Qayîmeqamê berê yê bajarê Şingalê dibêje, piraniya wan Şingaliyên ku tevlî PKKê bûne berê endamên partiya Beis a Iraqê bûne.

Qayîmeqamê berê yê Şingalê Meyser Hecî Salih ji malpera fermî ya PDKê re gotiye, PKK li Şingalê hêzeke ne qanûnî û ji derveyî Herêma Kurdistanê hatiye Şingalê. Divê ji wir derkeve.

Meyser Hecî Salih her wiha gotiye, tenê beşek biçûk ji xelkê Şingalê tevlî PKKê bûne. Lê ew jî hêdî hêdî jê vediqetin. Ewên ku di nav PKKê de jî mane, piranî endamên berê yên partiya Beis a Iraqî bûne.

Wî mezinê Şingalê amaje bi wê yekê jî kir ku ew hêzên PKKê bi navên cuda li Şingalê bicîh bûne û ji aliyê Bexdayê û Heşda Şeibî ve tên piştgirîkirin û got, ew alîkariya hikûmeta Iraqê heta hetayî namîne. Bexda jî dê îro yan sibê pişta xwe bide wan û li dijî wan derkeve çimkî Bexda jî dizane ew serêşî ne.