ئۆپراسیۆنا کۆنترۆلکرنا موسلێ بەردەوامە و ٢٩ چەکدارێن داعشێ هاتنە کوشتن
ئێن ئارتى
ئۆپراسیۆنا کۆنترۆلکرنا تاخێن رۆژئاڤایێ موسلێ بەردەوامە کو هەیا نها ل ژێر دەستێ داعشێ دانە، سوپایێ عێراقێ ژى راگەهاند، ٢٩ چەکدارێن داعشێ هاتینە کوشتن.
د راگەهاندنەکێ دا، شانەیا راگەهاندنا جەنگی یا سوپایێ عێراقێ راگەهاند، ژبەر بۆردومانێن فرۆکێن جەنگیێن عێراقێ، ٢٩ چەکدارێن داعشێ ل رۆژئاڤایێ پارێزگەها نەینەوا هاتنە کوشتن و شەش ترۆمبێلێن بۆمبەکری ژى هاتنە تێکشکاندن.
هەروەسا د وێ راگەهاندنێ دا هاتیە، فرۆکێن جەنگیێن سوپایێ عێراقێ ڤەشارتگەهەکا داعشێ ل دەوروبەرێ ناحیا قەیرەوان و قەزا بەعاج ل رۆژئاڤایێ باژێرێ موسلێ ل ناڤەندا پارێزگەها نەینەوا بۆردومان کرن.
ئەڤە د دەمەکی دایە کو دوهی هێزێن عێراقێ ئۆپراسیۆنا کۆنترۆلکرنا تاخێن رۆژئاڤایێ موسلێ کو هەیا نها ل ژێر دەستێ داعشێ دانە دەسپێکرینە و حەشدا شەعبی ژى ئۆپراسیۆنا کۆنترۆلکرنا قەزا بەعاج ل رۆژئاڤایی موسلێ دەسپێکریە.
رێکەفتی ١٧ێ کانوونا ئێکەما ٢٠١٦ێ، ئۆپراسیۆنا کونترۆلکرنا موسلێ دەسپێکریە کو تێدا بەشێ چەپێ ( رۆژهەلاتێ) موسلێ ب تمامی هاتە کۆنترۆل کرن.
رێکەفتی ١٩ێ شوباتا ٢٠١٧ێ، ئۆپراسیۆنا ئالیێ راستێ یێ باژێرێ موسلێ ( رۆژئاڤا) دەسپێکر و ژ وی دەمی و و هەیا نها چەندین دەڤەر و تاخ هاتینە کۆنترۆلکرن و چەند دەڤەرەکێن کێم د دەستێ چەکدارێن داعشێ دا ماینە.
باژێرێ موسلێ دکەفیتە باکوورێ عێراقێ و چەکدارێن داعشێ ل ١٠ێ حوزەیرانا سالا ٢٠١٤ێ کۆنترۆلکربوون.
ز.ح
تُتاح هذه الصورة أيضا في: کوردی