كەسایەتی و رەوشەنبیر دخوازن بنگەهێ لالش بۆ دەزگەهێ لالش بێتە گوهارتن
تۆرا لالش یا راگەهاندنێ/بەختیار قادر
ب هەلكەفتا سالڤەگەرا دامەزراندنا بنگەهێ لالش یێ رەوشەنبیری و كۆمەلایەتی ل دهۆكێ كو دكەفتە(12/5/2018)،كەسایەتیی و رەوشەنبیر ئاماژێ ب وێ چەندێ ددەن كو بنگەهی خۆ ب خودانێ ئێزدیا دناسی و هەتا نهۆ كەسێ دی ژبلی وی خۆ ب ئێزدیان خودان نەناسیە،پێشنیار دكن و دخوازن دكۆنگرێ بێت دا ناڤی وی بۆ دەزگەهێ لالش بێتە گوهارتن.
(حەسەن قەوال رەشید)رەوشەنبیرەكی ئێزدی یە ل ئەلمانیا دیاركر،ب هەلكەفتا بۆرینا(25) سالان بسەر دامەزراندنا دەستەیا بلندا بنگەهێ لالش یێ رەوشەنبیری و كۆمەلایەتی،پیرۆزباهیێ ل سەرۆك و هەموو ئەندامێن بنگەهی دكەم،كو رۆلەكی كارا دبەلاڤكرنا رەوشەنبیریا ئێزدیان ل كوردستانێ و رەوشەنبیریا پێكڤەژیانا ئاشتیانە دناڤبەرا تەڤایا پێكهاتێن كوردستانێ دا هەبوو، بنگەهی خۆ ب خودانێ ئێزدیا دناسی و هەتا نهۆ كەسێ دی ژبلی وی خۆ ب ئێزدیان خودان نەناسیە،هەروەسا سەلماند كو نوونەراتیا هەموو ئێزدیان دكت و بنگەهی و شەخصێ شێخ شامۆ رۆلەكی كارا هەبوو بۆ ڤەكرنا دەرگەهێ بنگەهی بۆ ئاوارەیان دەمێ ئێزدی تووشی هێرشا داعشێ بووین و رۆلەكی مەزن هەبوو بۆ هاندانا سەركردایەتیا كوردستانێ بۆ رزگاركرنا دەڤەرێن ئێزدیان،دیسان لدۆر رۆلێ بنگەهێ لالش ئەلمانیا چەندین چالاكیێن رەوشەنبیری چ یێن زانستی یان رەوشەنبیری یان ئایینی ئەنجام داینە و هاریكاربوویە بۆ ساخكرنا جەژن و هەلكەفتێن ئایینی و بەلاڤكرنا رەوشەنبیریا هوشیاركرنێ دناڤبەرا ئێزدیان دا ب رێیا پێشكێشكرنا سمینارێن ئایینی و رەوشەنبیری و ئەنجام دانا خۆلێن فێركرنا زمانێ دەیكێ بۆ زارۆكان و فێركرنا مەزنان بۆ زمانێ ئەلمانی،زێدەباری چەند كار و چالاكیێن دیتر یێن پێ رابووین.
كەسایەتیێ ئێزدی(سەعید جردۆ) خویاكر،پشتی بۆرینا بیست وپێنج سالان ئەو نەماما دلسۆزێن ئێزدیاتی وكوردایەتی چاندی بوویە دارەكا چەقدایی وبەرهەمدار ئاشقێن كەلتۆرێ باب وباپیرا،لژێر سیبەرا وێ هەست ب تەناهیێ دكن وئاشقێن زانست وزانینێ ب بەرهەمێن وێ نڤیسین وڤەكۆلینێن خۆ دەولەمەندتر دكن،شانازم كو رۆژەكێ من خزمەتا وێ دارێ كریە و شانازم كو قوتابیێ لالشم.
رۆژنامەڤان(شەهلا رێكانی)دیاركر،جارێ(25)سالیا دامەزراندنا دەستەیا بلندا یا بنگەهێ لالش ل هەموو ستافێ بنگەهی و ئێزدیان پیرۆز بت،هەلبەت بنگەهێ لالش هەر ژ دەستپێكا دامەزراندنا خۆ تا نهۆ خزمەتەك باش بۆ جڤاكێ كوردی ب گشتی پێشكێش كریە و ب تایبەتی بۆ جڤاكێ ئێزدی ڤەكرن و بەردەوامیا وی تا نهۆ پێنگاڤەكا هەرە باش بوویە بۆ كوردێن ئێزدی،ژبەركو خزمەتا جڤاكێ ئێزدی كریە ژ هەموو لایان ڤە وەك رەوشەنبیری و جڤاكی و نەتەوەیی،بێگومان كوردێن ئێزدی خۆ دڤی بنگەهی دا دیتیە ژبەركو بنگەهەك بوویە گرنگی ب هەموو چینێن جڤاكی دایە بێ جێوازی، هەروەسا خۆ ل ئێزدیا كریە خودان و دكارم بێژم د دەما هاتنا داعشا دا رۆلەكی ئێكجار باش بنگەهی هەبوو و خۆ ل خەلكێ شنگال و دەردۆرا كریە خودان، هەروەسا د هەموو هەلكەفتەكێ ژی دا رۆلێ خو دیتیە ئەڤجا چ هەلكەفتێن نەتەوەیی بن یان یێن ئۆلی یان گرێدایی داب و نەریتێن وان بن.
