فەرە ل سەر كۆمەلگەها ئەوروپی ب دروستی و بەرپرسیاری كار ل سەر كەیسا ئێزدیان بكت
كاروان باعەدری
رێڤەبەرێ سەنتەرێ فێركاریا مافێ مروڤان ل ئەلمانیا”عەلی عیسۆ”د دیدارەكێ دە بۆ رۆژنامەیا دەنگێ لالش راگەهاند:”رێكخراوێن مافێ مرۆڤا رۆلەكێ گرنگ و بەرچاڤ هەیە،ژبۆ دیكیۆمێنتكرنا وان تاوان و كۆمەلكوژییا جینۆساید ناساندنا ئێزدیان،دیسان یە فەرە ل سەر كۆمەلگەها ئەوروپی كو كار ل كەیسا ئێزدیان ب دروستی و بەرپرسیاری بكت و یا پێتڤیە دەرگەهێن وەلاتێن خۆ ڤەكەن بەرامبەری كۆچبەران،ئاماژەكر پەیاما مە بۆ نەتەوەیێن ئێكگرتی و كۆمەلگەها نێڤ دەولەتی كار بكن ل سەر رزگاركرنا وان ئێزدیێن هەتا نۆكە ددەستێ داعشێ دا ماین”.
ل دۆر رۆلێ رێكخراوێن مافێ مرۆڤا بۆ جینۆسایدا ئێزدیان،رێڤەبەرێ سەنتەرێ فێركاریا مافێ مروڤان ل ئەلمانیا”عەلی عیسۆ” دیاركر:” رێكخراوێن مافێ مرۆڤا رۆلەكێ گرنگ و بەرچاڤ هەیە ژبۆ دیكیۆمێنتكرنا وان تاوان و كۆمەلكوژییا جینۆساید ناساندنا ئێزدیان ،ژبۆ نڤیسینكرن و دیكیۆمێنتكرن كو پێشكێشی دادگەها تاوانێن نێڤدەولەتی بكن،داكو دانپێدانێ ب كارەساتا ئێزدیان بكن ل دادگەها تاوانێن نێڤ دەولەتی ،كارێ مە ل سەنتەرێ فێركاریێ یێ كو گرێدای كارێ جینۆسایدكرنا كارەساتا ئێزدیان مە چەندین كارو چالاكی ئەنجام داینە، داكو ئەڤ نەخۆشیا ب سەر ئێزدیان هاتی بگەهینیننە كۆمەلگەها نێڤ دەولەتی دا ئەوژی ب سەكنن لگەل ئێزدیان و داكو نەخۆشی و فەرمان دووبارە نەبن ب سەرێ ئێزدیان دە”.
سەبارەت كارێ سەنتەرێ ناڤبری بۆ كەیسا ئێزدیان”عیسۆ”ئاشكەراكر:”كارێ مە ئەو بوویە سمینارێن مەزن ل سەر دۆزا ئێزدیان بێتە ئەنجام دان و ب بەرهەڤبوونا چەندین كەساتیێن سیاسی و ئاینی و ئەكادیمی یێن بیانی ژ وانا ژی ئەرەبێن ئیسلامی و سوری وجیهانی یێن كو گرێدای ب ڤی كاری ڤە، داكو ئەم هەموو پێكڤە بریارێ بدەین ئەڤ كۆمەلكوژیا ب سەرێ ئێزدیان هاتی ب درێژاهیا دیرۆكێ شەرمەزاركەین بۆ مرۆڤایەتیێ ئەڤا كو ب سەرێ ڤێ پێكهاتی هاتی،دیسان مە رۆلەكێ گرنگ هەبوو ژبۆ خۆپیشاندانێن خەلكێ شنگالێ ئەوا داخواز دكرن بۆ جینۆساید ناساندنێ ،داوی خۆپیشاندانا مە ئەنجام دای ئەوا ل باژیرێ كۆلن ل سالڤەگەرا دوویێ یا كارەساتا شنگالێ بوو،مە ئێش و ئازارێن خەلكێ ئێزدی بۆ جیهانێ دیاركرن و مە داخواز ژ كۆمەلگەهێ نێڤ دەولەتی كر كو ل ڤی خەلكێ بێ گونەه خودان دەركەڤیت ل گەل ئێش و ئازارێن وان ، رەوشا ئێزدیێن عێراق و سوریایێ گەلەك خراپە ب تایبەت ئەوێن بووینە كۆچبەر ل وەلاتێن دەردۆرێ عیراقێ ب تایبەت سووریا و توركیا و هەروەسان گەلەك ژی ل یونانێ ژی درەوشەكا ئیكجار خراب دانە، هەموو رێ ل پێشیا وان هاتینە گرتن، سەرەرای وان هاریكاریێن ژلایێ رێكخراوێن ناڤنەتەوەیی ب تایبەت كەل وپەلێن خوارنێ ، بەلێ ئەڤ كارە بتنێ نە بەسە ژ بۆ وێ رەوشا وان یا ئالۆز و خراپ و تێكچوویی، یا ژ هەموویێ گرنگتر رەوشا وان یا دەروونی یا تێكچوویی یە گرێدایە ب پاشەرۆژا وان ڤە و ئەڤەژی دگرێداینە ب بریارێن ئەوروپی ڤە”.
