تۆرا لالش رەمەزان دەشتمری/ زاخۆ
ده‌مێ شۆره‌شا ئه‌یلولا مه‌زن ب سه‌ركردایه‌تییا بابێ ڕۆحی و نه‌ته‌وه‌ییێ ملله‌تێ كورد بارزانیێ نه‌مر دگه‌ل حكومه‌تا عیراقێ یا ئه‌وی سه‌رده‌می ده‌ستپێكری، حكومه‌تا عیراقێ نه‌ڤییا دانوستاندنێ و ڕێككه‌فتنێ دگه‌ل سه‌ركردایه‌تییا شۆره‌شێ بكه‌ت، له‌وما نه‌چاربوو په‌نا بۆ ده‌وله‌تێن هه‌ڤسنوور برن و داخواز ژێ كرن ب هێزا له‌شكه‌ری هاریكاریا حكومه‌تا عیراقێ بكه‌ن.
ئه‌وژی ئێك ژ ئه‌وان ده‌وله‌تێن هاریكاری ژێ هاتییه كرن ده‌وله‌تا سوریێ بوو كو ل ڕۆژا 10/7/1963ـێ، فه‌وجه‌كا ئه‌سكه‌ری ژ وه‌لاتێ سوریا ب رێكا ده‌راڤێ پێشابیر ل رووبارێ دیجله ده‌ربازی گوندێ پێشابیرێ بوو، ئه‌ڤێ فه‌وجا ئه‌سكه‌ری و دگه‌ل ئه‌سكه‌رێ عیراقێ و دگه‌ل هێزێن جاشێن خوه‌فرۆش ژ سێ ئالیانڤه هێرشی ده‌ڤه‌را زاخۆ كرن.
ئه‌وژی هێزه‌كا مه‌زن یا له‌شكه‌رێ عیراقێ ژ ناحیا ئاسیهێ بۆ گوندێن كولێ و قادیا و خه‌ربه‌نیرێ چوون.
هێزه‌كا دیتر یا ئه‌سكه‌رێ حكومه‌تا عیراقێ و دگه‌ل هێزێن جاشان ل ده‌راڤێ گوندێ به‌غلویچێ ده‌ربازی ڕووبارێ ئاڤا دیجله‌یی هاتن و بۆ ئه‌وان گوندێن چه‌مزانی و باجدێ و په‌راڤێ هاتن.
هێزا سێیێ فه‌وجه‌كا ئه‌سكه‌رێ سووری و دگه‌ل فه‌وجه‌كا ئه‌سكه‌رێ حكومه‌تا عیراقێ ژ گوندێ پێشابیرێ و دێره‌بوونێ بۆ ده‌ڤه‌را گوندێن هێتییان و تیانێ و شیناڤا هاتن، ل ئه‌وی ده‌می قولا پێشمه‌رگه‌هی یا شه‌هید هاشم مێرزووی و قولا محمود قوتكێ و قولا مه‌حمودێ حه‌مرێ و قولا فه‌تاح گویێ و قولا نایف په‌راڤی ل ده‌ڤه‌را گوندێ په‌راڤێ به‌رسینگا هێرشا ئه‌سكه‌ری و جاشان گرتن.
