تۆرا لالش
12 سال ب سه‌ر كۆمكوژييا گوندێ كۆچۆ ل سه‌ر ده‌ستێ تيرۆرستێن داعشێ ده‌رباز دبن، هێشتا گوند وه‌كى خۆ كاڤل و وێرانكرى مايه‌ و نه‌هاتييه‌ ئاڤه‌دان كرن.

سه‌ره‌راى ژناڤچۆنا رێكخراوا داعش يا تيرۆرستى هێشتا چاره‌نڤيسێ ب ده‌هان ره‌ڤاندييێن خه‌لكێ گوندى نه‌ى دياره‌ و كه‌سوكارێن وان چاڤه‌ڕێى ڕزگاركرنا وان دكه‌ن.

ئيدريس به‌شار، ئێك ژ ڕزگاربوويێن كۆچۆ بۆ سه‌ما دياركر، گوندێ كۆچۆ هێمايێ جينۆسايدا ئێزدييانه‌ و بتريا قوربانييان به‌ركه‌ڤت ل سه‌ر ده‌ستێ تيرۆرستێن داعشێ، پشتى ڕزگاركرنا شنگالێ حكومه‌تا عێراقێ سۆز دا گونده‌كى نوو بۆ كۆچۆ ئاڤا كه‌ن، ب مخابنى ڤه‌ هێشتا چو نه‌هاتييه‌ كرن و مافێن جانگۆرييان و قوربانييان ژى نه‌هاتينه‌ دابين كرن.

زێده‌تر گۆت: كۆچۆ پێدڤى ب هه‌ر تشته‌كى هه‌يه‌ و داخوازێ دكه‌ين هه‌موو ره‌ڤاندييێن ماين د ده‌ستێ داعشێ دا بێنه‌ ڕزگاركرن و له‌ز بۆ ئاشكراكرنا ناسنامه‌يا قوربانييان ل به‌غدايێ بێته‌ كرن و ڕوفاتێن قوربانييان بۆ كه‌سوكارێن وان ڤه‌گوهێزن.
تيرۆرستێن داعشێ د ئێرشا خۆ دا بۆ سەر شنگالێ و دەوروبەران 6417 ئێزدی ره‌ڤاندن، کو بتریا وان خەلکێ گوندێ کۆچۆ بوون. پشتی گوند دورپێچكرين ئاكنجیيێن گوندی ل قوتابخانه‌يا گوندی دا کۆمکرن، پاشى كچ و ژن و زاڕۆک ژ زه‌لامان جوداکرن، زه‌لام بەرەف مەرگێ و ژن و کچ ژی بەرەف بازاڕێن كڕين و فرۆتنێ برن.

حكومه‌تا عێراقێ بڕيار دايه‌ گوند وەكو هێمایێ قوربانیدانێ، دەستكارييێ تێدا نه‌كه‌ن و بكه‌نه‌ مۆزەخانە و ل نێزیكی وى گونده‌كێ نوو ئاڤا كه‌ن.

کۆچۆ، 22 كیلۆمەتران ژ باشورێ شنگالێ دوورە و دوورترین گوندێ ئێزدییانە ژ سەنتەرێ شنگالێ.