نێچیرڤان بارزانی: ههولێر و بهغدا پلانهكا موكوم بۆ رزگاركرنا مووسلێ دانایه
waar – دهوك :
سهرۆكوهزیرێن ههرێما كوردستانێ راگههاند؛ ههولێر و بهغدا ب هاریكارییا ههڤپهیمانان، پلانهكا تۆكمه بۆ رزگاركرنا مووسلێ دانایه و هیڤی خواست دگهل بهغدا، ل سهر پلانا پشتی شهڕی مووسلێ ژی رێكبكهڤن.
نێچیرڤان بارزانی سهرۆكوهزیرێن ههرێمێ، دوهی ل ههولێرێ، پێشوازی ل ئۆرسۆلا ڤۆندێرلاین وهزیرا بهرگرییا ئهلمانیا و شاندا دگهلدا كر و شاندا ئهلمانی، پهسنا سهركهڤتنێن هێزێن پێشمهرگهی كر كو شیاینه بهرگریێ ژ ههموو پێكهاتهیێن جودا بكهن و سهركهڤتنێن مهزن بسهر تیرۆرێ دا تۆمار بكهن و بهردهوامیا پشتهڤانیا سهربازییا وهلاتێ خوه بۆ هێزێن پێشمهرگهی راگههاند.
دیسان پێشوازی ل ههماههنگیا دناڤبهرا ههولێر و بهغدایێ دا كر و پشتهڤانیا ههڤپهیمانان بۆ نزیكتربوونا ههولێر و بهغدایێ ژ ههموو روویان ڤه راگههاند، ب تایبهت د ئازادكرنا باژارێ مووسلی دا.
وهزیرا بهرگرییا ئهلمانیا بهردهوامیا هنارتنا هاریكاریێن مرۆڤایهتی بۆ ئاوارهیێن ههرێمێ ژی دوپاتكر و دا زانین كو دگهل شهڕێ مووسلێ، پتریا خهلكێ وی باژاری دێ ئاوارهیی ههرێما كوردستانێ بن، بۆ ڤێ یهكێ ژی، دێ بزاڤێن رژد كهن كو ههموو پێدڤیێن ئاوارهیان دابین بكهن، ژبهركو ئهلمانیا هایداری قهیرانا دارایی یا ههرێمێ یه.
ژ ئالیێ خوه ڤه بارزانیێ سهرۆكوهزیر، سوپاسیا هاریكاریێن سهربازی و مرۆڤی یێن ئهلمانیا كر و ئهو وهلات ب پشكهكا گرنگا ههڤپهیمانا دژی داعشێ ناڤكر و رۆلێ وهزیرا بهرگرییا ئهلمانیا بلند نرخاند كو پێشتر د دژوارترین رهوش دا، سهرهدانا ههرێما كوردستانێ كریه.
تُتاح هذه الصورة أيضا في: کوردی