سەرۆكێ ئنستتیۆتا دهۆك بۆ رەو شەنبیریا گشتی(عەبدولعەزیز موحسن بارزانی)گۆت:سالڤەگەرا بنگەهێ لالش یێ رەوشەنبیری و كۆمەلایەتی پیرۆز دكەم و خۆ ب ئێك ژ ئەندامێ ڤی بنگەهی دزانم و كار وخەباتا وی بلند دنرخینم كو(25)سالێن ئەڤرازی و نشێڤیێت ڤی بنگەهی بۆ من جیێ رێزەكا ئێكجار مەزنە،كو بەری(25)سالا هاتیە دامەزراندن بۆ كاروبارێن رەوشەنبیری و جڤاكی یێن كوردێن ئێزدی،لێ چاڤێ زەردەشتیا و كاكەییا و یاسا و كوردێ بوسلمان لسەر هەیە،چنكو كار و خەبات و نڤیسینگەهێن وی و گۆڤار و رۆژنامە و پەرتۆك و ڤیستەڤال و كارێ ئیداری یێ ڤی بنگەهی یێ وەلێكری كو ئێدی هەموو تەخ و چینێن دی یێن جڤاكی دۆرماندۆر كۆمڤەبن و خۆ ب ئەندام فەخری بزانن،نەخاسمە ئەو ڤیستەڤالا سالانە یا بناڤێ بنگەهێ لالش دهاتە ئەنجام دان كو خەلكێ هەر چار پارچێن كوردستانێ ئەرمینیا و ئێكەتیا سۆفیەتا بەرێ وئێزدیێن ل ناڤخۆیا كوردستانێ و دەرڤەی كوردستانێ ل وێدەرێ كۆمدبوون و هەموو ئەكادیمی و نڤیسكار و رەوشەنبیرو خەلكێ جودا جودا دبوو جیێ خرڤەبوونا وان هەموو هزرمەند و ئاقلمەندا بوو چاوا هزر دپێشڤەچۆنا روویێ رەوشەنبیری و جڤاكی یێ كورد و كوردستانێ دا بكن ئەو سەرفەرازیە بۆ بنگەهی دزڤرتە ڤە، ژروویەكی دی ڤە دڤان سالان دا رۆژ بۆ رۆژێ پێشڤەچۆنێن ئێكجار مەزن دڤی بنگەهی دا یێن چێبووین سەرەرای ڤێ داویێ ئەو قەیرانا دارایی پەیدابووی لێ خەبات و خزمەتێن وی نە سەكنینە،لەوما ناڤەكی مەزن لسەرە و پێشنیار دكەم دەمێ كۆنگرێ بنگەهی بێتە ئەنجام دان ئێدی ناڤێ وی بێتە گوهارتن و ببتە دەزگەهێ لالش یێ رەوشەنبیری و كۆمەلایەتی،چنكو ب راستی ناڤێ وی یێ بچووكە و كارێ وی یێ مەزنە ،ژبەر دڤێت ببتە دەزگەه و كارێ وی ژی یێ دەزگەهی یە ئیدارەكا سەركەفتی هەیە و تایێن جودا جودا ل كوردستانێ و ئەورۆپا ول دەڤەرێن مادێ (140) هەنە،ئێدی حكومەت و پەرلەمانێ كوردستانێ پێویستی ب شیانێن كادرێن لالش هەبن كو ل بنگەهێ لالش دەستپێكێ بكن بەرەف كارێن دی یێن سیاسی و ئیداری و رەوشەنبیری كو ژ دەرڤەی بازنا بنگەهی خزمەتا جڤاكی ب رەنگەكی گشتی ژدەرڤەی بازنا خزمەتكرنا كوردێن ئێزدی،بەلكو هەموو كوردستانیا پێكڤە بكت ئەڤە ژی جیێ شانازیەكا ئێكجار مەزنە بۆ مە.
گرنگیپێدەرێ كاروبارێن ئێزدیان(زێدۆ باعەدری) دبێژت:پەیڤا دەزگەه یا هەژی بنگەهێ لالشە،چنكو قۆناغا بنگەهی یا تێپەراندی و یا دی چ كەسەكی بڤێت تشتەكی سەر ئێزدیا بنڤیست دڤێت قەستا بنگەهی بكت و بنگەهی گەلەك هیڤیێن مەزن هەبوون و ئەو تشتەنە وەك بنەمایەكە بۆ ئێزدیاتیێ ژوان ئالیێ رەوشەنبیری و جڤاكی،ئەز دبینم بنگەهێ لالش یان دەزگەهێ لالش ببتە ئنستتیوتەكا تایبەت ب ئێزدیاتیێ ڤە لگەل زانكۆیا دهۆكێ،هەروەسا ژ ئالیێ جڤاكی ڤە رۆلەكی مەزن دچەسپاندنا مافێن ئێزدیان دا ل كوردستانێ هەبوویە.
تُتاح هذه الصورة أيضا في: کوردی