15% ئاوارە ڤەگەریاینە شنگالێ
تۆرا لالش یا راگەهاندنێ/لەیت حسێن
ئاوارەیێن شنگالێ ددەن دیاركرن كو خزمەتكاریێن سەرەكی وەك ئاڤ و كارەبا و ئارامیا رێیان نەهاتینە دابینكرن و گەلەك مالێن وەلاتیان هاتینە وێرانكرن و هەرفاندن،هەتا جی و دەڤەرێن مە نەئێنە ئاڤاكرن و قەرەبووكرن نكارن ڤەگەرنە سەر وارێن خۆ ڤە،بەرپرسەكی شنگالێ ژی ئاشكەراكر كو هەتا ئیرۆ رۆژ (15%)ئاوارە ڤەگەریاینە.
(كەمال حسێن) ئاوارەیەكی خەلكێ شنگالێ یە ددەتە دیاركرن پێتڤی یە هێزەك هەبت چ ژلایێ حكوومەتا هەرێما كوردستانێ یان ژلایێ حكوومەتا عێراقێ چاڤدێربن لسەر مرۆڤێن خراب و پاراستنا خەلكێ بكن،داكو چ كارەساتێن دی بسەر مە دا نەئێن راكرن و كۆمكوژی نەئێنە دووبارەكرن وەكو یا ل 3ی تەباخا 2014ێ بسەر مەدا هاتی،ژبەركو تێدا بسەدان وەلاتیێن بێ گونەه هاتنە كوشتن و ب هەزاران هاتنە گرتن و دەربەدەركرن،ژلایەكی دی ڤە هەتا نهۆ چ خزمەتكاری وەكو قوتابخانەیێن ئامادەیی و نەخۆشخانە و پێتڤیێن وان نەهاتینە بجهئینان هەتا خەلك بكاربن ڤەگەرن جی و دەڤەرێن خۆ و گەلەك مالێن وەلاتیان ژی هاتینە وێرانكرن و هەرفاندن،هیڤیدارن ئێدی بلا ئەو ئەرەبێن جیرانێن نە دۆست نەئێنە دەڤەرێن مە،چنكو وان خیانەتەكا مەزن دگەل مە كر و بوونە ئەگەرەكا سەرەكی یا كارەساتێ.
هەروەسا ئاوارەیێ شنگالێ(شاكر عەبدال)دیاركر،ئەم دخوازن دەڤەرا شنگال ب ئێك هێزا حكوومی بتنێ بێتە پاراستن و برێڤەبرن و ئەو هێز ژی یا دەستووری و یاسایی بت،داكو ئەم جارەكا دی نەبنە قوربانیێن چ كارەساتان و هەتا كو جی و دەڤەرێن مە نەئێنە ئاڤاكرن و قەرەبووكرن ب چ رەنگان ئەم نكارن ڤەگەرینە وارێن خۆ،لەوا ژی ب هەر شێوەیەكی بت ئەم نكارن ڤەگەرن هەتا كو ئەڤ هەموو داخوازێن مە ب كردار نە ئێنە جێبەجێكرن.
ژلایەكی دی ڤە (عەبدولرەحمان سلێمان) مامۆستایەكی خەلكێ شنگالێ یە دبێژت:ڤەگەراندن بۆ شنگالێ ئێدی بوویە خەونا هەر تاكەكی خەلكێ شنگالێ بەلێ ئەو تشتێ كو بوویە رێگر ل هەمبەر ڤەگەریانا پتریا خەلكێ ئەوە كو نە پشتراستن ژ ئارامیا دەڤەرێ و ژ دەستدانا باوەریێ ژ پارت و لایەنێن سیاسی یێن كو ژبۆ بەرژەوەندیێن خۆ یێن سیاسی و ئابووری كەد و خەباتێ دكن،هەروەسا شنگال دەڤەرەكا سنووری یە و هەردەم ژی دمەترسیێ دایە،ئەم داخوازێ ژ هەر هێزەكا ل شنگالێ بت و دەستهەلاتداریا دەڤەرێ بكت كو ئارامیا دەڤەرێ ب گشتی ب پارێزت و ب تایبەتی ژی دەڤەرێن لژێر مەترسیێ دا و دوور ژ سەنتەرێ باژێری وەك كۆمەلگەها گرزەرك و خرابازار و هەموو ناوچەیێن باكوور و باشوورێ شنگالێ،دیسان دخوازن خزمەتكاریێن سەرەكی وەك ئاڤ و كارەبا و ئارامیا رێیان،ژبۆ بازرگانیێ ژی ژبەركو بێی ڤێ چەندێ كەس نكارت ژیانا خۆ برێڤەببەت.
