دەستەیا بلندا بنگەهێ لالش دەست ب چارەسەركرنا ئاواران كر و ل سەر چاپكرنا پەرتۆكان بەردەوامە
تۆرا لالش یا راگەهاندنێ/ئیڤان حەجی
دەستەیا بلندا بنگەهێ لالش دچەندین بوارێن جودا دا كار دكت و خزمەتێ پێشكێشی خەلكێ خۆ دكت، نۆكە دبوارێ پزیشكی ژی دا دەست بكاركر بۆ چارەسەركرنا ئاوارێن ئێزدی ل كوردستانێ،هەروەسا دچاپكرنا پەرتۆكان دا و ب تایبەت یێن ل سەر كارەساتا شنگالێ و ب ئێزدیاتیێ ڤە دگرێدایی بەردەوامە،دیسان 60 دەمژمێرێن ئەرشیفێ داینە سەنتەرێ ڤەكۆلینێن جینۆسایدا شنگالێ بۆ مفا وەرگرتنێ بۆ كەیسا ناساندنا جینۆسایدێ ل دادگەها لاهای یا نێڤ دەولەتی.
رەشید میرزا،بەرپرسێ لژنا پەیوەندییا ل دەستەیا بلندا بنگەهێ لالش دیاركر:”بنگەهێ لالش بەردەوام كار دكت د هەموو بواران دا،چ بوارێن رەوشەنبیری و كۆمەلایەتی وهەربوارەكی دا و نۆكە دبوارێ پزیشكی ژی دا دەست بكاركر و ب هاریكاریا ئەندامێن بنگەهێ لالش یێن تایا دگرێدایی رێكخراوانە و ئەو رێكخراو دپزیشكی و كۆمەلایەتی نە،ژوانا ژی رێكخراوا سكۆب كو یا تەندروستیە ب هەڤكاری دگەل بنگەهێ لالش و هەتا نۆكە مە گەلەك جاران سەرەدانا خەلكێ باشیك و بارزان كریە و دێ سەرەدانا شنگالێ ژی كەین،بۆ چەندین بوارەكا ژوانا بۆ نەساخێن لەز و دووم درێژ و چەندین نۆژدارێن زیرەك مە هەینە ژ وەلاتێن سوید و هند و توركیا و ئەلمانیا و ل نێزیك دێ گەهنە هەرێما كوردستانێ و پتریا وان نۆژدارێن بیانی نە و دێ چارەسەریا وان كن و مە دەرمان و هەموو پێتڤیێن ساخلەمی هەینە هەكە هاتنە چارەسەركرن ل ڤێرێ دێ بەردەوامیێ دەنە وان،گۆتژی هندەك نەخۆشی ل ڤێرێ نائێنە چارەسەركرن ئەم دێ هەول دەین وان فرێ كەینە ژ دەرڤەی وەلات بۆ چارەسەریێ و ئەڤ چارەسەری ژی بتنێ بۆ ئاوارایە و ب تایبەت ژی یێن ئێزدی وبۆ هەركەسەكێ ڤیا سەرەدانا ڤێ رێكخراوێ بكت جهێ وێ ل بنگەهێ لالشە،تەكەست كر بنگەه بەردەوامە بۆ خزمەتكرنا خەلكێ خۆ و ژبۆ هاریكاریكرنا قوتابیان یێن دەڤەرێن مادێ 140 ژبۆ بەشێن ناڤخۆیی مە، پەیوەندی دگەل بەرپرسێن بەشێن ناڤخۆیی هەیە بۆ دابینكرنا جهێ ب تایبەت یێن كچا دگەل ئێك بن وەكی وان قوتابیان داخوازكری و مە ژی داخواز ژ زانكۆیا دهۆك كر و هاریكاریا وان كریە”.
هەروەسا “شەمۆ قاسم”بەرپرسێ لژنا رەوشەنبیری یا دەستەیا بلندا بنگەهێ لالش گۆت:”وەك لژنا رەوشەنبیری هەولەكا مەزن دكەین هندەك كاران بكەین،ئەم دبەردەوامین دچاپكرنا پەرتۆكا دا و ب تایبەت پەرتۆكێن ل سەر كارەساتا شنگالێ و ب ئێزدیاتیێ ڤە دگرێدایی ئەڤە ژ ئالیەكی ڤە و ژ ئالیێ دووێ ڤە نۆكە پرۆژەك ل بەردەستێ مەیە ئەوژی گۆڤارەك دەلیلەكی لالشە كو هەر ژ هژمارا 21 هەتا 41 ئەم دێ ئەندیكسەكێ بۆ چێكن كو هەركەسەكێ بڤێت دڤان بیست هژمارا دا چەند گۆتارا ب زمانێ كوردی و ئەرەبی و ئینگلیزی بڤێت و لێ بگەرت دێ ب ساناهی بینت و زانت كیژوان هژمارە،گۆتژی شێوێ وێ ژی وەكی گۆڤارا لالشە ،نۆكە یێ كار ل سەر دكەین و ل قوناغێن داویێ دایە و ل نێزیك دێ كەفتە بەردەست”.
