هۆنەرمەندێن شنگالێ داخوازا پشتەڤانیێ دكن
تۆرا لالش یا راگەهاندنێ/رائد غانم
هۆنەرێ شنگالێ ب قوتابخانەیەكا مەزن یا هۆنەرێ دئێتە دانان،سترانا شنگالێ بوویە ئەگەرێ دكیۆمێنتكرنا گەلەك فەرمانێن بسەرێ كوردێن ئێزدی دا هاتین د درێژاهیا دیرۆكێ دا،ئەڤجا داخوازا هۆنەرمەندان ئەوە پێتڤیە پتر پووتە ب هۆنەر و هۆنەرمەندان بێتە دان و پشتەڤانیا وان بێتە كرن،دووپات دكن ژی كو كەسی خۆ ل وان نەكریە خودان.
لدۆر هۆنەرێ شنگالێ هۆنەرمەندێ گەنجێ ژێهاتی(خەلۆ شنگالی) دیاركر،شنگال و هۆنەرێ وێ ب قوتابخانەیەكا مەزن یا هۆنەری دئێتە دانان و پێتڤی بوو پووتەیەكا پتر پێ بێتە دان،داكو پتر بەرەف پێشڤەچۆ با،سەرەرای ئەو فەرمان و دەردەسەری یێن كو بسەرێ مە هاتین لێ هەرجار هۆنەرێ مە زەنگین تر لێ تێت و هۆنەرمەندێن ژێهاتی تر دەردكەڤن و هۆنەرێ مە سەردەمانە لێ دئێت و نوو دبت ،هۆنەرێ شنگال پووتەیەكا مەزن دبینت ژلایێ هۆنەرمەندا ڤە بەلێ چ پشتەڤانی بۆ وان هۆنەرمەندا نینە و چ هاریكاری و ئاسانكاری بۆ نائێنە كرن،سەرەرای ڤێ چەندێ ژی د بەردەوامن و سترانا شنگالێ و یا كوردی پێش دئێخن ،هیڤی دكن و دخوازم هاریكاریا مە بێتە كرن و پووتە ب مە و هۆنەرێ مە بێتەكرن و جیەكی تایبەت ب هۆنەرمەندا و كارێن هۆنەرێ بێتە چێكرن وەك سەندیكەیەكا تایبەت ب هۆنەرمەندێن شنگالێ ،داكو پتر هۆنەرمەند بەهایێ خۆ ببینت و پتر كار لسەر هەبوونا خۆ یا هۆنەری بكت.
هەروەسا(مەحمود شنگالی)دبێژت:هۆنەرێ شنگال كانیەكا و دهورت و چ جارا هشك نابت و دێ چین بۆ چینێ ڤەگوهێزت،ئەڤ هۆنەرە نەیێ ئیرۆ و دوهی یە ئەڤە بسەدان سالان هەیە و بەردەوام یێ دگەشەكرنێدایە و پتر گەش دبت سال بۆ سالێ،سترانا شنگالێ ب هەموو بابەتان ڤە یا گرێدایە چ بابەتێن ئەڤینیێ یان ژی یێن جەنگ و شەرا یان ژی یێن مەدحێ و مێرانیێ و ..هتد،سترانا شنگالێ بوویە ئەگەرێ دكیۆمێنتكرنا گەلەك فەرمانا و ب ئەگەرێ وێ سترانێ ئەڤە فەرمانە دئێنە بەرچاڤ و نەهاتنە ژبیركرن وەك سترانا غەزالێ كو فەرمانا حافد باشا تێدا دیار دبت،هەروەسا ل گەلەك سترانان دا ناڤێ میرێ كویر هاتیە و ئەڤ سترانە وەك دكیۆمیێنتكرنەكێ دئێتە دانان بۆ وان فەرمانا،دیسان گەلەك چیرۆكێن ئەڤینیێ ئانینە زمان وەك خەنسێ و رەشۆ و عەدول و گێنج خەلیل و .. هتد،هەروەسا سترانێن وەك ئێزدی میرزا و سەیدخانێ كەر بەسێ مێرانیێ دكن و گەلەك بابەتێن دی ژی یێن هەین كو ل سترانا شنگالێ دا دئێنە دیاركرن، ئاماژە ب وێ چەندێ دا كو پێتڤیە پتر گرنگی ب هۆنەر و هۆنەرمەندێن شنگالێ بێتە دان و پشتەڤانیا وان بێتە كرن،داخواز دكەین كەنالەكی تەلەڤزیۆنی بۆ شنگالێ بێتە دروستكرن داكو هۆنەرێ شنگالێ پتر بێتە بەرچاڤ و جیهان هەموو ببینت.
هەر سەبارەت هۆنەرێ شنگالێ دڤێ قۆناغێ دا هۆنەرمەند(هاڤین شنگالی)خویاكر،هەر چ بۆ هۆنەرێ شنگالێ بێتە كرن یێ كێمە بەلێ چ تشت بۆ نەهاتیە كرن و كەس خۆ ل هۆنەر و هۆنەرمەندێن شنگال نەكریە خودان ژبلی هندەك كەنالێن كوردی نەبن و ئەوژی ب شێوەیەكی كێم،لێ هەر چەندە هۆنەرێ مە یێ زەنگینە ب پەیڤێن خۆ و بنچینەیا خۆ یا هۆنەری و داخواز دكەین هاریكاری و پشتەڤانیا هۆنەر و هۆنەرمەندێن شنگالێ بێتە كرن و پێتڤی بوو سترانا شنگالێ هاتبا پاراستن ب شێوێ پەرتۆكا هاتبا دروستكرن و هاتبانە بەلاڤكرن،ژبەركو مە چ تەلەڤزیۆن و دەزگەهێن بەلاڤكرنێ نینن.
ژبال خۆڤە هۆنەرمەند(شەكر خودێدا)گۆت:هەردەم ئەم وەك هۆنەرمەندێن شنگال دخوازن بەرەف پێشڤە بچن،لێ مە چ پشتەڤانی نینە و گەلەك هۆنەرمەندێن مە شیان نینن سترانێن خۆ تۆماربكن،ژبەر نەبوونا هاریكاری و پشتەڤانیێ و ئەم ژ هەژی پووتەیەكا مەزنترن و دخوازن ئەم مافێ خۆ ببینن،داكو پتر خزمەتێ بكن و جڤاكا خۆ گەش بكن و هۆنەرێ خۆ بەردەوام بكن.
تُتاح هذه الصورة أيضا في: کوردی