هۆنەرێ راپێ ل كوردستانێ دپێشكەفتنێ دایە
تۆرا لالش یا راگەهاندنێ
هۆنەرێ راپێ ل دەستپێكێ وەك شۆرەشەك ل وەلاتێ ئەمریكا سەرهلدا ژ ئالیێ ئەمریكیێن پیست رەش ڤە،كو ب رێیا وێ داخوازا مافێ خۆ كرن، ئەڤ هۆنەرە ئێش و ئازارێن ڤەشارتی و نەدیار نیشا جیهانەكێ ددەت،ب ڕەنگەكێ گشتی راپ ل سەرانسەری جیهانێ ب گشتی و ل كوردستانێ ب تایبەتی د پێشكەفتنێ دایە و هەتا نۆكە گەلەك گەنجێن كورد پێڤە هاتینە گرێدان.
راپەر(ئەركان محەمەد) یێ بەرنیاس ب ئەركان بۆ دەنگێ لالش دیاركر،ب ڕەنگەكێ گشتی راپ ل سەرانسەری جیهانێ ب گشتی و ل كوردستانێ ب تایبەتی د پێشكەفتنێ دایە،گەلەك گەنجێن مە پێڤە هاتینە گرێدان،هەرچەندە پشتەڤانێن خۆ گەلەك هەینە،بەلێ هاریكاریا مە نەهاتیە كرن ژ جهێن پەیوەندیدارو ئاریشا راپا كوردی زاراڤێ كوردی یە بۆنموونە ئەگەر راپ ب زمانێ ئەرەبی بێتە گۆتن هەموو ئەرەب تێدگەهن ،بەلێ ل وەلاتێ مە یا سۆرانی بۆ خەلكێ سۆرایە و بەهدینی بۆ دەڤەرا بەهدینانە،راپێ ب خۆ ئاستەنگ ل ژیانا من دروستكرینە وەكی راپەر گەلەك جاران ئازادیا خۆ یا تایبەت من ژ دەست دایە،نابت ناڤێ راپەری بكەفتە سەر هەموو كەسا،چنكو هندەك راپێ بتنێ بۆ هەڤالا خۆ دبێژن،خالا ژ هەموویێ گرنگتر نەژادێ راپێ هاتیە ژ رەخنێ ب هەموو جۆراڤە، گەلەك جاران راپا رەخنەیی من گۆتیە و جهێ خۆ گرت دناڤ خەلكێ دا و من گەلەك جۆرێن راپێ گۆتن یا ژ هەموویا پتر خەلكێ حەژێ كری ئەڤینی بوو،ب رێیا رۆژناما دەنگێ لالش دەنگێ راپەران دگەهینم جهێن دەستهەلاتدار ڤان بەهرەمەندا و ڤی هۆنەری ژ دەست نەدەن.
هەروەسا راپەر (سعود فێسەل)یێ ناڤدار ب سۆزبێه بۆ دەنگێ لالش خویاكر،هۆنەرێ راپێ ئێش و ئازارێن ڤەشارتی و نەدیار ژ دلەكی نیشا جیهانەكێ ددەت و د ئێختە سەر زار ،من دیت كو من شیان هەینە ڤی هۆنەرێ جیهانی ب زمانێ مە بگەهینمە جڤاكێ خۆ ئەڤە پالدەربوو بۆ من ،ژ ئالیەكێ دی ڤە من دیت كو پتر ئاخفتن و چیرۆك و گازندە ل راپێ دئێنە گۆتن كو هۆنەرەكێ دی شیان نینن بگەهینت ب تێل و تەسەل ،دیسان گەلەك جاری رەخنە ژ ئالیێ خەلكێ ب خۆ ڤە ل راپێ دئێتە كرن دبێژن راپ هۆنەرەكی بیانیە و گەلەك خەلك ب چاڤەكێ كێم بەرێ خۆ ددەنە راپەرا لێ یا دروست راپ هۆنەرەكی جیهانیە و مە نە هێلا جڤاكێ مە ژێ بێ بەهربت و ئەگەرێ رەخنە وێ دزڤرتە نەژادێ وێ كو ئەمریكیێن پیست رەش راپ دگۆتن بۆ دیاركرنا ئێش و ئازاران و داخوازا مافێ خۆ ب رەنگێ گازندا دكرن،ژبەركو پتر گازندەنە و ئێش و ئازارن و ئەڤنە ژ كەتواری دئێنە وەرگرتن و دبنە راپ،لەورا د تێكستێن راپێ دا پتر رەشبینی خویا دبت.
ژلایەكێ دیڤە راپەر (عەبدی عزب)یێ دیار ب هەژار خابور بۆ دەنگێ لالش دبێژت:هەروەكی ئەم دبینین هەر وەختەكی جۆرەكی ئستران گۆتنێ تێتە مەیدانێ ژ وانا راپ،حەزا من بۆ ئسترانا راپێ ئەو بوو كو راپ ب ڕەنگەكێ سڤك دئێتە گۆتن و گەلەك هەست و سۆز تێدا دیاردبن و پتر ژ هەر هۆنەرەكێ چیرۆك و سەرهاتی تێدا دئێنە گۆتن و دگەهنە جهێ مەرەم،راپ وەك شۆرەشەك ل ئەمریكا سەرهلدا ژ ئالیێ ئەمریكیێن پیست رەش كو ب رێیا راپێ داخوازا مافێ خۆ دكرن هەتا نۆكە ژی راپەر پتر پیست رەش و ئەمریكی نە،دبینم ئاستەنگەك ل رێیا راپێ دا ئەوە پتر گرێدایە ب چینا گەنجان ڤە دان عەمر گوهێ خۆ نادەنێ،بەلێ بۆ گەنجا نۆكە گەلەك باشە و ژمارەكا زۆر یا خەلكێ پێڤە یا هاتیە گرێدان،هەروەكی وا بوویە پارچەك ژ لەشێ گەنجی،راپ گەلەك وەك رەخنە دئێتە گۆتن،چنكو نەژادێ وێ خەم و گازندەیە و رەخنە دئێتە كرن ل وان رەوشتێن جڤاكی یێن سوك وەكی خیانەتێ یان دەرەوێ یان سەردابرنێ یان گەندەلیێ …هتد،گەلەك جاری بۆ هەستێن جوان ژی دئێتە گۆتن وەكی ئەڤینی و سەر وەلاتی و پشتەڤانی بۆ پێشمەرگەی و سەر شەهیدا.
تُتاح هذه الصورة أيضا في: کوردی