لدۆر ڤەگەریانا ئاواران،سەرۆكێ جڤاتا قەزا شنگالێ(وەیس نایف)گۆت:هندەك پارت و لایەنێن نە دەستووری و نە یاسایی ئەڤ رەوشا هۆسا یا پەریشان یا خەلكێ بوو دەرفەت و بوو ئەگەرێ وێ چەندێ كو هندەك هێزان لژێر دروشمێن ئایینی و عەقیدەیێن خۆ مال و ملكێن خەلكێ دزین و چەندین كارێن خراب ژبال ڤە هاتنە ئەنجام دان و بوونە ئەگەرێ پتر نەخۆشكرنا رەوشێ كو ئەڤ هەموو كریار ل پێش چاڤ و ب پشتەڤانیا حكوومەتا ناڤەند هاتنە كرن و ژبۆ نەكو نەهێلن ئەڤ كریار و لڤلڤینێن وەسا ژبال هێزێن نە دەستووری ڤە بێنە كرن پشتەڤانی و هێز ددانە وان بێی كو ژیانا ئاسایی ڤەگەرتە شنگال و دەوروبەران ب شێوەیەكی گشتی،ئەو بوونە ئەگەرێ نە ڤەگەراندنا خەلكێ شنگالێ بۆ دەڤەرێن خۆ،هەروەسا هەتا ئیرۆ رۆژ خەلكێ ڤەگەریاین شنگال نەبوویە زێدەتر ژ(15%) ئەوژی ب ئەگەرێن مە لسەری دیاركرین و نەبوونا خزمەتكاریان ،دووپاتكر ژی دڤێت شنگال بێتە ئاڤەدانكرن و ڤەگەرتە وەك پێش كارەساتێ دا جارەكا دی ژیان ڤەگەرتە وێدەرێ و ئەڤ چەندە پێتڤی ب ماندیبوونەكا ژ ئاستێن هەرە بلندە ل سەركردایەتیا هەرێمێ و جڤاتا رۆحانی و مالا میران و سەماحەتا بابێ شێخ و خودانێن قوربانیان و ب هەڤكاری پێكئینانا لژنێن تایبەت بۆ دەستپێكرنا كارێ مەیدانی ل ناڤ هەموو ئۆل و نەتەوێن شنگالێ و ژبۆ دادپەروەریێ و دیاركرنا تاوانبەران و رادەستكرنا وان بۆ دادێ و سزاپێدانا وان ژبۆ هەر تشتەكی ل دەرهەقا شەرەف و ناموس و ئاخا شنگالێ دا هاتیە كرن و دەرفەتێ نەدەن كو جارەكا دی بێن و ڤەگەرن جیێن خۆ و ب ئازادی بژین و ڤەگەراندنا هێزێن هەڤپشك بۆ دەڤەرێ و دۆرپێچەكا باش و ب چەكێن گەلەك بهێز ل شنگالێ و دەوروبەران بێتەكرن،دگەل دابینكرنا خزمەتكاریێن سەرەكی ب ئەڤێ چەندێ و ل پاش ڤان هەموو تشتان نوو دڤێت خەلك ڤەگەرت دەڤەرێن خۆ،نهۆ ژی چەندین خزمەتكاری دكێمن وەك ئاڤ و كارەبێ،تەكەزكر كو ئاوارە قەت و قەت ژی نا ڤەگەرن بەری ئەنجام دانا هەلبژارتنێن عێراقێ و پشتی هەلبژارتنان ژی نا ڤەگەرن یان رەوش یا گونجای بت بۆ ڤەگەراندنێ.
تُتاح هذه الصورة أيضا في: کوردی