ئهو چاكسازیێن پێدڤیه حوكمهت ب لهز ئهنجام بدهت
رهوان سوبحى نهێلى
داخویانیا ڤێ دووماهیێ یا قوباد تالهبانى جێگرێ سهرۆكێ حوكمهتێ كو دیاركرى ل ههرێمێ كهسانێن فیرعهون ههنه و چ لێپرسین ل گهل نههاتینهكرن و بزاڤێن سهرۆكێ حوكمهتێ نێچیرڤان بارزانى یێن بنگههین بۆ چاكسازیكردن د ههموو كهرتان دا نیشانهكا ب هێزه كو جۆره باوهریهك بۆ خهلكى ڤهگهریت كو حوكمهتا ههرێما كوردستانێ پشتى د ماوێ سێ سالێن چوویى دا كو بودجێ وێ ژ ئالیێ عیراقێ ڤه هاتیه برین یێ د قهیرانێ دا یه و نهشێت مووچێ فهرمانبهران ب دروستى بدهت و نیازا چاكسازیێ ههیه.
چوونا سهرۆك وهزیرێن ههرێمێ ل رۆژا 13 ڤێ ههیڤێ بۆ پهرلهمانێ كوردستانێ و كومبوونا ل گهل سهرۆكاتیا پهرلهمان و فراكسیون و لژنێن دارایى و یاسایى رامانا وێ ئێكێ دگههینیت كو حوكمهتێ دڤێت چاكسازیێن رژد بكهت، بهلێ ب هاریكاریا پهرلهمانى، ئانكو حوكمهتێ دخوازیت ببیته خودان پلانهكا نوو بۆ دابهشكرنا مووچان، رهوشا ئابوورى و كارگێرى و برێڤهبرنێ ب هێزتر لێ بكهت و ب رێیا پرۆژه قانوونهكا چاكسازیێ ل پهرلهمانى دهنگ ل سهر بهێتهدان و ببیته قانوون بۆ وێ یهكێ مووچێ خانهنشینێن نهقانوونى و بن دیوار و دو موچه بهێنه چارهسهركرن داكو موچێ فهرمانبهرێن دروست بهێته دان كو دانا مووچان د ڤێ قووناغێ دا ژ كێشێن ههره سهرهكى یه یێن ڤێ حوكمهتێ.
فشارێن بهغدا یێن بهردهوام ل سهر ههرێمێ و ئهو گهندهلیا ڤان چهند سالێن چوویى كهتیه سهر ئێك و هاتیه كرن و ئهو بێدهنگیا هاتیه ههلبژارتن، نوكه پێدڤى ب قووناغهكا نوى یه ئهوژى قووناغا موراجهعهت و ب خوداچوونێ یه، دڤێت ب ئێك دهنگى بهرامبهر بهغدا خوه راگرین و یا د وێ د ناڤخویا خوهدا چاكسازیان بكهین، ب تایبهت د سیستهمێ مووچان دا، ژبهر كو گهندهلیا ل سیستهمێ مووچان دا ههى، ب پرۆسهیا بایۆمهترى ژى نههاته چارهكرن، بچووكترین نموونه ژى ئهگهر بهحس بكهین، ل سهر زارێ كهسێن ئهندام د لژنا چاكسازیێ دا، وهكو د.فهرسهت سۆفى، بهرپرس ل ڤێ ههریمێ ههبوویه كو چوویه بهر دلۆڤانیا خودێ و نوكه 15 زێرهڤانێن وى مووچهى وهردگرن و ب دههان هزار خانهشین، ب رێیێن نهیاسایى هاتینه خانهشین كرن كو پێدڤیه ئهڤ یهكه بهێته چارهكرن و خانهشینێ دروست نهبیته قوربانى وان كهسێن ب پلێن وههمى خانهنشین بووین، ئانكو ئهگهر حوكمهت چاكسازیێ د ڤى بوارى دا نهكهت، بێگومان نهشێت مووچێن فهرمانبهرێن سهرهكى دابین بكهت و بۆ ڤێ چهندێ ژى حوكمهت پێدڤى ب ئیدارهك و جورئهتهكا ب هێز ههیه چونكو دێ تووشى گهلهك فیرعهونێن ناڤخویى بیت، لهومان ژى فهره پارتێن سیاسى ل ڤێ قووناغێ پشتهڤانیێ ل حوكمهتا ههرێمێ بكهن داكو پێكڤه ڤێ قووناغا دارایى یا دژوار دهرباز بكهین، ژبهر كو د ماوێ سێ سالێن چوویى دا ههرێم تووشى گهلهك كارهساتێن مهزن بوویه كو ئهوژى شهرێ داعش و كهتنا كهركووكێ كو ڤێ چهندێ گهف بۆ سهر سیستهمێ سیاسى و ژیارا وهلاتیان دروست كریه، ژبهر كو دوژمنێ مه یێ پیلانێن مهزن ددانیت ههتاكو تشتهكێ نههێلێت ب ناڤێ ههرێما كوردستانێ، سهرهراى وێ یهكێ ئیرانێ دهرگههێن خوه یێن سهرهكى یێن سنۆرى گرتى و ههروهسا بهغدا فرۆكخانێن ههرێمێ گرتینه و ههرێم ب ههمى رهنگان تووشى خهندقاندنێ كریه.
ئهڤ گۆتاره ل 18/12/2017ل مالپهرێ ئهڤرۆ نيوز هاتيه بهلاڤكرن.
تُتاح هذه الصورة أيضا في: کوردی