تۆرا لالـش
دووڤچوونەکا هوور ل سەر داخویانیێن قەهرەمانێ زێندانا ئیمرالی عەبدولا ئۆجەلان دەربارەی پێدڤیا هەبوونا چەکدارێن P.K.Kـێ ل دەڤەرا شنگالێ د ئەڤێ قوناغێ دا وەکو دایە دیارکرن پێخەمەت پاراستنا جڤاکێ ئێزدی، هەر وەکو چەکدارێن پارتیا وی تەڤایا دەڤەرێن باکوری کوردستانێ رزگارکرینە و گەلێ وێ بەر ب ئازادیێ ڤە بریە و حکومەت و سازیێن فەرمی لێ دامەزراندینە و دانوستاندنێ دگەل حکومەتا ترکیا ل گۆر بنەمایێن سیاسەتا برایه‌تیا گەلان کرینە ل سەر چارەنڤیسێ وێ پارچەیا مەزن ژ ئاخا کوردستانێ و دیسان وەکو گەلێ کورد ژ نەهامەتەکا مەزن پاراستینە و سیاسەتا پارتیا وی بوویە چەترەک ژ بۆ ئارامیا تەڤایا گەلێ کورد، لەوا ئەوی ب فەر زانی جڤاکێ ئیزدی و دەڤەرا شنگالێ ژی یا کو پارچەکا گرنگه ژ بەرجەستەیێ کوردستانا ئازاد ب پارێزت.
دیسان ئەگەر ژ شاشیێن سیاسەتا پارتیا وی نەبایە و چەکدارێن وان مایتێکرنەکا خرابکار دناڤ خەلکێ وێ دەڤەرێ دا نەکربا شنگال نەدبوو گۆرەپانەکا بەرفرەهـ ژ بۆ ململانێ یا سیاسی، نەخاسمە پشتی کو هەموو ئالاڤین رێکخۆشکرنێ ژلایێ حکومەتا کوردستانێ ڤە ژ بۆ ڤەگەراندنا خەلکێ وێ هاتنە ئامادەکرن، پشتی کو فەرمان ب سەرێ وان دا هاتی ل سالا ٢٠١٤ـێ و خەلکێ وێ هەموو دەربەدەر و ئاوارەبوویی کوردستانا ئازاد و کەڤتیە دبن چاڤدێریا بەردەوام یا حکومەتا کوردستانێ دا و هاتیە پاراستن.
کو هەر ل ئەوی دەمی ئالیگر و چەكدارێن پارتیا قەهرەمانێ زیندانا ئیمرالیێ رێگری ل ڤەگەراندنا خەلکێ وێ دکر و کێشە و ئاریشە بۆ وان دروست دکرن و رەوشا وان دهاتە تێکدان.
ب راستی ئەڤ جۆرێ داخویانیا جهێ حەیبەتیەکا مەزنە، ب تایبەت کو ژلایێ شێرێ زێندانا ئیمرالی ڤە هاتیە دان، پشتی دوازدە سالێن ئاوارەبوونێ ژ نوی خۆ کریە خودانێ شنگالێ و داخوازا پاراستنا وی خەلکێ دکەت، بێگومان هەر کەسەکی رەوشا سیاسی یا دەڤەرێ ژ نێزیک شۆپاندی باش دزانت داخویانیا وی پێخەمەت تێکدانا رەوشا خەلکێ کوردستانا ئازاد بوویە و بتایبەت ژ بۆ دوژمناتیا پارتی دیموکراتی کوردستان و سەرکردایەتیا وێ یا خۆراگر.
