Efrîn- ENKS spasiya Serok Barzanî û Herêma Kurdistanê dike
BasNews– Encûmena Xwecihiya Efrînê ya Encûmena Niştimanî ya Kurd li Sûriyê (ENKS) ji ber hawarhatina Herêma Kurdistanê û Dezgeha Xêrxwazî ya Barzanî bi ziyandîtiyên erdheja Efrînê re, spasiya Serok Barzanî, Dezgeha Xêrxwazî ya Barzanî û Herêma Kurdistanê dike.
Encûmena Xwecihiya Efrînê ya ENKSê îro di daxuyaniyekê de, bi navê gelê Kurd li Efrînê bi giştî û bi navê Cindirêsa birîndar bi taybetî, spasiya Serok, kadro û rêveberiya Dezgeha Xêrxwazî ya Barzanî, Serokê Herêmê, Serokê Hikûmetê û gelê wê û Serok Mesûd Barzanî kir, ji ber ku bilez bersiva bangewaziya gelê Efrînê dan û bi hawara wan ve çûn.
Di daxuyaniyê de hat gotin: “Serkeftina hewlên bênavber ên serkirdayetiya Herêma Kurdistanê û Dezgeha Xêrxwazî ya Barzanî bo derbaskirina hemû astengiyan û gihandina karwaneke mezin a alîkariyên bo Cindirêsê, bû sedema geşkirina moralê û kêmkirina hestên xem û êşên gelê Efrînê.”
Piştî erdheja li Efrînê rû daye ku bi sedema hilweşîna bi sedan xanî û avahiyan li bajarokê Cindirêsê û hin gund û navçeyên din ên Efrînê û di encamê de zêdetir ji 700 kesî canê xwe ji dest dane û bi hezaran kes bê cih û war man, duhî 10ê Sibata 2023an, yekem karwana alîkariyê ya Dezgeha Xêrxwazî ya Barzanî gihîşt Efrînê.
00S.A
تُتاح هذه الصورة أيضا في: Kurdî