بارزانی: لدووڤ ههموو پیڤهران ههرێمێ مافێ سهرخوهبوونێ ههیه
WAAR_دهوک
سهرۆكێ دیوانا سهرۆكاتییا ههرێما كوردستانێ رادگههینیت، لدووڤ ههموو پیڤهران، گهلێ كورد ماف ههیه بڕیارێ ل سهر پاشهرۆژ و چارهنڤیسێ خوه بدهت
د. فوئاد حسێن سهرۆكێ دیوانا سهرۆكاتییا ههرێما كوردستانێ د روونكرنهكێ دا لدۆر ئهگهرێن دهركرنا فهرمانا رێفراندۆمێ ژ ئالیێ سهرۆكێ ههرێمێ ڤه دیار كرییه، مهسعوود بارزانی، ل دووڤ قانوونا سهرۆكاتییا ههرێما كوردستانێ و ب ل بهرچاڤوهرگرتنا بهرژهوهندییا گشتی و ههروهسا ب پشت بهستن ب بنهمایێن مافێ چارهنڤیسی كو مافهكێ دان پێ دایه ژ ئالیێ كۆمهلا گشتییا نهتهوهیێن ئێكگرتی ڤه، فهرمانا رێفراندۆمێ دهركرییه
ههروهسا گۆت: ژبهر كو گهلێ كوردستانێ ههموو تایبهتمهندی ژ روویێ خاك، زمان، كولتوور و مێژوو و ههروهسا گشت بنهمایێن پێناساندنێ وهكو گهل ههنه، لهورا لدووڤ ههموو پیڤهران ماف ژی ههیه بڕیارێ ل سهر پاشهرۆژ و چارهنڤیسێ خوه بدهت
د. فوئاد حسێن گۆتییه: مهسعوود بارزانی سهرۆكێ ههرێما كوردستانێ، ئاماژه ب وێ یهكێ كرییه كو ههر ژ دروستبوونا دهولهتا ئیراقێ، گهلێ كورد خهبات بۆ چهسپاندنا مافێن خوه و ژبۆ پێكڤه ژیانهكا ئاشتییانه دگهل گهلێن دی یێن ئیراقێ كرییه، ئهو یهك ژی ئارمانجا ههری سهرهكی یا بزاڤا رزگاریخوازا گهلێ كورد بوو، لێ ل بهرانبهر ڤێ، گهلێ كورد تووشی كۆم كۆژی، نههامهتی و دهردهسهریییان بوو
سهرۆكێ دیوانا سهرۆكاتییا ههرێمێ ل داوییا روونكرنێ ئاماژه كرییه كو بارزانی فهرمانا رێفراندۆمێ دایه ژبهركو تا نها حكومهت و سهركرداتییا سیاسییا ئیراقێ ل سهر سیاسهتا پێشێلكرن و پشتگوهخستنا دهستووی و مافێن گهلێ كوردستانێ بهردهوامه، لهو ئهوان بڕیار دایه بۆ رایا گهلێ كورد ڤهگهڕن و ئهو بڕیارێ لسهر چارهنڤیس و پاشهرۆژا خوه ب رێیا رێفراندۆمێ بدهن.
تُتاح هذه الصورة أيضا في: کوردی