حەزا وی ئەو بوو بچیتە پەیمانگەهێ
سالار فائز
شێوەكارێ گەنج مەروان بەركات كو د ژیێ بیست و چار سالیێ دایە،دكورتە دیدارەكێ دا بۆ رۆژناما ئەڤرۆ گۆت:دژیێ پازدە سالیێ دا حەزا وێنەچێكرنێ ل دەف من پەیدابوو،و هەرچەندە ل وی دەمی ژیان یا ب زەحمەت بوو، و بارێ پتریا خەلكی یێ گران بوو،هەروەسا كەرستێن چێكرنا وێنان وەكو فرچە و رەنگ و بۆیاغ دگران بوون،لێ ژبەر حەزا منا زێدە بۆ هۆنەرێ شێوەكاری من دەست ژێ بەرنەدا و هەتا نۆكە یێ بەردەوامم.و من گەلەك حەز دكر بچمە پەیمانگەها هۆنەرێن جوان لێ مخابن ئەو ژی چێ نەبوو.
زێدەتر گۆت: وێ چەندێ ژی ئاستەنگن بۆ من چێ نەكرن و ئەز ل سەر كارێ هونەری بەردەوام بووم،و ل دەستپێكێ من بزاڤ كرن ب رێیا كەڤالان ئێش و ئازارێن مللەتێ خۆ نیشا بدەم،هەروەسا من بزاڤ كریە ناڤەرۆكا كەڤالێن من پتر ل دۆر ئێش و ئازارێن ئافرەتان بن،و شێوازێ من یێ قوتابخانا سریالی یە.
دلایەكێ دی دا گۆت:من دڤێت ب رێیا كەڤالان بۆ خەلكەكی دیار بكەم كا ئافرەتا وەلاێ من چ رەوشت و تیتال و جلك وبەرگێن تایبەت هەنە،هەروەسا ژیانا وان ل گودان یا چاوایە،هەروەسا مە گرنگی ب لایەنێ كۆمكوژی و رەڤاندنا وان ب تایبەت ژی ژلایێ داعشی ڤە دایە.
ل دووماهیێ گۆت: هەتا نوكە من چوو پێشانگەه نەڤەكرینە، ژبەركو خەلكێ شنگالێ مە ل كۆمەلگەها خانەسۆرێ،و من شیانێن مادی نینن،بەلێ من پشكداریا دچەند پێشانگەهێن هەڤپشك دا كری،و هیڤیامن ئەوە ئەز پێشانگەهەكێ ل باژێرێ بەغدا ب تایبەت ژی ل جادا موتەنەبی ڤەكەم.
تُتاح هذه الصورة أيضا في: کوردی