مخابن ژ ئالیەکی ڤە سەرۆکێ PKK یێ زێندانکری عه‌بدلا ئۆجەلان ل ئیمرالی داخوازا ڤیلە و ئاڤاهیێن مەزن دکەت و ژئالیێ دی ڤە داخوازێ ژ چەکدارێن پارتیا خۆ دکەت رێککەڤتنا دگەل ترکیا ئیمزا بکەن و دانوستاندنێ ل سەر دانانا چەکی و چاوانیا خۆ رادستکرنا حکومەتا ترکیا بکەن، دا کو ترکیا بمینیت وەلاتەکی ئارام و کێشە بۆ گەلێ وێ دروستنەبن.
دی هەولدەین ئەگەرێن داخویانیێن سەرۆکێ P.K.K کو د ئەڤێ قووناغا هەستیار دا هاتیە دان ب چەند خالێن گرنگ بدەینە دیارکرن و راستیا ژ بۆ تەڤایا خەلکێ کوردستانێ ب دەینە خویاکرن.
١. ئەگەر ژ هەبوونا چەکدارێن پارتیا وی ل شنگالێ چ بوویە و مەبەستا وی ب ئەڤێ پێنگاڤێ چیە و ئەوان چی بۆ شنگالێ کرینە ژ بلی وێرانکرنا وێ و مایتێکرنا د ناڤ جڤاکؽ وی دا گەلۆ نا شنگال دەڤەرەکا سنووریە دگەل باکوری کوردستانێ کو دبتە گۆرەپانا خەباتا پارتیێن خەباتکەر ل ئەوێ دەڤەرێ.
٢. سەرێ دوازدە سالانە چەکدارێن P.K.Kـێ خەلکێ شنگالؽ د ئیشینن و زۆربەیا وان ب رێکا بابەتێ ئۆلی ب سەردا دبەن و دوبەرییەکا مەزن ئێخستینە دناڤ تەڤایا پێکهاتەیێن وێ یێن جڤاکیدا.
٣. دوازدە سالن پارتیا ئۆجەلانی بازرگانیەکا نە یاسایی و یاریکرنێ ب چارەنڤیسێ خەلکێ شنگالێ دکەت ب مەهانەیا بابەتێ ئێزدیاتیێ و ئۆلی و ددەنە خویاکرن کو ئەو بووینە خودان بۆ جڤاکێ ئێزدی و هەموو ژی پێخەمەت بەرژەوەندیێن خۆ یین سیاسی یێن تایبەت.
٤. کارێ چەکدارێن P.K.Kـێ بۆ خەلکێ شنگالێ کری ئەو بوویە کو ب سەدان کچ و کورێن شنگالی یێن سنێلە ژ هه‌مبێزا دایک و بابان رەڤاندن و زۆربەیا وان ب سەردابرن و هەتا نها ژی گەلەک ژ وان د بێ سەروشوین و وندانە.
٥. پشتی فەرمانا شنگالێ و هەولێن بەردەوام یێن سەرکردایەتیا پارتی ژ بۆ رزگارکرن و ڤەگەراندنا ب هەزاران کچ و ژنێن ئێزدی ژ دەستێ رێکخراوا تیرۆرستی یا داعش و ژ ناچاری ل کەمپا نەورۆز ل وەلاتێ سوریا هاتینە ئاکنجیبوون، چەکدارێن P.K.K ئەو ب سەردابرن و بەر ب بارەگایێن خۆ یێن چیایێ قەندیلی ڤە برن و زۆربەیا وان هاتنە ونداکرن.
٦. پشتی کو ژ ئەگەرێ فرمانێ زۆربەیا خەلکێ شنگالێ دەربەدەر و ئاوارەبوویی، چەکدارێن P.K.Kـێ ئەو چەندە ب دەلیڤەیه‌کا زیرین زانین و ئێکسەر دەست ب سەرداگرتنا زەڤیی و ملک و مالێ خەلکێ کرن و پێخەمەت بەرژەوەندیین خۆ یێن تایبەت ب کارئینان.
٧. چەکدارێن PKK هەولێن بەردەوام ژ بۆ نە ئارامیا تەڤایا دەڤەرێن شنگالێ دکرن، پێخەمەت تێکدانا رەوشا خەلکێ و قایمکرنا هەبوونا هێزین خۆ ل شنگالێ.
