یوبیلا زیڤی یا دامەزراندنا بنگەهێ لالش هاتە ساخكرن
شێخ شامۆ:هەبوونا بنگەهێ لالش پێویستیەكا دیرۆكی بوو دناڤ تایبەتمەندیا ئێزدیان دا
تۆرا لالش یا راگەهاندنێ/دهۆك
دوهی رۆژا پێنج شەمبوویێ 10ی ئەیارا 2018ل هۆلا بنگەهێ لالش،درێورەسمەكێ دا(25)سالیا دامەزراندنا بنگەهێ لالش یێ رەوشەنبیری و كۆمەلایەتی ب چەند پەنەلان هاتە ساخكرن،ب ئامادەبوونا بەرپرسێن حكومی و حزبی و كەسایەیی و رەوشەنبیر و مامۆستایان و ئەندامێن بنگەهی.
ل بەراهیێ پەیڤا بخێر هاتنێ ژبال”جەعفەر سمۆ” بەرپرسێ راگەهاندنا بنگەهێ لالش ڤە هات خووندن،پاش وەك رێزگرتن بۆ گیانێ پاكێ جانگۆریێن كوردستانێ ئامادەبووی خۆلەكەكێ سەكنین لگەل سرودا ئەی رەقیب.
پاشی كورتە فلمەك لدۆر دەستپێكا دامەزراندنا بنگەهێ لالش یێ رەوشەنبیری و كۆمەلایەتی ب رێیا داتاشۆیی هاتە نمایشكرن.
لدووڤ دا بەرێز”شێخ شامۆ”سەرۆكێ دەستەیا بلندا بنگەهێ لالش پەیڤەك پێشكێشكر و دیاركر:”بۆرینا (25) سالا لسەر دامەزراندنا بنگەهێ لالش بیرهاتنەكا گەلەكا گەشە دوژدانێ هەر كەسانەكی دا بزانە قیمەتێ ڤی بنگەهی چەندە،سوپاس بۆ خودێ تەمەنێ ڤی بنگەهی (25)سال دەربازكرن و بەرەف یوبیلا زیڤی ڤە چۆ،راستە گەلەك گرێ و ئاستەنگ و پیلان هاتنە پێشیا ڤی بنگەهی لێ ب هیمەتا وان دەستەكێن رێڤەبەر نەهێلانا كاروانێ خەباتا بنگەهێ لالش بسەكنە،لەوما ئیرۆ مینا دەزگایەكی رەوشەنبیری و جڤاكی و نەتەوی تایبەتمەند ب ژیانا ئێزدیا تێتە ناسكرن دبوارێن رەوشەنبیری و جڤاكی و ئۆلی و نەتەوی دا،هەر بوارەكی بەحس بكەین ئەڤی بنگەهی جیێ خۆ چێكریە و ئی ناسكریە لسەر ئاستێ كوردستانێ دناڤ دام و دەزگایێن دیتر چ ل خورتكرنا پێكڤەژیانێ چ ل مەدەنیكرنا جڤاكی و دیموكراسیكرنا جڤاكی و چ ل پاراستنا كلتۆرێ كەڤنێ باب و كالا و چ ل زەلالكرن و زانستیكرنا بیروباوەر و فەلسەفا ئێزدیناسیێ،پێویستیەكا دیرۆكی بوو هەبوونا ڤی بنگەهی پشتی (25)سالا و كارو خەباتا بنگەهێ لالش دناڤ تایبەتمەندیا ئێزدیان دا،دبوارێ ئایینی بەردەوام بنگەهێ لالش زمانەكی زانستی یێ گەهاندنا راستیا فلسەفا ئێزدیا بۆ هەر مێڤانەكی بپرسە ،دبوارێ رەوشەنبیری دا جیێ خۆ ل مەیدانا رەوشەنبیری جیەكی لایق گرتیە و پەیوەندیێن بنگەهێ لالش لسەر ئاستێ كوردستانێ ل مەحفەلا ل رێزا پێشیێ جیێ بنگەهێ لالشە و سەر ئاستێ جیهانی ژی كێم هەنە شاندێن دنیایێ ئەوێن قەستا كوردستانێ دكن بنگەهێ لالش نەبینن و پرسیارا رەوش و ئۆل و هەبوونا و دیرۆكا ئێزدیا نەكن ب زمانەكی زانستی یێ راست و دروست بنگەهێ لالش ب ئەمانەت پەیاما ئێزدیا دگەهینن”.
