شێخ شامۆ دوڤچۆنا كەیسا زارۆكەكێ رزگاربوویێ ئێزدی ل وەلاتێ توركیا دكت
تۆرا لالش یا راگەهاندنێ
ئەندامێ پەرلەمانێ كوردستانێ و سەرۆكێ دەستەیا بلندا بنگەهێ لالش بەرێز(شێخ شامۆ)ئاشكەراكر،دوڤچۆنا كەیسا زارۆكێ رزگاربوویێ ئێزدی ژ گوندێ كۆچۆ (لازم قاسم) ل وەلاتێ توركیا هاتیە كرن،هەردەما پشكنینێن خوونێ یێن خێزانێ تەمام دبن،ئەڤ زارۆك دێ ڤەگەرە كوردستانێ و جەم دەیك و بابێن خۆ.
رزگاربوویێ ئێزدی(قاسم عەڤدو)ژكۆمكوژیا گوندێ كۆچۆ رزگار بوویە، د داخویانیەكێ دا بۆ رۆژناما دەنگێ لالش ئاشكەراكر،كورێ من بناڤێ (لازم) یێ شەش سالێ دگەل دەیك و سێ خوشك و برایان ل دەمێ تیرۆرستێن داعش هێرشی كۆچۆ كرین خێزانا من كارین خۆقورتال بكن،لێ ژبەر نەخۆشیا دەیكا من نكاری دەركەڤم و خێزانا من ل قەندیلا شنگال كەفتە دەستێ داعش،گۆتژی كورێ وی ب ژنەكا تەلەعفەری یا توركمان هاتیە فرۆشتن و ئەڤە بۆ ماوێ سێ سالە ل جەم وێ پشتی ژبال وان كەسێن گرتیێن ئێزدیان ژدەستێ داعش رزگار دكن وێنەیێ وی بۆ من هات ئەڤجا من ب (8000) دۆلارێن ئەمریكی كری و قاچاخچیێن كورێ من رزگار كرین گۆتن دێ ب رێیا توركیا را بینن لێ پشتی ئەز هاتم ئاگەهداركرن كو دێ ل دەرگەهێ سنووریێ براهیم خەلیل را وەرە ئەم چۆین ژبۆ پێشوازیا وی و دگەل من ژی دوو كارمەندێن ئاسایشێ هاتن هەتا قاپیا توركیا،لێ ب مخابنی ڤە كورێ من ئەم ناس نەكرم و زمانێ خۆ ژبیركریە چونكی ل دەكێ هاتی گرتن ژیێ وی سێ سال بوون و ب توركمانی دئاخڤت ئەز ژبال پۆلیسێن تورك ڤە هاتم قوتان و بێ رێزی ل بەرامبەر من هاتە كرن و گۆت:((من پشكنینا خوونێ یا ئەنجام دایی و ئەڤە پتر ژ (40) رۆژانە و هێشتا چ ئەنجام دیار نەبووینە ل توركیا و نهۆ كورێ من وێ ل باغچەیەكێ زارۆكان یێ حكومەتا توركیا لباژێرێ شرنەخێ یە و زێدەباری هەڤدیتنەكێ دگەل كونسلیا توركی ل هەولێرێ و شرۆڤەكرنا بابەتی،لێ هێشتا چاڤەریێ ڤەگەراندنا كورێ خۆ دكەم)).
هەر ل سەر دوڤچۆنا ڤی بابەتی و ئاگەهداربوونا ئەندامێ پەرلەمانێ كوردستانێ و سەرۆكێ دەستەیا بلندا بنگەهێ لالش بەرێز(شێخ شامۆ)لسەر كێشەیا ڤی زارۆكی،كەسەك ل توركیا راسپاردیە ژبۆ ڤەگەراندنا ڤی كەسی و كەیسا وی ل توركیا دوڤچۆن لسەر یا دئێتە كرن و پشكنینێن خوونێ یێن خێزانێ ژ دیاربەكر هاتینە ڤەگوهاستن بۆ ئیستەنبۆلێ و هەردەما پشكنین تەمام ببن،ئەڤ زارۆك دێ ڤەگەرە جەم دەیك و بابێن خۆ.
هەروەسا بابێ لازمی دیاركر،هەموو بەلگەیێن پێتڤی یێن كورێ خۆ هەنە ،لێ توركیا رێگرە ل هەمبەری ڤەگەراندنا وی،داخوازێ ژ سەرۆكێ هەرێما كوردستانێ و سەرۆكێ حكومەتا هەرێمێ دكەم خۆ ل ئاریشەیا ڤەگەراندنا كورێ وی بكەنە خودان.
تُتاح هذه الصورة أيضا في: کوردی