بازرگانیکرن ب مرۆڤان زێدەبوویە
ئەڤرۆ نیوز:
دەستەیا سەربخوەیا مافێن مرۆڤی ئاشکرا کر کو بازرگانیکرن ب مرۆڤان ل ھەرێما کوردستانێ زێدەبوویە و پەیڤدارێ مافێ مرۆڤی ئاماژە دا وێ چەندێ کو وەلاتی ھەیە بۆ پارەکێ کێم گۆلچیسکا خوە فرۆتیە و گۆت: “پێدڤیە قانوونا قەدەغەکرنا بازرگانیکرن ب مرۆڤان بھێتە دەرکرن”.
محەمەد گومەشینی، پەیڤدارێ دەستەیا مافێ مرۆڤی بۆ رۆژناما ئەڤرۆ ئاشکرا کر کو بازرگانیکرن ب مرۆڤان ل ھەرێما کوردستانێ ھەیە و ھێشتا نەبوویە دیاردە، بەلێ ناھێتە ڤەشارتن و چەندین حالەتێن بازرگانیکرن ب مرۆڤان ھاتینە تۆمارکرن و گۆت: “بابەتێ بازرگانیکرن ب مرۆڤان گەلەک تشتان بخوەڤە دگریت، ژوان شووکرنا کچێن تەمەنێ وان نەگەھشتیە 18 سالیێ و کارپێکرنا زارۆیان و بکارئینانا زارۆیان د خوەنیشاندانان دا و سەرەرایی ڤێ چەندێ کارەکێ دی یێ مەترسیدار سەرھلدایە ئەو ژی فرۆتنا گۆلچیسکا یە ژ لایێ وەلاتیان ڤە کو ژلایێ قانوونی ڤە قەدەغەیە و بێی پەسەندا نۆشداری کەسەک گولچیسکا خوە بفرۆشیت و وەلاتی ھەبوویە ھەمبەر پارەکێ زۆرێ کێم گۆلچیسکا خوە فرۆتیە”.
ناڤھاتی خویا کر کو پڕۆژە قانوونا بازرگانیکرن ب مرۆڤان خواندنا ئێکێ ل پەرلەمانێ کوردستانێ بۆ ھاتیەکرن و ھاتیە راگرتن ژبەر کۆم نەبوونا پەرلەمانی و پێدڤیە ل دەمێ دەستبکاربوونا پەرلەمانی ئەڤ پڕۆژە قانوونە بھێتە پەسەندکرن، چونکی پڕۆژە قانوونا بازرگانیکرن ب مرۆڤان، ژ قانوونێن بۆدجە و مووچە و ھەموو قانوونێن دی گرنگترە.
تُتاح هذه الصورة أيضا في: کوردی