دلایەكی دی دا شێخی گۆت:”جیێ مخابنیێ یە سەرەدەریكرن دگەل ڤان چار سالێن دەربازبووی كێم سێ هەیڤا نەكارەكی ئاسان بوو و نەیا چاڤەرێكری بوو ئەو فەرمانا بسەرێ ئێزدیا هاتی لڤی چەرخێ بیست و ئێكێ بنگەهێ لالش ژی بەشەكە ژ جڤاكێ خۆ كەفتە بەر ڤێ فەرمانێ چار بنگەه و (19)نڤیسینگەهێن بنگەهێ لالش كەفتنە بەر جینۆسایدا شنگال و باشیك و بەحزانێ و گەل خەلكێ خۆ جینۆساید و ئاوارە و شەهید و دەربەدەر بوون،لەوما پتر پلانا بنگەهێ لالش مە ب ئەركێ خۆ زانی بكەڤە دخزمەتا ڤی خەلكێ ئاوارە و پەریشانیا شنگال و دەڤەرێن دیتر و هەموو بنگەه و نڤیسینگەه و كادر و لایەنگەرێن مە سەر ئاستێ كەمپا و كۆمەلگەها و سەر ئاستێ سەرانسەر ژ نێزیك ڤە بوونە خزمەتكارێ ئێش و ژانێن ڤی خەلكێ لێقەومیایی،پرانیا وان ئێش و ژانێن ڤی خەلكی ڤی بنگەهی دكیۆمێنتكرن ژ سەنتەرێن تایبەتمەندێن لێكۆلێنێ را،دیسا بوو زمانەكی زانستی یێ گەهاندنا پەیاما وێ دربا دژوارا ب ئێزدیا كەفتی و بۆ هەر قۆناغ و بیرهاتنەكێ ژی چ نەتەوی و ئایینی بە بنگەهێ لالش ل رێزا پێشیێ ئەركێ خۆ زانیە وان بیرهاتنا ب شێوازەكی زانستی ساخ بكت،گەلەك جارا ئەم نەچار دبن ژ پەیرەو و پرۆگرامێ خۆ دەردكەڤن ژبۆنا هەلگرتنا دەرد و داخوازیێن خەلكێ خۆ و گەهاندنا وان بۆ دەزگەهێن شۆلەژێ”.
دبەردەوامیا پەیڤا خۆ دا سەرۆكێ بنگەهێ لالش دیاركر:”بەختەكی باش بوو بیرهاتنا بۆرینا(25) سالا سەر هەبوونا ڤی بنگەهی هەڤ دەم هات لگەل پرۆسێسەكا چارەنڤیساز یا نشتیمانی یا گرنگ و گرێدایی چارەنڤیسێ هەموو كوردستانێ ب گشتی و ئێزدیا ب تایبەتی،ئەم گەهشتینە وێ باوەریێ مالا ئێزدیخانێ دهندرۆیێ كوردستانێ دا لسەر پێنج ستوونا تێ راگرتن و ئاڤاكرن،كو كوردستان بخۆیە و مە بەدیلێ كوردستانێ نینە چنكو هەبوونا مە و ئایین و زمانێ مە و زمانێ ئایین و دیرۆكا مە و هەر تشتێ مە گرێدایی كوردستانێ یە و دهەموو ئالیان ڤە عێراق هەول دەت ماف و ئازادیا مە داعورینە و كوردستان هەول دەت ماف و ئازادیا مە دابین بكە،مە بەدیلێ سەرۆك بارزانی نینە و ئەڤە چار سال كێم سێ هەیڤن بارەگایێ وی ل رۆژئاڤایێ دیجلە و یێ دەركەفتی سەرێ چیایێ شنگالێ و پست راستكرنا ئێزدیا راگەهاندی و حەیفا ئێزدیا ل ئەردێ نەهێلای و شنگال بخوونا پێشمەرگەی ئازادكری سەرۆك بارزانی یە،ئەم گەهشتنە وێ باوەرێ د دیرۆكێ دا نە سەرۆكەكی ژبۆنا ئێزدیا شەركریە و نەخوون رژاندیە و نە لێ خوەیی دەركەفتیە ژبلی سەرۆك بارزانی،حكومەتا هەرێما كوردستانێ مە بەدیلێ وێ نینە و بنگەهێ لالش هلگرێ دۆسا قوتابیایە و د (12) سالان دا(12)هەزار قوتابی ژ زانكۆ وپەیمانگەهێن مووسل ڤەگوهاستینە زانكۆ و پەیمانگەهێن كوردستانێ ب پشتەڤانیا سەرۆك بارزانی و سەرۆكێ حكومەتا هەرێمێ ،مە بەدیلێ پێشمەرگەی ژی نینە و رۆنیا چاڤێ مە پێشمەرگەیە و یێ خوون رژاندی ژبۆ ئازادكرنا دەڤەرێن مە پێشمەرگەیە”. دپەنەلەكی دی دا شەمال هاتن هەلكرن و كێكا سالڤەگەرا دامەزراندنا بنگەهێ لالش ژلایێ ئامادەبوویان ڤە هات شكاندن.
پاش بەرێز”قادر قاچاخ”بەرپرسێ لقێ 17 یێ پارتی دیموكراتی كوردستان سوپاسنامەك پێشكێشی بنگەهێ لالش كر و سوپاسیا وێ پشتەڤانی و هەماهەنگیا تەماما دناڤبەرا بنگەهێ لالش و لقا پارتی ل سنوورێ شنگال دا دكت.
ب پشتەڤانیا رێزدار”نێچیرڤان بارزانی”سەرۆكێ حكومەتا هەرێما كوردستانێ بنگەهێ لالش یێ رەوشەنبیری و كۆمەلایەتی ل رۆژا(12/5/1993)لسەر دەستێ كۆمەكا رەوشەنبیرێن ئێزدیان هات دامەزراندن و ب فەرمی هاتە ڤەكرن و ئەڤە(25)سال بسەر دامەزراندنا وی دا دەربازبوون و لسەر كەد و خەباتا خۆ بەردەوامە بۆ خزمەتكرنا جڤاكێ كوردستانێ ب گشتی و یێ ئێزدیان ب تایبەتی.
تُتاح هذه الصورة أيضا في: کوردی