دەربارەی كاركرنا كۆمەلگەها ئەوروپی ل سەر كەیسا ئێزدیان”عەلی عیسۆ”راگەهاند:”یە فەرە ل سەر كۆمەلگەها ئەوروپی كو كار ل كەیسا ئێزدیان ب دروستی و بەرپرسیاری بكت و یا پێتڤیە دەرگەهێن وەلاتێن خۆ ڤەكەن بەرامبەری كۆچبەران،داكو ژیانەكا نوو دەرباز بكن و هیڤی و خۆشی بۆ وان ڤەگەرت پشتی وان ئێش وئازارێن ل وەلاتێن خۆ دیتین، ئەو ئێشێن كو ئێزدیێن عێراقێ دیتین نۆكە ژی هەمان ئێش ئێزدیێن سووریا رووبروو بووینە ،رێیێن یۆنانێ ل هەمبەرێ وان گرتینە و ئەوژی ل عێراق و توركیا و لوبنانێ دژین و رەوشا وان نە ژ وان كۆچبەرێن دی باشترە بەلكوخراپترە”.
ل دۆر رەوشا كۆچبەرێن ئێزدی ل وەلاتێ یونانێ گۆت:”ئەو كۆچبەرێن ماینە هەلاویستی و پێشیا وان یە گرتی ل یۆنانێ ئەوێن كەسوكارێن وان ل ئەوروپا دژین،ب زەحمەتە ل گەل ئێك بژین چنكو ناڤێن وان هاتینە نڤیسین ژبۆ هندەك وەلاتێن دی كو بێتە ریپورتكرن ب رێیا كومۆسیۆنا كاروبارێن كۆچبەران،گەلەك كۆچبەران رازیبوونا خۆ دیاركریە ژبەركو دا ژوێ رەوشا خراپا وی وەلاتی بداوی بێن و ئەڤە ژی كارەساتەكا دییە ب سەرێ گەلێ مە دا دئێت”.
هەروەسا ل دۆر پەیاما سەنتەری بۆ جڤاكێ نێڤ دەولەتی ناڤهاتی دبێژت:”پەیاما مە بۆ نەتەوەیێن ئێكگرتی و كۆمەلگەها نێڤ دەولەتی كار بكن ل سەر رزگاركرنا وان ئێزدیێن ددەستێ داعشێ دا ، ژبەركو ئەڤە دوو سالن تووشی نەخۆشی و مەینەت و ئێشێن دەروونی و دەستدرێژیا سیكسی دبن،یا فەرە ل سەر كۆمەلگەهێ نێڤ دەولەتی چارەسەریا دەروونی و پزیشكی ل وەلاتَێن ئەوروپی بكت،داخوازێ دكن جهێن ئێزدیان بێنە رزگاركرن و چاڤدێرییا وان كۆچبەرێن ئێزدی یێن هەلاویستی ل یۆنانێ و وەلاتێن دەردۆر بێتە كرن ،دیسان پێتڤیە ل سەر هەموویان قەبارێ وێ كارەساتێ بزانن و ئەو زەرەر و زیان و نەخۆشیا ب سەرێ ئێزدیان هاتی”.
تُتاح هذه الصورة أيضا في: کوردی