ئاوارێن شنگالێ داخوازا دابینكرنا ترومبێلێن ئاگرڤەمراندنێ بۆ كەمپان دكن
تۆرا لالش یا راگەهاندنێ 
پشتی زێدەبوونا روودانێن ئاگركەفتنێ ب خیڤەتێن ئاوارێن شنگالێ ل كەمپان دا ل سنوورێ پارێزگەها دهۆكێ،ئاوارە داخوازا دابینكرنا ترومبێلێن ئاگرڤەمراندنێ بۆ كەمپان دكن یان رێ بێتە دان ل جیێ خیڤەتێن خۆ خانیان چێكن.
دڤی واری دا(خالد خێرۆ)ئاوارەیەكی شنگالێ یە بۆ دەنگێ لالش دیاركر،مەترسیێن زۆر لسەر ئاواران و كەسێن كو دناڤ خیڤەتان دژین هەیە،ژبەركو سەقا یێ گەرم دبت و پشتی زێدەبوونا روودانێن ئاگركەفتنێ ب چەند خیڤەتان ل كەمپێن ئاوارێن شنگالێ كو ژئەگەرێ شۆرتێ كارەبێ سۆتینە و زیانێن گیانی و مادی یێن زۆر ل پشت خۆ هێلاین،ل دەمێ خیڤەتەك تێتە سۆتن یان روودانەكا ئاگری چێ دبت ئەم دبینن ترومبێلێن ئاگرڤەمراندنێ درەنگ دگەهنە جیێ روودانێ،لەوا هیڤیدارن و داخواز دكەین ل هەر كەمپەكێ ترومبێلەكا ئاگرڤەمراندنێ بێتە دابینكرن دا ب زووترین وەخت ئەو روودان بێتە كۆنترلكرن و زیان ب خەلكێ نەكەڤن.
رێڤەبەرێ كەمپا بێرسڤێ 2 (ماهر مشۆ چۆلی) بۆ دەنگێ لالش ئاشكەراكر،هەر ژ پێشیا هاتنا ئاواران بۆ ناڤ كەمپان سۆتنا خیڤەتان ئاریشا وان بوویە و هەردەم ژی وەكو كارگێریا كەمپێ داخواز ژ جیێن كاربەدەست كریە،وەكو پێ چێبوونا خۆ مە پشتەڤانی ل داخوازیێن خەلكێ كەمپێ كریە نهۆ ئیمزا و ناڤێن كەسایەتی و موختارێن كەرتێن ناڤ كەمپێ كۆمكرینە و دێ پێشكێشی هەرێمداریا زاخۆ كن چارەیەكێ ببینن كو رێ ب ئاواران بێتە دان ب بلۆكان ل جیێ خیڤەتێن خۆ خانیان بۆ خۆ چێكن و پتر هاریكاریا وان بێتە كرن،سەبارەت دابینكرنا ترۆمبێلا ئاگرڤەمراندنێ گەلەك جاران داخواز ژ رێكخراو و حكومەتێ كریە لێ بمخابنی ڤە وەكو دیار حكومەتا هەرێمێ د قەیرانێ دا دبۆرت،ژئالیێ دی ڤە رێكخراوان رۆلێ خۆ نەدیتیە و هیچ بەرسڤەك ژبال هیچ جیەكی ڤە نە گەهشتیە مە بۆ ڤێ چەندێ.
تُتاح هذه الصورة أيضا في: کوردی