العراقيون يشكون بنزاهة “الملائكة “
حسن الخفاجي 
جاء الخال جون كيري الى بغداد بزيارة غير مخطط لها ، جاء خالنا كيري على عجل ، لكي يؤدب المشاكسين من الساسة ممن أرادوا وعملوا على سحب الثقة من العبادي ، رفع الخال كيري بوجههم الكارت الامريكي الأحمر وقال لهم: من لم يلتزم بأصول اللعبة سيكون مكانه خارج الملعب . راد يجر اذان كم واحد ، لكن همه من شافوه عصبي گعدوا عقال ، گالوله خالو احنه نگعد عقال وشتريد نسوي بس لا تزعل . شافهم خايفين گلهم: لا تخافون رسملهم خطة اللعبة الجايه وغادر محروسا بدعاء المؤمنين: ان يحفظ الله كيري واوباما ذخرا وسندا لحرامية العراق .
العراقيون ما يكٓعدون راحه ، طلعوا مظاهرات واعتصامات يشكون بنزاهة ساسة مثل “الملائكة”.
هذا هو البطر بعينه ، شعب فايخ وبطران . يا عراقيين عدكم دليل يثبت ان ساستكم حرامية ؟.
الجواب كلا كلا كلا . شتردون حكومة تكنوقراط؟. كلهم تكنوقراط ويشتعل الضوه مال درنفيس الفحص كٓبل مايلامس اجسامهم بعد شتردون منهم “هي وليه خو ما وليه” ؟.
شنو انتو بطرانين تريدون تحاسبوهم على ميتين مليار مبيوكات ؟.
عمي هاي خرده بالنسبة للبوگات الجايه . منا وغاد لا نفط ولا دوائر حكومية ولا أراضي كلها ملك ابهاتهم وأنتم راح تطلعون ملص .
شتردون منهم ؟. شنو إنتوا ليش ناكرين الجميل ؟. كل هذا الأمان والرخاء والبناء والعمران شو بغداد صارت مثل باريس وما راضين عليهم ، شو كل عراقي عنده بيت وسيارة ورصيد بالبنك وكلكم تشتغلون ، حتى الحكومة خطية جابوا عمال وموظفين من سريلانكا !.
بنولكم العراق وعمروه ، الحكومة والسياسيين مسلوكٓين بالحر ولدهم خطية بالخطوط الأمامية بجبهات القتال ضد داعش مضحين بولدهم علمودكم وأنتم ماراضين عليهم ، اغلب الشعب گاضيها سياحة وسفر تفترون كل دول العالم وفوكٓاها تكولونالسياسيين حرامية . هاي صايره دايره ناس يصومون ويصلون وأغلبهم من احزاب إسلامية ؟ .
هوه اكٓوا إسلامي يبوك ؟. ما يخافون من عدنا اذا باكٓو يخافون من الله يذبهم بالنار .
هيجي اهلنا چانو يخوفونه من كلشي بس يگلون الله يذبكم بالنار وأحنه نصدگ ، العراقيون بعيون السياسيين مثل الجهال القصر الي بعدهم بالابتدائية وكلشي يصدگون خاصة اذا المعلم كٓال .
وهمه اغلبهم موبس معلمين , أطباء ودكاترة شهاداتهم من سوگ مريدي وما يچذبون لان الچذب عيب وحرام .
عمي وزراء تكنوقراط مستقلين ماكو أيس ياعبيس . عود ليش الشعب الفايخ المتونس يريد حكومة تكنوقراط مستقلين وهمه شبيهم عيني؟.
هاي مؤامرة على الاسلام والإسلاميين تريدون تبعدوهم من الحكومة قابل همه أزواج ؟ .
ابحياتكم شفتوا ساسة العراق من وكٓع الصنم لحد الان متفقين على شي ؟.
اني اكٓللكم ، الجماعة اتفقوا بس مرتين مرة على زيادة رواتبهم ومخصصاتهم ومرة على رفض حكومة التكنوقراط المستقلين،تعرفون ليش ؟.
من چنه أزغار جنه من انشوف الموز نظل نبچي أنريد موز ، أهلنه چان ماعدهم فلوس ، ايگولولنه الموز موزين على الزغار لان يسوي عدهم دود .
بابا الحكومة والأحزاب والسياسيين اعرف من عدنه ويريدون مصلحتنه ، التكنوقراط المستقلين موزينين علينه, يخافون على الشعب لتصير عنده عقدة اسمها تكنوقراط . مو گلتلكم الجماعة اعرف , ليش تلحون ؟.
أني المدوخني بس شي واحد ، شو حكومة الفريق المنسجم القوي اتذابحوا بيناتهم بس صارت المظاهرات جدية ودگت أبوابهم بالخضراء !.
مرة جيرانه عنده مشتمل فارغ اجره لجماعة ما يعرفهم ، وره شهر طلعوا مو خوش عائلة ، شهرين يتفاوض وياهم وما أخذ منهم ايجار بس رادهم يشيلون وينشلعون من المشتمل ، چان ايگول ذوله ما يطلعون بالعيني وأغاني . فد يوم گعدنه على صوت عياط ، جيرانه جمع عشرين رجال من گرايبه وهجموا عليهم وذبوا اغراضهم بالشارع .
الجماعة مثل النزل مال المشتمل مو خوش نزل وچلبوا بالخضراء وما يطلعون بالعيني وأغاني ، هذوله ينراد نشبگهم و نذبهم بالشط ودجلة قريبة عليهم ونخلص منهم .
رجاء لاتنسون اتسلمولي على حكومتهم التكنوقراطية المحاصصية الجديدة ، راحوا سواق تريلات وجابولنه بنجرجيه .
اودعناكم اغاتي ونلتقي عند أبواب الخضراء .
قال البير كامو ” المخادع ذئب يبكي تحت أقدام الراعي ” ما الذي كان سيقوله كامو لو عرف بقصة الذئاب التي تحكمنا ؟.
“تغير الحية جلدها ولا تغير طباعها”
حسن الخفاجي
hassan.a.alkhafaji@gmail.com
11/4/2016
—
في حالة عدم الرغبة باستلام رسائلنا يرجى الضغط هنا
—
في حالة عدم الرغبة باستلام رسائلنا يرجى الضغط هنا
تُتاح هذه الصورة أيضا في: العربية