مایتێكرن ئاریشان بۆ خێزانێ و هەڤژینان پەیدا دكت
دەنگێ لالش،جوان بەرواری
مایتێكرنا دەردۆران دبتە ئەگەرێ پەیدابوون و مەزنبوونا ئاریشان بۆ خێزانێ و دناڤبەرا هەڤژینان دا و ڤەقەتاندنا مرۆڤی دگەلەك دەلیڤەیێن كاركرنێ دا و دئێتە لادان،ڤەكۆلەرەكێ جڤاكێ ژی ئاماژێ ب وێ چەندێ ددەت كو یافەرە ئەڤ مایتێكرنە بێتە كێمكرن و ل سەر بنەمایێ رێزگرتنێ پێگەهێن قەبوولكرنا رەفتارو بۆچوونێن جودا بن.
ئافرەتەكا فەرمانبەر ب ناڤێ”جیهان”دیاركر:”گەلەك جاران دئێتە گوتن كو هەبوونا مایتێكرنا دەردۆران ئاریشە و ئالۆزیە بۆ هەبوونا خێزانێ،ژئالیەكی ڤە ئەگەر دەردۆرێن مرۆڤی مایتێكرن هەبت وی دەمی ئاستێ مرۆڤی یێ رەوشەنبیری بەرەف پێشداچوونێ دچت و نكارت بەردەوامیێ بدەتە هەموو بوارێن ژیانێ،ژ رەخەكێ دیڤە هەبوونا ڤێ چەندێ گەلەك جاران دبتە سەدەمێ ئاریشێن گران دناڤبەرا هەڤژینان دا و هەڤركی پەیدابت دبت زۆربەیا جاران بتە ئەگەرێ ڤەقەتاندنا مرۆڤی دگەلەك دەلیڤەیێن كاركرنێ دا و دئێتە لادان یان ژی هەبوونا فشارەكا زۆر ل سەر پەیوەندیێن مرۆڤی ژ ئالیێ جڤاكی ڤە ، لەورا ئەڤ چەندە ژی دیاردەیەكا زۆرا نەشرینە ل هەمبەر جڤاكەكێ كو بەردەوام وەرارا پێشكەفتنێ هەبت ب ڤی رەنگی تایبەت خێزان ل سەر ئاستێ ساخلەم پێگەهەكێ ڤالادێ مینت،ئەڤەژی كاریگەریەكا هەرە بلندە ل سەر ئاستێ ساخلەمبوونا جڤاكی،ئەڤجا پێتڤیە ئەڤ دیاردە بێتە بنبركرن و نەهێلان”.
ڤەكۆلەرێ جڤاكی”تێلی صالح”دبێژت:”بێگومان پەیوەندیێن جڤاكی دناڤا هەموو كولتۆر و جڤاكان دا گرنگیا خۆ هەیە،هەروەسا هەرتاكەكەسەك حەزكەت خوەدی پەیوەندیێن جڤاكی یێن ب هێز و هەلسەنگاندنەكا جڤاكی یا باش بت،مرۆڤ دناخێ خۆدا كەسەك جڤاكی یە حەژ پێكڤەژیانێ و پەیداكرن و پێكئینانا پتری و باشترین پەیوەندیان دكت ئەڤە ژی هەمووئەو راستێن زانستی نە ل دوڤ وان پێناسەو شروڤەكرنێن بۆ مرۆڤی هاتین كرن،ب دیتنا من دناڤا جڤاكێن رۆژهەلاتی دا ژی ئەڤ پەیوەندی هێشتا ب هێزن لەورا جڤاكێ كوردستانی ژی ژڤێ چەندێ هێشتا دبێ بارنین،لێ تشتێ هەرە گرنگ و هەژی گوتنێ یە كو گەلەك جاران ئەڤ پەیوەندیە دبنە ئەگەرێ مایتێكرنێ دژیارا كەسی دا یان دشێوازێ ب رێڤەبرنا خێزانێ دا ، یان دوان بریارێن خێزان ددەت گەلەك جاران ژی مایتێكرن دتشتێ گەلەك تایبەت دا دئێتەكرن ، ئەڤ چەندە ژی دبت بتە ئەگەرێ پەیدابوون و مەزنبوونا ئاریشان بۆ خێزانێ ب تایبەت ئەڤە ژی ژ ئالیێ كەسێن نێزیك ڤە یان ژی ئەو كەسێن گەلەك پەیوەندی مرۆڤی دگەلدا هەبت ئێتە روودان،گەلەك جاران جڤاكێ مە هەولدانا خۆ گهۆرینێ دكت،لێ ژبەر هەبوونا ڤان ئەگەرا پتریا جاران خۆ دبینت وەك گۆتن نەكریار،لەورا هەبوونا ڤان پەیوەندیێن ب هێز ، ئاستەنگ و رێگر دبوارێن پێشكەفتنێ و پێشداچوونێن جڤاكی دا پەیداكرینە،هەروەسا ترس ژ وەرارا جڤاكی و دەستدانا هندەك داب نەریت و پێگەهان هەیە، ژبەرهندێ یافەرە ئەڤ مایتێكرنە بێتە كێمكرن و ل سەر بنەمایێ رێزگرتنێ پێگەهێن قەبوولكرنا رەفتارو بۆچوونێن جودابن ، نەك لومەكرنێ ب شێوەیەكێ ئەرێنی و نەرێنی كارتێكرنا خۆ لسەر بەختەوەری و خۆشحالیا خێزانێ دا هەبت”.
تُتاح هذه الصورة أيضا في: کوردی