كچەكا رزگاربووی ئێش و ئازارێن ئێزدیان ب وێنەیان نیشا جیهانێ ددەت
تۆرا لالش یا راگەهاندنێ
كچا رزگاربوویا ئێزدی(سوهەیلا دەخیل) خەلكا قەزا شنگالێ یە بەحسێ كارێن هۆڤانەیێن داعش دكت، پشتی ژ دەستێ تیرۆرستێن داعشێ هاتیە رزگاركرن دەست ب كارێ نێگاركێشیێ كریە و ئەو ئێش و ئازارێن دیتین ب رێیا وێنەكێشانێ نیشا خەلكێ دكت،داكو هەموو جیهان بزانت چ بسەرێ ئێزدیان هاتیە،داخوازێ ژ رێكخراوێن خێرخوازی دكت هاریكاریا وێ بكن.
لدۆر چیرۆكا خۆ كچا رزگاربوویا ئێزدی(سوهەیلا دەخیل)بۆ دەنگێ لالش دیاركر، ل رۆژا(3/8/2014)ێ ل لۆفێن چیایێ شنگالێ نۆزدە كەس ژ بنەمالا مە كەفتنە دەستێ تێرۆرستێن داعشێ و ئەز ئێك ژ وان بووم،پشتی ژلایێ داعشێ ڤە هاتینە گرتن ئەم ڤەگوهاستینە ناڤ سەنتەرێ شنگالێ و زیندانكرین،هەر ل شنگالێ دا ئەم ژێك جودا كرین باب و برایێن من برنە جیەكی و ئەز و خوشكێن من برینە قەزا بەعاج بتنێ دەیك و خوشكەكا من یا كچەك هێلان ل شنگالێ،پاش ئەز و خوشكێن خۆ ژ بەعاج ڤەگوهاستینە زیندانا بادوش ل مووسلێ و ژ بادوش برینە ناڤ قوتابخانەكێ ل قەزا تلەعفەر و پاشی برینە مووسلێ و پتر ژ سێ هەیڤان ل وێدەرێ ماین،پشتی هنگی جارەكا دی ئیناینە تلەعفەر ل با دەیكا خۆ و نێزیكی( 9) هەیڤان ل گەلێك دا بووین، پاش تیرۆرستەكی داعش هات و ئەز ژ دەیكا خۆ ڤەقەتاندم و جارەكا دی برمە مووسلێ و سێ سالا ل باژێرێ مووسڵ مام لبن دەستێ داعشێَ دا و هەموو كارێن هۆڤانا لگەل من ئەنجام دان و نە دهێلان ژ بارەگایێ وان دەركەڤم و گەلەك جارا ئەشكەنجە ددام و ناڤێ دەیك و بابێن من لسەر دەستێ من د نڤیسی بوون داعشێ ب فلاشێ تەوالێتا ژێبرن،خوارن ژی ل وێدەرێ نەبوو هەڤیر و ئاڤ ل ناڤ هەڤ دكرن و مە دخوارن.
دەربارەی كریارێن داعش ئاشكەراكر،تیرۆرستێن داعش زارۆكێن ژ تەمەنێ(10)سالی و سەردا دكوشتن و زارۆكێن بەر سینگێ دەیكا دبرن وی دەمێ هاوارا دەیكا و زارۆكان د گەهشتە بەر ئاسمانا،لێ تشتێ هەری ب زەحمەت ب چاڤێن خۆ دیتی ئەو بوو دەما مووسل ژلایێ فرۆكێن هەڤپەیمانان ڤە دهاتە بۆردومانكرن نێزیكترین هەڤالا وێ بناڤێ(نەسرین ئەلیاس) ژ ئەگەرێ وێ بۆردومانێ ل مووسل گیانێ خۆ ژ دەست دا و ل پێش چاڤێن وێ تەرمێ هەڤالا وێ برن و هەتا نهۆ ژی نزانن بەرەف كوڤە برینە.
هەروەسا ڤێ كچێ خویاكر،پشتی ژ دەستێ داعشێ رزگاربوویم من دەست ب كارێ نێگاركێشیێ كر و ئەو ئێش و ئازارێن كو ل دەستێ تیرۆرستان دا دیتین ب رێیا وێنەكێشانێ نیشا خەلكێ دكت،مەرەما سەرەكی ژێ ئەوە هەموو جیهان بزانت چ بسەرێ ئێزدیان هاتیە،لەوا داخواز دكەم رێكخراوێن خێرخواز هاریكاریا وێ بكن،داكو لسەر كارێ خۆ بەردەوام بم.
ژبال خۆڤە(خالد تەعلو) مامێ سوهەیلایێ یە بۆ دەنگێ لالش گۆت:بەری هاتنە داعش سوهەیلایێ ژیانا خۆ ب خۆشی دناڤ كەس و كارێن خۆ دا درباز دكر،پشتی كەفتیە دەستێ داعش گەلەك جۆرێن نەخۆشیان دیتن،هەموو گاڤا مژوولی دروستكرنا وێنەیایە و وان ئێش وئازارا ب رێیا نیگاركێشیێ نیشان ددەت و پشكداری چەندین خۆلێن فێركرنێ بوویە وەك كۆمپیۆتەر و نیگاركێشیێ و خووندنێ و هتد.
تُتاح هذه الصورة أيضا في: کوردی