەک ژ ئەوان کێشە و شەڕێن ل دەڤەرێ هەین، بەلێ مخابن کۆمەکە خەلکێ هەنە تەرکیزا وان ل سەر وێ چەندێ یە کا چاوا و ب چ ڕێیەکێ دژاتییا هەرێمێ بکەن و هەردەم ب نەهەقی ئێریشا هەرێم و پێشمەرگەی دکەن و دبنە هەڕەشە ل سەر ژیان و ئێمناهییا خەلکێ.”
دەقێ پەیاما سەرۆک بارزانی:
بناڤێ خودێ مەزن و دلۆڤان
هەرێما کوردستانێ چو جاران نەبوویە بەشەک ژ ئەوان کێشە و شەڕێن ل دەڤەرێ هەین.
مخابن کۆمەکە خەلکێ هەنە تەرکیزا وان ل سەر وێ چەندێ یە کا چاوا و ب چ ڕێیەکێ دژاتییا هەرێمێ بکەن و هەردەم ب نەهەقی ئێریشا هەرێم و پێشمەرگەی دکەن و دبنە هەڕەشە ل سەر ژیان و ئێمناهییا خەلکێ.
ل سالێن بۆری ب دەهان جاران ب زۆرداری و بێی چو بەهانەیان ب درۆن و مووشەکان ئێریش کرینە سەر بارەگەهێن پێشمەرگە و خەلکێ بێگونەهـ شەهید و بریندار کرینە.
زێدەتر ژ 450 جاران ب مووشەک و درۆنان ئێریش کرینە سەر هەرێما کوردستانێ و بارەگەهێن پێشمەرگەیی.
پێنج جاران ئێریش کرینە سەر بارەگەهێ مە، لێ مە بێدەنگی هەلبژارتییە دا دەروونێ خەلکێ تێک نەچت و تۆرەیی د ناڤ جەماوەری دا دورست نەبت.
هەموو جهەکێ کوردستانێ و هەموو مالێن کوردستانییان ل نک مە بەهایێ خۆ یێ هەی.
دڤێت چارەیەکا جدی و ئێکلاکەر بۆ ڕا بێتە دانان و ئەڤ چەندە ب ئیدانە و تەلەفوون و لژنەیان چارە نابت.
دەستهەلاتدارێن عێراقێ خۆ ئێکلا بکەن، یان د شیانێن وان دا نینە ڕێگرییێ ل وان گرۆپان بکەن یێن ژ یاسایێ دەرکەفتین یان ژی دڤێت ب جدی بهێنە سەر خەتێ و ڕێ نەدەن ئێریشێن نەڕەوا بۆ سەر هەرێما کوردستانێ بێنە ئەنجام دان.
دوپات دکەین گەلێ کوردستانێ ب ئیرادەیەکا پۆلایین بەرگرییێ ل پەیاما ئاشتییانە و دۆزا ڕەوایا خۆ دکەت، چو هەڕەشە و ئێریش و دوژمنەک نکارییە و نکارت ئەوێ ئیرادەیێ بشکینت.
مسعود بارزانی
29ی ئادارا 2026
تُتاح هذه الصورة أيضا في: کوردی