ژبال خۆڤە”جەعفەر سمۆ”بەرپرسێ راگەهاندنا دەستەیا بلندا بنگەهێ لالش خویاكر:”نڤیسینگەها راگەهاندنێ و ئەرشیفی بەشەكە سەر ب بەشێ رەوشەنبیری یێ بنگەهێ لالش ڤە،ئەڤ هەردوو بەشە كارێ مە یێ سەرەكی خزمەتا بنگەهێ لالش و ئێزدیاتیێ بكن د رێیا راگەهاندنێ دا،تەوەرێ ئەرشیفی كو پتری نێزیكی 4000 دەمژمێرا هەیە هەموو ژ داب و نەریت و كەلتورێ باب و كالێن ئێزدیان هەر ژ سالا 93و هەتا نۆكە مە ئەرشیفێ رێ و رسمێن ئێزدیان و تەوەرەكێ دی یێ تایبەت هەیە ژ كارەساتا شنگال كو دۆسەیەكا تایبەتە ب كارەساتێ ڤە كو ئەوژی نێزیكی 300 دەمژمێرایە كو مە دیدار دگەل وان كچ و ژنێن ژ دەستێ داعش رزگاربووین كریە،و وەكی راگەهاندن ژی ب رێیا بەرنامێ سەما ل كەنالێ كوردستان تیڤی كو بەرنامەكێ پازدە رۆژیە ژ كارەساتێ وەرە مە كریە د خزمەتا كارەساتێ دەیە و بەری هنگێ ژی ل دۆر داب و نەریتێن ئێزدیان بوو،هەردیسان بەرنامێ مەرگە ژی كو ل رادیۆیا دهۆك دئێتە پەخشكرنە ل دەمێ كارەساتێ بەرنامەكێ رۆژانە بوو بۆ ماوێ سالەكێ ئەڤ بەرنامە رۆژانە بوو و پشتی هنگێ مەكرە هەفتیانە،زێدەباری رۆژناما دەنگێ لالش كو هەفتیانەیە ژلایێ بەشێ رەوشەنبیری و ب هەڤكاری دگەل بەشێ راگەهاندنێ دەردكەڤت و ئەم چاڤدێریا هەموو راگەهاندنێن ئێزدیان دكەین و هەرتشتەكێ ئەم بزانن گرنگە بەیاننامەیەكێ ددەرێخین كو خزمەتا هەموو تەخ و چینێن ئێزدیان بكت،هەروەسا ئەرشیفێ مە دخزمەتا هەركەسەكی و دەزگەهەكی دایە كو ئەم بزانن دێ خزمەتەكێ بۆ ئێزدیاتیێ كت چ فلمەكی دكیۆمێنتی یان دادگەهەكێ یان حكوومەتێ بت و ژ وی ئەرشیفی شێست دەمژمێر مە داینە سەنتەرێ ڤەكۆلینێن جینۆسایدا شنگالێ، داكو بكارن مفایی ژێ وەرگرن بۆ كەیسا ناساندنا جینۆسایدێ ل دادگەها لاهای یا نێڤ دەولەتی،دیسان رۆژانە دەرهێنەر و مامۆستا و تایبەتمەندێ دوارێ دكیومێنتان دا دئێن و ئەم هاریكاریا وان دكەین ئەرشیف ژی ب شێوەیەكێ گەلەكی باش هاتیە پاراستن و بەردەوام كار ل سەردكەین،نۆكە مە ژ قۆناغەكا گرنگ دەرباز كریە ئەو ژی قۆناغا ژ كاسێتی بۆ سیدی ونۆكە كار دكەین هەموو تشتێن خۆ بكەینە سیستەمێ كۆمپیۆتەری و ل دەمەكێ نێزیك ئەو سیستەم دێ ب داوی ئێت و كارێ مە دێ ب ساناهیتر بت و ژ قۆناغا مەترسیێ دەرباز بوویە”.
تُتاح هذه الصورة أيضا في: کوردی