بەرپرسێن شنگالێ هۆشداریێ ژ خرابوونا رەوشا دەڤەرێ ددەن
تۆرا لالش یا راگەهاندنێ/كاروان باعەدری 
زێدەتر ژ(80%) ژ خەلكێ شنگالێ هێشتا ئاوارەنە ل هەرێما كوردستانێ و(20%)ل شنگالن،حەشدا شەعبی و پەكەكە رێ نادەن ئەو (20%)ژی ڤەگەرنە هەرێمێ،بەرپرسێن شنگالێ ژی هۆشداریێ ژ خرابوونا رەوشا دەڤەرێ ددەن و دبێژن رۆژانە پێشلكاری ل شنگال زێدە دبن و دوور نینە شەرەكی مەزن چێبت.
فەرماندێ گشتی یێ هێزێن پێشمەرگەی ل شنگال(قاسم شەشۆ)دیاركر،رۆژانە پێشلكاری ل شنگال زێدە دبن و ئەگەر بڤی شێوەی بچت،دوور نینە شەرەكی مەزن چێبت،چنكو دیسان حكوومەتا عێراقێ ب هاریكاریا حەشدا شەعبی و ب بەهانەیا هەوا ڤەگەریانا ئاواران بۆ دەڤەرێن وان،تیرۆرستان دئیننە شنگال،لەوا پێشبینیا شەرەكی دی دئێتە كرن،نهۆ ژی هەموو گرۆپ و لایەنێن شنگال رووبەرەك ل قەزایێ ئێخستیە ژێر دەسەلاتا خۆ و ب ئارەزۆیا خۆ مامەلێ تێدا دكن و هەموو یاسایێن خۆ ژی بجهدئینن.
هەروەسا قایمقامی شنگال(مەحما خەلیل)گۆت:هەموو ئەو هێزنە نە یاساینە و هەتا بڤی شێوەی بچت و هێزێن نە یاسایی شنگالێ بكەنە قوربانیا بەرژەوەندیێن خۆ، هیچ خزمەتكاریەك بۆ دەڤەرێ نائێت،نهۆ ل شنگال هەموو جۆرە قەیرانەكێ سەرهەلدایە و حەشدا شەعبی رێ نادەت خەلك بێنە دهۆكێ،چنكو خەلك لژێر دەسەلاتا حەشدێ دا هەموو جۆرە نەهامەتییەك بسەر دا هاتیە.
ژلایێ خۆ ڤە بەرپرسێ لقێ پارتی دیموكراتی كوردستان(قادر قەچاخ)دبێژت:نهۆ زێدەتر ژ(٨٠%) خەلكێ شنگال ئاوارەنە ل هەرێما كوردستانێ و(٢٠%)ل شنگالن،حەشدا شەعبی و پەكەكە رێ نادەن ئەو (٢٠%)ژی ڤەگەرنە هەرێما كوردستانێ،چنكو خەلك لژێر دەسەلاتا حەشدێ دا نەخۆشترین رۆژا دبۆرینن و حەشدێ هەموو دەرگەهەك بسەردا داخستیە،هەر ئەو هێزەنە كو ب ناڤێن جۆراجۆر و درووشمان خەلكێ بسەر دا دبەن و ناهێلن رێیا شنگال_دهۆك بێتە ڤەكرن،بۆ هندێ خەلك بگەهتە لالش و شێخان بۆ ناڤ كەسوكارێن خۆ.
شنگال باژێرەكی كوردستانی دەرڤەی ئیدارا هەرێمێ یە،دكەفتە رۆژئاڤایێ باژێرێ مووسل و لسەر سنوورێ سووریایە،پشتی خیانەتا(١٦)ی ئۆكتۆبەرێ حەشدا شەعبی دەست بسەر وێ دەڤەرێ دا گرتیە و ئەو باژێرە بوویە جیێ پێشیلكاریێن میلیشیایێن شیعی.
تُتاح هذه الصورة أيضا في: کوردی