بنگەهێ لالش و قوتابیێن ئێزدی گونجاندنا یاسایی بۆ تاوانێن داعش دژی ئێزدیان ل زانكۆیا دهۆكێ گەنگەشە دكن
تۆرا لالش یا راگەهاندنێ
كۆمەكا قوتابیێن ئێزدی ژ كولیژا یاسایێ ل زانكۆیا دهۆكێ ب هەماهەنگی دەستەیا بلندا بنگەهێ لالش ل دهۆكێ،ئیرۆ چارشەمبوویێ، دیدارا قوتابیێن شنگال ل ژێر ناڤێ (گونجاندنا یاسایی بۆ تاوانێن داعش دژی ئێزدیان)،ل ناڤەندا قوتابیان ل زانكۆیێ گێرا.
دیدارێ ب خۆلەكەك سەكنین ل سەر گیانێ جانگۆریێن كوردستانێ و كارەساتا شنگالێ دەستپێكر،پاش پەیڤا بخێرهاتنێ ژ بال قوتابی”جەمیل موحسن”ژپێش بنگەهێ لالش و كۆمەكا قوتابیان ژ كولیژا یاسایێ هاتە پێشكێشكرن.
ئەڤ دیدار ژ سێ پەنەلان پێك دهات و ب سمینارا بروفیسور”عبداللە عەلی”سەرۆكێ بەشێ یاسایێ ل زانكۆیا دهۆكێ ل ژێر ناڤێ(كۆمكوژیا ئێزدیان د دیتنا یاسایا نێڤ دەولەتی دا) دەستپێكر و دووپاتكر كو كارەساتا شنگال و تاوانێن هۆڤانە یێن هاتینە ئەنجامدان ل دووڤ پیڤەرێن نێڤ دەولەتی دئێت هژمارتن ب جینۆساید ژئالیێ یاسایی ڤە،بەلێ عێراق نە ئەندامە د دادگەها نێڤ دەولەتی دا و ئەڤ ئەگەرە وێ رامانێ نادەت كو دۆسەیا دۆزێ دێ سەكنت،بەلكو هندەك رێێن یاسایی یێن پێگهۆر هەینە.
دسمینارا بەرێز”حاكم ئەیمەن”سەرۆكێ دەستەیا دووڤچوون و كۆمكرنا بەلگەیان بۆ دۆسەیا جینۆسایدا شنگالێ دا دیاركر كو دەستەیا وان رابوویە ب كۆمكرنا ڤەكۆلین و پێرابوونێن فەر بۆ دادگەهێن نێڤ دەولەتی،دازانین ژی كو ڤەكۆلین و بەلگەیێن هەین ل بنگەهێ وان ئەركانێن جینۆسایدێ نە ب حەموو تێگەهێن یاسایی.
هەروەسا دسمینارا بەرێز”حسێن قاسم حەسون”پەیڤدارێ لژنا بلندا دۆسەیا جینۆسایدا شنگالێ دا دووپاتكر كولژنا بلند رابوو ب كۆمكرنا تاوانێن داعش ل شنگال و حكومەتا كوردستانێ دێ رابت ب فشاركرنێ ل سەر حكومەتا عێراقێ ژبۆ ببتە ئەندام د دادگەها تاوانێن نێڤ دەولەتی دا و ل دەمێ حكومەتا عێراقێ رازی نەبوو ببتە ئەندام،حكومەتا كوردستانێ دێ داخوازا دادگەهەكا نێڤ دەولەتی یا تایبەت كت بۆ ڤێ دۆسێ.
ل داوییا دیدارێ گەنگەشە ژبال ئامادەبوویان ڤە هاتە كرن و پێشنیارێن وان هاتنە پێشكێشكرن بۆ لژنا سەرپەرشت ژبۆ گەهاندنا وان پێشنیاران بۆ جهێن شۆلەژێ.
تُتاح هذه الصورة أيضا في: کوردی