گەنجێن ئاوارێن شنگالێ ل كەمپان دبێكارن
تۆرا لالش یا راگەهاندنێ
ل كەمپێن ئاوارێن شنگالێ ل سنوورێ پارێزگەها دهۆكێ،ژبەرنەبوونا دەلیڤێن كاری و بێكاریێ گەنج بێزاربووینە و دەمێ خۆ دناڤ كافی و چایخانان دا دبۆرینن و فێری كێشانا نەرگیلێ و جگارەكێشانێ بووینە.
(جەمیل ئیسماعیل)گەنجەكی ئاوارەیێ شنگالێ یە ل كەمپەكا سنوورێ پارێزگەها دهۆكێ ئاكنجی یە بۆ رۆژناما دەنگێ لالش دبێژت:پشتی ئاوارەبوونا مە بۆ ناڤ كەمپان و دەربازبوونا نێزیكی چار سالا لسەر ژیانا مە یا دناڤ كەمپان دا،نهۆ گەنج دژیانەكا پر ب زەحمەت و نە ئارامیەكا دەروونی دا دژین و ژبەر نەبوونا دەلیڤێن كاری وەسا ل ژیانا گەنجان هاتیە كو دەمێ خۆ بتنێ دناڤ كافیتریا و چایخانا دا دكن دبۆرینن و پتریا دەمێ وان ب تشتێن نە باشڤە دچت،ڤێ چەندێ كارتێكرنەكا نەرێنی لسەر پاشەرۆژا گەنجان كریە و بوویە ئەگەرێ وێ یەكێ فێری گەلەك كریارێن نەباش ببن مینا كێشانا نەرگیلێ و جگارێ كو وەكو دیار كێشانا نەرگیلێ بوویە دیاردەك ل ناڤ جڤاكێ ئێزدیان دا ب گشتی و دناڤ تەخا گەنجێن ل كەمپان دا دژین ب تایبەتی،بێگۆمان ڤێ یەكێ ژی كارتێكرنەك لسەر ژیانا وان یا هەی ژئالیێ ساخلەمیێ ڤە كو ژیانا وان تا رادەیەكی دئێختە دمەترسیێ دا.
هەروەسا(سەلاح عەلی)گەنجەكی دی یێ ئاوارەیێ شنگالێ یە بۆ دەنگێ لالش گۆت:ئەم ژ ژیانا دناڤ كەمپێ گەلەك دبێزارن و رەوشا مە ژی نەهندە یا باشە،ژبەركو هێدی هێدی خزمەتكاری بەرەف نەمانێ ڤە دچن،زێدەباری چ تشت نینە ئەم وەكو گەنج بۆ خۆ بكن دا ئەم بكاربن داهاتەكی ژێ پەیداكن و مژوولیا مە ژی بتنێ ب قوتابخانێ و خووندنا مە ڤەیە كو پشتی بێنڤەدانا قوتابخانێ قوتابی هەموو دبێكارن،ب راستی ژی ژئالیێ ماددی ڤە دهەژارن و ب ئەگەرا نەبوونا كارەكی دەمێ وان ب هەروە دچت كو ئەڤ گەنج هەموو پێتڤی كارینە دا بۆ خۆ بكن چنكو ئەو قوتابی نە و پێتڤی ب هاریكاریێ نە دا پێتڤیێن قوتابخانێ بۆ خۆ بكرن،لێ بەداخەوە نە مووچە هەیە و نەژی كارەك هەیە بۆ خۆ بكن، كو ب ئەگەرا ڤێ یەكێ ژیان دناڤ كەمپان دا گەلەك یا ب زەحمەتە لێ هەتا نهۆ ژی چ تشت وەكو پێتڤی بۆ ڤان گەنجان نەهاتیە كرن،ئەڤجا داخوازا مە ئەوە پتر دەلیڤێن كاری بۆ گەنجان ل كەمپان دا بێنە دابینكرن.
تُتاح هذه الصورة أيضا في: کوردی