هه‌لبه‌ت ل ئه‌وی ده‌می چه‌كێ بڕنۆ د ده‌ستێ پێشمه‌رگه‌هی دا هه‌بوو، به‌لێ هێزا ئه‌سكه‌رێ حكومه‌تا عیراقێ ب تۆپ و تانك و فرۆكه‌یان هێرشی ده‌ڤه‌رێ كرن، ئه‌ڤی شه‌ری بۆ ماوێ ڕۆژه‌كێ ڤه‌كێشا و پشتی به‌رخوه‌دانه‌كا ژ شه‌رێ مان و نه‌مانێ هێزا حكومه‌تا ئیراقێ و دگه‌ل هێزێن جاشان ژ سێ لایانڤه هێرشی چه‌په‌رێن پێشمه‌رگه‌هی كرن و ئاگر به‌ردانه ده‌ڤه‌رێ و ده‌بابه ل دۆر هێزێن پێشمه‌رگه‌هی زڤرین كو مه‌ره‌ما وان ژناڤبرن و دوورپێچكرنا پێشمه‌رگه‌هێ قه‌هره‌مان بوو. له‌وما ب مخابینڤه پێشمه‌رگه نه‌چاربوو خوه ژ چیایێ بێخێرێ ڤه‌كێشت، به‌لێ ب مخابینڤه د ئه‌ڤی شه‌رێ به‌رخوه‌دانێ دا سنگ و سنگ دا ئه‌وێ ل رۆژا 11/7/1963ێ ل گوندێ به‌راڤێ پێنچ پێشمه‌رگه‌هێن قه‌هره‌مان ژ قولا مه‌حموودێ حه‌مرێ هه‌ر ئێك ژ (حه‌مید سه‌عید مابین ژ گوندێ كێله‌سپییا هه‌وێرییان، مشكۆ خه‌له‌ف عه‌بدی ژ گوندێ كێله‌سپییا هه‌وێرییان، عجێل عه‌مه‌ر خه‌له‌ف ژ گوندێ كێله‌سپییا هه‌وێرییان خشۆ خالد نه‌مر ژ گوندێ كه‌روینی یێ هه‌وێرییان، فندی سیسو حه‌یده‌ر ژ گوندێ كێله‌سپییا هه‌وێرییان) شه‌هیدبوون.
هه‌روه‌سا دو پێشمه‌رگه‌هێن دیتر ب ناڤێ (سه‌بری ئیسماعیل) ژ گوندێ كێله‌سپییا هه‌وێرییان و چه‌قل عیسا هه‌وێری ئه‌وژی ژ هه‌مان گوندی بوو، د ئه‌زی شه‌ری دا بریندار بوون.
هه‌روه‌سا ئه‌سكه‌رێ حكومه‌تا عیراقێ دگه‌ل هێزێن جاشان پتر ژ چل هه‌زاران سه‌رێن په‌زی و بزنان و چێل و ده‌واران ژ ئه‌وان گوندێن ده‌شتا سلێڤانه‌ییا و ژ ئه‌وان گوندێن به‌ر ب ده‌ڤه‌را زێبارییان دكه‌ڤن وه‌ك ده‌ستكه‌ڤت ب خۆ برن.
به‌لێ ئیرادا ملله‌تێ كورد نه‌هاته شكاندن و مۆرالا پێشمه‌رگه‌هی و و خه‌لكێ ده‌ڤه‌رێ مومكمتر لێهاتن و ب هه‌سته‌كی كورد په‌روه‌ری و نشتیمان په‌روه‌ری و شۆره‌شا ئه‌یلولا مه‌زن ب سه‌ركردایه‌تییا مه‌لا مسته‌فا بارزانی پێشڤه‌چۆن و گه‌شتربوو.
هه‌روه‌سا خه‌لكێ ئه‌وێ ده‌ڤه‌رێ ژی زه‌ند و باسكێن خوه هلدانه‌ڤه و گوندێن خۆ ئاڤه‌دانكرن و ده‌ست ب ژین و ژیاره‌كا دیتر كرن.
هه‌زار سلاڤ بۆ خۆڕاگرییا ملله‌تێ كورد و سه‌رفه‌رازی و سه‌ربلندی و بۆ پێشمه‌رگه‌هێن قه‌هره‌مان و نه‌مری و سه‌روه‌ری بۆ شه‌هیدێن بزاڤا ئازادیخوازا ملله‌تێ كورد و سه‌ر كاروانیێ نه‌مر بارزانیێ نه‌مر و كاك ئه‌دریسێ هه‌رده‌م ساخ بن.
تُتاح هذه الصورة أيضا في: کوردی