ئیران لەشکرێ شیعی ل عیراقێ دروست دکەت
ئەڤرۆ نیوز:
ل دووڤ داخۆیانیەکا محەمەد عەل
ی فەلەکی ئێک ژ فەرماندێن لەشکرێ قودس یێ ئیرانی بۆ رۆژناما ( مەشرق) یا ئیرانی، ھێزەکا چەکداری یا نوو ب ناڤێ ( لەشکرێ ئازادکرنا شیعی) ب سەرکێشیا فەرماندێ گشتیێ لەشکرێ قودس ( قاسم سلێمانی) یێ ھاتیە پێکئینان کو دێ شەری ل ھەر سێ بەرەیێن شەری ل عیراقێ و سووریێ و یەمەنێ کەت.
ل دووڤ راپۆرتەکا رۆژناما (الشرق الاوسگ) یا ھژمار 13779 ل 19 ڤێ مەھێ، وی فەرماندێ ئیرانی دداخۆیانیا خوەدا دیارکریە (مەرج نینە چەکدارێن لەشکرێ ئازادکرنا شیعی ژ ھێزێن ئیرانی بن و دێ ئیران لەشکەرەکی ل ھەر دەڤەرەکێ دروست بکەت کو پێدڤی ب دروستکرنا وی لەشکری ھەبیت) و ئاماژە دا کو ئیران دێ پشت بەستنێ ب ھێزێن ناڤخوەیی کەت بۆ پەیداکرنا چەکدارێن لەشکرێ ئازادیا شیعی.
فەرماندێ زێرەڤانێن شۆرەشا ئیرانی ( محەمەد عەلی جەعفەری) ل مەھا کانوونا دویێ 2016، پرسا ھەبوونا 200 ھزار چەکدارێن پەیوەندی ب زێرەڤانێن شۆرەشێ ڤە ھەی ل پێنج وەلاتێن عەرەبی و ئیسلامی ئەوژی (عیراق، سووریا، یەمەن، ئەفغانستان و پاکستان) ئاشکرا کربوو و دانپێدان ژی ب کارتێکرنا ئیرانێ ل سەر کێشێن ل ھندەک وەلاتێن دەڤەرێ ھەین کربوو و ئاماژە ژی دابوو کو پێشڤەچوونێن وان کێشان بۆ ئیرانێ ئەنجامێن ئەرینی ھەبوون.
سەبارەت دووماھی پێزانینێن گرێدای گرنگیا ئیرانێ ب حەشد شەعبی و پشکداریا وی د شەرێ مووسلێ دا، د کوومبوونەکا سەرۆکێ ئەرکانێن لەشکرێ ئیرانێ (محەمەد باقری) ل گەل (فالح فەیاز) شیرەتکارێ ئاسایشا نیشتمانی یا عیراقی، بەحسێ شەرێ مووسلێ و رۆلێ حەشد شەعبی د شەرێن ڤێ دووماھیێ دا ل رۆژئاڤایێ عیراقێ دژی داعشێ ھاتە کرن و وی فەرماندێ لەشکریێ ئیرانی حەشد شەعبی ب ھێزا گرەنتیکرنا ئاسایشێ و جێگیربوونا ناڤخوەیی ل عیراقێ ھژمارت و راگەھاند ژی کو ھێزێن چەکدار یێن ئیرانی دبەرھەڤن ھاریکاریێ ل گەل ھێزێن چەکدار یێن عیراقی بکەن ل سەر ھەموو ئاستان و بیاڤێن بەرگریێ.
ئەڤ داخویانیێن باقری پشتی دو مەھان ژ داخۆیانیێن ( موحسن رەفیق دوست) ی ئێک ژ فەرماندێن زێرەڤانێن شۆرەشا ئیرانی دھێن، دەمێ نیەتا ئیرانێ بۆ دامەرزاندنا ( زێرەڤانێن شۆرەشێ) ل عیراقێ ئاشکراکری، دیسا ل مەھا گۆلانا 2016 ێ ئەندامێ لژنا سیاسەتا دەرڤە و ئاسایشا نەتەوی د پەرلەمانێ ئیرانێ دا (محەمەد سالح جوکار) راگەھاندبوو ( پێدڤیە ھێزا زێرەڤانێن شۆرەشێ ژ حەشد شەعبی ل عیراقێ بھێتە دامەزراندن).
دیارە د داخۆیانیێن بەرپرسێن وێ دا، حوکمەتا عیراقی ژی پشتەڤانیێ ل وان داخۆیانیێن فەرماندێن لەشکری یێن ئیرانی دکەن و ئەڤ چەندە ژی دداخۆیانیەکا ( فالح فەیاز) شیرەتکارێ ئاسایشا نیشتمانی یا عیراقی ئاشکرا دبیت دەمێ ئاژانسا (ئیسنا) یا ئیرانی ژێ ڤەگوھاستی ( حەشد شەعبی دووبارەکرنا ئەزموونا ھێزا باسیج یا سەر ب زێرەڤانێن شۆرەشا ئیرانی ڤە) و وی بەرپرسێ حوکمەتا عیراقی ھەبوونا حەشد شەعبی ب ئێک ژ فاکتەرێن ئێمناھیێ و جێگیربوونێ ل عیراقێ ھژمارت.
تُتاح هذه الصورة أيضا في: کوردی