بایێ سۆر
كورتە چیرۆك
مەروان گاباری
_ ئەز و سێ هەڤال دگەل ئێك بووین دەستپێكا بەهارێ بوو شەڤەكێ ئەم لێك دروونشتی بوون من گەلەك هەست ب نەخۆشیان دكر ، من گۆتە هەڤالێن خۆ ئەز دێ چم نڤم ،گەلەك یا نەخۆشم.
_دەمێ ئەز ب رێ ڤە دچۆمە مال نێزیكی دەمژمێر(9)ی شەڤێ بوو من هەست ب ترسكا مەزن دكر و من هزر دكر هندەك هۆڤ كەفتنە ناڤ گوندێ مەدا ئەز بلەز گەهشتمە مال و من گۆت دێ نڤم.
_شەڤەكا گەلەك یا درێژ بوو دەم نەدبۆری جارەكێ وها ژ نشكەكێڤە چاڤێن من چۆنە سەر ئێك و ئەز نڤستم من دخەودا دیت ، بایەكی گەلەك یێ سۆر دهات چ جاران من هەوا ب وی رەنگی نەدیت بوو من گوه ل چ كەسان نەببوو كو گۆتبن جارەكێ هەوا بڤی رەنگی بوویە،دوێ خەونا گران دا من دیت هندەك دهاتن سەروبەرێن وان وەكو یێن مرۆڤان بوون لێ د راستی دا رەفتارێن وان نەیێن مرۆڤان بوون، خەلك هەموو ژ وان درەڤیان و گەلەك خەلك ژ وان د دترسیان (دگۆتنە وان تیرۆرست یان داعش)،دوێ خەونێ دا من دیت دوو ژ وان هۆڤان هاتنە دەرێ مالا مە و ئەز و چار هەڤالێن من ل باشوورێ چیایێ شنگالێ ئێخسیركرن دەمێ ئەز ژ وێ خەونێ هشیاربوویم من كرە هاوار.
_هەڤالێن من و جینارێن مە وێ نیڤا شەڤێ بلەز هاتنە مالا مە و گۆتن ئەڤ چ چێبوویە خێرە ( بێریڤان) تە خێرە ئەڤ چ هاوار بوو ب راستی ژی هەڤالێن من ژی گەلەك دترسیان،لێ من نەدڤیا ئەو خەونا من دیتی ژ وان را بێژم من گۆتی چ نینە ئەز د خەودا ترسیام هەڤالنۆ،لێ هەر وان ژ من باور نەدكر و دزانین كو تشتەك ل پشت ڤێ هاوارا من دا هەیە.
_ دەم دبۆری و هەر ئەو خەون یا ل بیرا من بوو نێزیكی هەیڤا حوزەیرانێ دبوو جارەكێ گوهێ من یێ ل تلەڤزیۆنێ بوو ئەو ناڤێ ل وێ خەونا ب ترس دا من گوه لێ بوو،دیسا دەنگێ وی ناڤی هاتە گوهـێ من و من دیت بێژەرێ دەنگ و باسا دبێژت باژێرێ (مووسل) كەفتە دەستێ داعش و ترس گەلەك ل نك من پەیدابوو و من ژ ترسێ پتر هەست ب ترسێ كر.
_ پشتی دەربازبوونا نێزیكی پێنج هەیڤان لسەر وێ خەونا نەخۆش دا من هەر هزرا وێ شەڤێ دكر و گەلەك كوور هزر دكر و من دگۆت ئەو بایێ سۆر نەیێ بێ رامان بوو،ئەز گەلەك دترسیام ل هێڤارا(3/8/2014)ێ نێزیكی دەمژمێر دووی پشتی نیڤا شەڤێ بوو دەنگێ هندەك گولەیان ژ ساترێ نێزیكی مالا مە هاتە دلێ من گەلەك بلەز لێددا و ترس ل نك من پەیدادبوو و دەنگێ گولەیان زێدەتر دبوو.
_ وێ نیڤا شەڤێ بابێ من ژبەر ساتری بلەز هاتە مال و هندەك گولە برن و بلەز ژ مال دەركەفت بەرەف ساتری چۆ ئەز نەگەهشتمێ بێژمێ چ قەومیە من دیت خەلكێ گوندێ مە هەموو دەركەفتیە ژ دەرڤە و گەلەك دترسن و دبێژن داعش هات،بوو نێزیكی دەمژمێر(7)ی سبێ هندەك خەلك ژ گوندی درەڤین و بەرەف چیای دچۆن و دگۆتن گوند ب تەمامی هاتە شكاندن نێزیكی دەمژمێر(8) بوو ئەز یا ل بەندا بابێ خۆ بووم و هندەك جینارێن مە بتنێ ل مال دا مابوون من گۆتە وان دێ چما بێژمە بابێ خۆ و ئەم دێ چنە چیایی ئەز چۆم گەهشتمە وی ساتری یێ بابێ من لبەر شەر دكر دەمێ من ساتر دیتی ئەو خەونا بایێ سۆر ل بیرا من دهات و من دیت بابێ من یێ كوشتیە و ئاخ خوونا وی هەمبیز دكت.
_بلەز من بازدا و من كرە غار و بەرەف مالا جینارێن مە چۆم داكو بێژمێ ئەم ژ مال دەركەڤن بابێ من لبەر ساتری جانگۆری بوو،من دیت داعش یێ ل مالا وان دایە و سێ خۆرت ل مالا وان دابوون هەرسێ كوشتبوون و هەر سێ هەڤالێن من یێن كەچ ئیخسیركربوون ئەز ژی ئیخسیركرم.
_رۆژا ئێكێ ئەم ل گوندی دا هێلاین و ل دووڤ دا ئەم بەرەف مووسل برن و چاڤێن مە د گرتی بوون من هەست پێ دكر هەڤالێن من ژی دگەل منن یا ب رەخ من ڤە یا رونشت هەڤالا من بوو ( نادیا ) بوو دەما ئەم گەهشتینە مووسل من گەلەك ئێخسیر و گرتی دیتن هەموو جۆرێن زۆری و زۆداریێ ل دژی مە دهاتە كرن رۆژ ل مە دبوونە سال و رۆژ دەرباس نەدبوون و وژدانێ مرۆڤایەتیێ یێ بێ دەنگ بوو.
تُتاح هذه الصورة أيضا في: کوردی