٨. پەیداکرنا دوبەره‌کییا ئۆلی و هەڤرکیا جڤاکی دناڤبەرا خەلکێ شنگالێ دا و ژێکڤەقەتاندنا براتیا دناڤبەرا پێکهاتەیێن وێ دا.
٩. ونداکرن و کوشتنا ب دەهان کەسێن بێ گونەهـ ژ خەلکێ شنگالێ ب مەرەما ترساندن و بێدەنگکرنێ و ئارمانج ژێ پەیداکرنا دوبەرکیێ دناڤبەرا پێکهاتە و هۆز و مالباتێن شنگالێ دا.
١٠. هەڤپەیمانی و هەماهنگیا دگەل هێزێن حەشدا شەعبی و لایەنێن سیاسی یێن سەر ب ئیرانێ ڤە پێخەمەت رازیکرنا ئاغایێن خۆ و جێبه‌جێکرنا پلانا کارێ وان ل دەڤەرا شنگالێ و ڤەکرنا سنووری دگەل سوریا.
١١. چەکدارێن پارتیا ئۆجەلانی دەڤەرا شنگال کرینە جهێ بازرگانیا مادەیێن بێهۆشکار و رەڤاندنا چەکێ قەدەغەکری دگەل سوریا و کۆلانا کون و کارێزین بن عەرد ل دەشت و چیایێن شنگال ب مەرەما خرابکاریێ
١١. مایتێکرنا چەکدارێن P.K.K دناڤ کەمپان دا و تێکدانا رەوشا خەلکێ سڤیل یێ شنگالێ و سۆتاندنا ب سەدان خیڤەتێن ئاوارەیان، پێخەمەت تێکدانا رەوشا دەڤەرێ و دروستکرنا ئالۆزیان ل کوردستانێ.
ئەرێ پشتی ئەڤان راستیا هەمووان نوی سەرۆکێ P.K.K یێ زیندانی کری خۆ کریە خودانێ ئێزدیان ل شنگالێ و دلێ وی مایە ب خەلکێ شنگالێ ڤە و ڤیایە ئەوان ژ چی ب پارێزیت و بۆچی د ئەڤێ قوناغا هەستیار دا، ب تایبەت پشتی کو هێزێن ئەمریکا و هەڤپەیمانا ژ عیراقێ دەرکەڤتین و هاتینە ڤەکێشان، ئەڤ داخویانیە هاتە دان و داخوازا مانا چەکدارێن پارتیا خۆ کر ژ بۆ پاراستنا خەلکێ ئێزدی ل شنگالێ یان ژی تێکدانا رەوشا کوردستانێ ئارمانجا وی یە و چاڤێ وان ب ئارامییا ئەڤی پارچا ئازاد رانابت.
ل داویێ فەرە هەر کەسەک قەوارێ خۆ یێ دروست بزانت و سیاسەتێ ژی بنەمایێن خۆ یێن تایبەت هەنە و شنگالێ ژی خودانێ خۆ هەیە و جڤاکێ ئێزدی ل ژێر چەترا پارتی دیموکراتی کوردستان و دادپەروەری و حیکمەتا جەنابێ سەرۆك بارزانی و سەرکردایەتیا پارتی دیموکراتی کوردستان و حکومەتا کوردستانێ یا پاراستینە و هەر دێ یا پاراستی بت و باشترە بۆ سەرۆکێ P.K.K خەما هەر بۆستەکێ ژ ئاخا باکورێ کوردستانێ بخۆت و شنگالێ ژی بۆ شنگالیا و کوردستانیا ب جی بهێلت و سنوورەکی بۆ مایتێکرنا چەکدارێن خۆ دانیت.
دهۆک ٣ی چریا ئێکێ ٢٠٢٦.
تُتاح هذه الصورة أيضا في: کوردی