ملیارەك دینار بۆ كچ و ژنێن رزگاربوویێن ئێزدی هاتە تەرخانكرن
تۆرا لالش یا راگەهاندنێ
كوژمێ ملیارەك دینار ژ بوودجا پارێزگەها مووسل یا ئیسالە،بۆ كچ و ژنێن رزگاربوویێن ئێزدی هاتیە تەرخانكرن.
ئەندامێ ئەنجوومەنێ پارێزگەها مووسل(سەیدۆ چەتۆ) بۆ رۆژناما دەنگێ لالش راگەهاند،وەك ئەنجوومەن بەریا چەند هەیڤان بریار دابوو ئەو كچ و ژنێن ئێزدی یێن ژ دەستێ داعش هاتینە رزگاركرن،هەرێكێ پارچەكا ئەردی ژێرا بێتە تەرخانكرن لسەر كیستێ مووسل،ژبەر هندێ دا مفایەكی مادی ژێ بكن یان پارچەیێن ئەردی پێ بكرن و ل جیێ خۆ ئاڤا بكن مە داخوازكر ل سەنتەرێ پارێزگەهێ و دەڤەرێن مە یێن دی ژی بت و گۆت:(( پار ملیارەك دینار هاتە تەرخانكرن ژ بوودجا پارێزگەهێ و هاتە بەلاڤكرن بسەر(1710)كچ و ژنان دا و هەرێكێ(560)هەزار دینار وەرگرتن،پشتی هنگێ مە ملیارەكا دی تەرخانكریە ژبوودجا سالا(2018) یا پارێزگەها مووسل،بەلێ هێشتا نەهاتیە مەزاختن و هەكە هاتە مەزاختن دیسان ب هەماهەنگی لگەل نڤیسینگەها رزگاركرنا رەڤاندیا ل پارێزگەها دهۆكێ كو دێ لیستەكێ دەنە مە و دێ وی كوژمەی دەینە وان كچ و ژنان یێن جارا دی نەگەهشتیێ و ژمارا كەسان نەهاتیە دیاركرن،هەتا دراڤ دئێتە مەزاختن پاش دێ دیار كەین)).
چەتۆ دا زانین ژی مە داخوازكریە خزمەتكاری ل دەڤەرێن شنگال و دەشتا نەینەوا بێنە بجهئینان، ب مخابنی ڤە ژبەر ئاریشان و نەئێمناهیا ل دەڤەرێ هەی خزمەتكاری نائێنە بجهئینان.
تُتاح هذه الصورة أيضا في: کوردی