پەنابەرێن ئێزدی ل ئەلمانیا تووشی ئاستەنگان بووینە
ریپۆرتاج:كاروان باعەدری
رەوشا پەنابەران نۆكە ل ئەلمانیا نەخۆش بوویە تایبەت پشتی رێژا پەنابەران ل وی وەلاتى زێدەبوویی پێرابوونێن یاسایی درەنگ برێڤە دچن ،جی و خوارن ژی كێم بوویە هەتا هندەك كەس ل كەنیسا یان بەر دەریێ كەمپان دنڤن،ژبەر جێوازیا ئاینی گەلەك ئاریشە پەیدابووینە،لەوا پەنابەرێن ئێزدی داخوازێ ژ مال و كۆمەلێن كوردی دكن خۆ ل رەوشا وان بكن خودان و هاریكاریێ بكن،ئاماژێ دكن كو تووشی چەندین ئاستەنگان بووینە.
كۆچبەرا كچ(سەمیرا سەبری)بۆ دەنگێ لالش دیاركر،نێزیكی شەش هەیڤانە ل وەلاتێ ئەلمانیا دژیم و راستی خۆشی و نەخۆشی ل ڤی وەلاتی هەینە،كو خۆشی ئێمناهی گەلەكە و رێزگرتن و یەكسانی بەرامبەری یاسایێ،هەروەسا گەرەنتیكرنا مافێ مرۆڤی وەك مووچەیێ هەیڤانە و كرێ و خوارن و ڤەخوارن…هتد،بەلێ نەخۆشی دووربوونە ژ مالباتا خۆ،دیسان گەلەك جارا ئاستەنگێن زمانی نەدخۆشن و بریار دئێنە دان كو نابت مرۆڤ ژ سنوورێ هەرێما خۆ دەركەفت بۆ ماوەیێ دوو سالان،خۆ ئەگەر مافێ پەنابەریێ ژی هەبت.
ژلایەكێ دی ڤە چالاكڤان(هیرۆ مستەفا)بۆ دەنگێ لالش خویاكر،ئەڤ دەمەكە ل ئەلمانیا دژیم و ئەلمانیا ب خۆ وەلاتەكە همبێزا وێ پرە ژ ئایدۆلۆجی و رەگەز و نەتەوا و ب ئێك چاڤی بەرێ خۆ ددەتە هەموویان ئەڤ تشتەك مرۆڤاتیی یە،ب راستی هەر كەسەك ژمە ل وەلاتێ خۆ فێربوویە هەر تشت هەیە،لێ وەختێ ل وەلاتەكی نوو دژی هندەك ئاستەنگ هەنە و هەر تشت پەیدانابت وەك ژ نوو فێری زمان بی و سیستەمێ وان هەتا ژیانا خۆ ب رێڤە ببەی،هەروەسا دڤێت مال و كۆمەلێن كوردی خۆ ل پەنابەرێن ئێزدی بكن خودان و هاریكاریا وان بكن و ئەلمانیا ب دلەكێ مەزن پێشوازیا مەدكت،بەلێ دڤێت مرۆڤ خۆ ماندی بكت بۆ فێربوونا زمان و یاسایێن وان،دیسان خۆشیا ئەلمانیا هاریكارن لگەل مە دا تایبەت بۆ دانوستاندنێ هەتا رێیا ژیانێ ل بەر مە ئاسان بت.
ژبال خۆڤە رۆژنامەڤان(سالار فائز)بۆ دەنگێ لالش دبێژت:هەر ژ رۆژا گەهشتنا پەنابەران بۆ ئەلمانیا نەخۆشی بەردەوام دبن وەك ل گەلەك كەمپا خێزان تێكلی گەنجا نە،دیسان زمانێ ئەلمانی ب خۆ یێ گرانە گەلەك زەحمەتە مرۆڤ بكارت كارێن خۆ ب رێڤە ببەت یان گەلەك جارا پۆست تێن بتنێ ب زمانێ ئەلمانی نە و پەنابەر تووشی ئاستەنگیا زمانی بووینە دەمێ سەرەدانا نەخۆشخانێ یان جهەكێ دی دكن،بۆ دەمەكێ درێژ مرۆڤ سەر هاریكاریێت كۆمەلایەتی (سۆسیال) دێ ژیت،چنكو مرۆڤ زمانی نزانت و نكارت كاربكت و ئەڤ هاریكاریێن كۆمەلایەتی بتنێ بۆ پێتڤیێن ژیانا رۆژانە نە،ئەگەر پەنابەر مافێ پەنابەریێ ژی وەرگرت تایبەت ئەو خێزانێن گەلەك ئەندام خانی زوو ب دەست وان ناكەڤن،ژبەركو ل ئەلمانیا خانی بۆ خێزانێن كێم ئەندامن،سەرەرای هندێ حكوومەتا ئەلمانی و خەلكێ وێ دەرگەهێ خۆ بۆ مە ڤەكرن و بێ جوداهی رێزێ ل مەدگرن و هاریكاریا مە ب هەموو رەنگا دكن.
هەروەسا بەرپرسێ بنگەهێ لالش ل ئەلمانیا(خەلات شێخ موراد)بۆ دەنگێ لالش گۆت:رەوشا پەنابەران نۆكە نەخۆش بوویە تایبەت پشتی رێژا پەنابەرا ل ئەلمانیا زێدەبوویی پێرابوونێن یاسایی درەنگ برێڤە دچن ،جی ژی كێم بوویە هەتا هندەك كەس ل كەنیسا دنڤن یان بەر دەریێ كەمپا هەتا خوارن ژی كێم بوویە،ژبەر جێوازیا ئاینی گەلەك ئاریشە پەیدابووینە،بەلێ نە بتنێ ل ئەلمانیا هەتا ل یۆنان ب خۆ ژی و ئەلمانیا كەم تەرخەمی نەكریە،لێ هژمارا زۆر ژ شیانێت وێ ب خۆ پترن و ئەم سوپاسیا برایێن خۆیێن كوردێن بوسلمان دكەین هەردەم پشتەڤانێن برایێن خۆ یێن ئێزدی بووینە ،وەك بنگەهێ لالش ل ئەلمانیا هەر تشتەك ژ مە هاتبت ل دووڤ شیانێت خۆ مە بۆ پەنابەران و هاریكاریا وان كریە و هەردەم وان ئاگەهداردكەین خۆ پارێزن ژ ئاریشان.
تُتاح هذه الصورة أيضا في: کوردی