تۆرا لالش
ئێدی تورکیا خودان دیتنەکا جودایە بۆ پێکهاتەیان، ب تایبەت بۆ جڤاکا ئێزدی. ئەنقەرە دخوازیت هەموو پێکهاتەیان د هەمبێزا خۆ دا ب حەوێنیت؛ د ڤێ چوارچێوەیێ دا و د پێنگاڤا ئێکێ دا، پڕۆژەیەکێ مەزن بۆ نووژەنکرنا مەزارگەهێن ئێزدیان هاتیە راگەهاندن کو دەستپێکا وێ ب دانانا بەڕێ بنیاتی بۆ مەزارێ “شێخ هەڤند” بوو.
ب ئامادەبوونا میرێ ئێزدیان، میر حازم تەحسین بەگ، و هەڤژینا میرێ ئێزدیان، مەیان خاتوون، و ئۆلدارێن ڕاوێژکارێن میری، کەسایەتیێن جڤاکی یێن ئێزدی و ژمارەکا مەزنا ڕەڤەندا ئێزدی ل دیاسپۆرایێ، ل گەل پشکداریا بەرپرسێن بلند یێن حکومەتا تورکیا (وەک وەزیرێ وەرزش و لاوان، جێگرێ وەزیرێ کەلتوور و گەشتوگوزارێ، والی، قایمقام، پەرلەمانتار و کەسایەتیێن حزبی)، بەڕێ بنیاتی بۆ مەزارێ شێخ هەڤند ل ناوچەیا بشێریێ یا سەر ب ویلایەتا باتمانێ ڤە هاتە دانان.
د ڤێ سەرەدانێ دا، میرێ ئێزدیان میر حازم تەحسین بەگ سوپاسیا گەل و حکومەتا تورکیا کر و ڕاگەهاند کو ئەڤ وەڵاتە یێ هەموو پێکهاتەیانە، وی تەئکید کر کو ئێزدی بەشەکێ ڕەسەن و ڤەنەقەتیایێ ڤی وەڵاتینە و نە مێهڤانن.
هەروەسا ئاماژە ب هندێ کر کو پێدڤیە کەشوهەوایەکێ گونجای بۆ ئێزدیان بهێتە ڕەخساندن دا کو ب ئازادانە مەڕاسیمێن خۆ یێن ئاینی ب ڕێڤەببەن، و داخواز کر کو د دەستوورێ تورکیا دا ب فەرمی دانپێدان ب ئاینێ ئێزدی بهێتە کرن.
ژ لایێ خۆ ڤە، بەرپرسێن حکومەتا تورکیا پشتگیری ل پەیاما میرێ ئێزدیان کر و دیار کرن، کو ئێدی تورکیا وەڵاتێ هەموو پێکهاتەیانە، ب ڕێزەکا مەزن تەماشەی هەموویان دکەن و دێ بەردەوام بن ل سەر پشتەڤانیکردنا جڤاکا ئێزدی.
پاشان میرێ ئێزدیان سەرەدانا چەند گوندێن ئێزدیان ل دەڤەرا خالتان (وەک شمزێ، قورغێ، شاسمێ و فەقیرا) ل باتمانێ و گوندێ (داودیێ) ل دەڤەرا چنار یا سەر ب دیاربەکرێ ڤە کر، وی ژ نێزیک ڤه تهماشهی ڕەوشا گوندان کر، گوهداری ل داخواز و ئاریشێن وەڵاتیان کر و ڕاگەهاند کو دێ دەنگ و پەیاما وان گەهینیتە لایەنێن پەیوەندیدار.
تُتاح هذه الصورة أيضا في: کوردی