نەبوونا دەرمان و نۆژداران بەرێ ئاكنجیێن شنگالێ دایە مووسل و تلهعفەر
تۆرا لالش یا راگەهاندنێ/رائد غانم
ئاكنجیێن شنگالێ ددەن خویاكرن كو ژبەر نەبوونا دەرمانا و بنگەهێن ساخلەمیێ و نەخۆشخانەیان ل شنگال،بۆ وەرگرتنا چارەسەریێ وان بەرێ خۆ دایە مووسل و تلهعفەر،چنكو ژبەر گرتنا رێ ئەو نكارن قەستا هەرێما كوردستانێ بكن.
وەلاتی(زهێر خەلەف)ئاكنجی یە ل شنگالێ دیاركر،ل شنگال نهۆ مە پێتڤی ب چاڤدێریا ساخلەمیێ هەیە و نهۆ ئەم گەلەك جارا نەچار دبن سەرەدانا مووسل و تەللەعفەر دكن و هەر چەندە ڕەوشا ئێمناهیێ هێش نەیا ئارامە ل وان دەڤەران بەلێ هەر چاوا بت ئەم دچن،گۆتژی ل دەمێ بۆری دا مە گەلەك جارا سەرەدانا پارێزگەهێن هەرێما كوردستانێ دكر،بەلێ رێیا كو شنگال ب هەرێمێ ڤە گرێدەت یا یا گرتیە و ئەم نكارن بچنە كوردستانێ.
ژلایەكی دی ڤە (ئیلهام خودێدا) ئاكنجیا شنگالێ یە دبێژت:نەبوونا نۆژدارێن تایبەت ب ژنان ڤە ڤالایەكا گەلەك مەزنە و ژ هەر تشتی گرنگترە و نەبوونا سالەیێن ژ دایك بوونێ هەرچەندە ئەم نكارن سەرەدانا هەرێما كوردستانێ بكن و نكارن ل تلهعفەر و مووسل بمینن بۆ ماوێ چەند رۆژان،ژبەر رەوشا ئێمناهیێ یا خرابە ل وێدەرێ،ژبەر ڤێ چەندێ ئەم دخوازن هەر پێتڤیەكا ساخلەمیێ بۆ مە بێتە دابینكرن داكو ژیانا مە باشتر لێ بێت.
ژبال خۆڤە نۆژدار(شەمۆ ڕەشۆ)ل بنگەهێ ساخلەمیا مەزارگەهێ شەرفەددینە ئاشكەراكر،ڕەوشا ساخلەمیێ ل شنگال نەیا باشە ژبەر نەبوونا ستافەكی ساخلەمیێ یێ باش و نەبوونا دەرمانا و بنگەهێن ساخلەمیێ و نەخۆشخانەیان، لەوا نەچار دبووم هەموو جۆرە نەخۆشیان چارەسەر بكەم،ژبەرنەبوونا نۆژدارێن تایبەت ب نەخۆشیێن جودا جودا و ژبلی ڤی بنگەهی چ بنگەهێن دی نینن،دووپاتكر ژی كو ژبەر رەوشا ئێمناهیێ و مەترسیا لسەر ژیانا وان نۆژدار ل شنگال كارناكن و ئەڤەژی ب ئەگەرەكا بەرئاقلانە دئێتە هژمارتن.
ئاكنجیێن شنگالێ دخوازن رێیا دناڤبەرا شنگال و هەرێما كوردستانێ دا بێتە ڤەكرن،داكو سەرەدانا هەرێمێ بكن بۆ وەرگرتنا چارەسەریێ و هەر پێتڤیەكا ساخلەمیێ بۆ وان بێتە دابینكرن.
تُتاح هذه الصورة أيضا في: کوردی