چالاكڤانەكا ئێزدی:پێتڤیە ژنێن كورد داخوازا رزگاركرنا ژنێن ئێزدی بكن
تۆرا لالش یا راگەهاندنێ/بەختیار قادر
چالاكڤانەكا ئێزدی دبێژت،ل رۆژا ساخكرنا بیرەوەریا كارەساتا شنگالێ،دڤێت ژنێن كورد ل ناڤخۆ و ژ دەرڤەی كوردستانێ خۆپیشاندانێن ئاشتیێ یێن نەرازیبوونێ ئەنجام بدەن و تێدا داخوازا رزگاركرنا كچ و ژنێن ئێزدی بكن.
رسالە شەركانی،چالاكڤانا ئێزدی دبوارێ مافێ ئافرەتێ دا بۆ (تۆرا لالش یاراگەهاندنێ)دیاركر:”ساخكرنا ڤێ بیرەوەریا دلتەزین ئەركەكێ مرۆڤایەتی یە و بەرپرسیارەتیا مەزن دكەفتە سەر ملێ گەلێ كورد و ب تایبەت ژنان،ژبەركو ژنا ددرێژاهیا دیرۆكێ دا ژنا كورد تووشی زوولمێ بوویە و هێش یا ژڤێ زوولمێ دنالت،لەوا ل رۆژا ساخكرنا بیرەوەریا كارەساتا شنگالێ داخوازیەكێ ئاراستە دكەم و دڤێت چالاكیێن ئەكتیف هەبن ژبال ژنێن كورد ل ناڤخۆ و ژ دەرڤەی كوردستانێ ئەو ژی ب رێیا گرێدانا كۆنگرەیان و خۆپیشاندانێن ئاشتیانە یێن نەرازیبوونێ و سمیناران و هەتا شانۆگەریان ل گۆرەپانێن گشتی”.
شەركانی گۆتژی پێتڤیە دوان چالاكیان دا داخوازا رزگاركرنا كچ و ژنێن ئێزدی بكن و ئەوا ل شنگالێ چێبوویی شەرمەزار بكن و ب تایبەت ددەرهەقێ ژنێ دا،ژبەركو بێ دەنگیا ژنا كورد ل سەر كریارێن داعشێ ددەرهەقێ ژنێن شنگالێ ئەو ژی كارەساتە.
ڤێ چالاكڤانێ ئاماژەكر كو ل سەر ژنا كورد هزر و دیتنا خۆ ژ چارچۆڤەیێ ئاینی رزگار بكەتن و بەرێ خۆ بدەتە دۆزا ژنێن شنگالێ،كو ئەو دۆزەكا مرۆڤایەتی و نەتەوەیی و نشتیمانی یە.
تُتاح هذه الصورة أيضا في: کوردی