ئەمریکا ئاگەھـ ژ کاریگەرییا ئاوارەیان ل سەر ھەرێما کوردستانێ ھەیە
waar – دهوك :
پەیڤدارێ وەزارەتا دەرڤە یا ئەمریکا ئاگەھییا وەلاتێ خوە ژ کاریگەرییا ئاوارەیان ل سەر ھەرێما کوردستانێ دیار کر و دا زانین؛ ئەو دێ لسەر پشتەڤانییا ھەرێمێ بەردەوام بن.
جۆن کێربی، پەیڤدارێ وەزارەتا دەرڤە یا ئەمریکا دوھی د پرێس کۆنفرانسەکی دا ئاشکرا کر؛ ئەمریکا وێ یەکێ دزانیت کو ھەبوونا ھەژمارەکا مەزن یا ئاوارەیان ل ھەرێما کوردستانا ئیراقێ کاریگەرییەکا مەزن ل سەر ئابۆر و ژێرخانەیا ناڤخوە یا ھەرێمێ ھەیە، ژبەر کو، ئەڤ بابەتە نھا دەستپێ نەبوویە و بەری نھا ژی ئەمریکا ھاریکاری کرییە.
کێربی دەربارەی سەرەدانا فرانسوا ئۆلاند، سەرۆکێ فرەنسا بۆ ھەرێمێ و سەرەدانا وی بۆ بەرەیێن شەڕی دا زانین؛ ئەمریکا خوەشحالە بەرانبەر ھاریکارییا ھەر وەلاتەکی د شەڕێ دژی داعشێ دا و گەھاندنا ھاریکارییان ژبۆ ئاوارەیان.
کێربی دوپات ل وێ یەکێ ژی کر کو واشنتۆن دێ لسەر پشتەڤانیکرنێ د برێڤەبرنا ئاوارەیان دا دگەل ھەرێم و ھەموو پارێزگەھێن دی یێن ئیراقێ بەردەوام بیت و وەلاتێ وی ژ سالا دوھزار و چاردێ تا نھا، پتر ژ ملیار دۆلارا ل ھاریکاریێن مرۆڤایەتی ل سەرانسەر جیھانێ مەزاختینە.
تُتاح هذه الصورة أيضا في: کوردی