یاریزانەكا ئێزدی:چەندین ناسناڤ مە ب دەست خۆ ڤە ئیناینە و پشتەڤانی ل مە نەهاتیە كرن
تۆرا لالش یا راگەهاندنێ
كچەكا یاریزانا تیما كچێن شنگالێ یا تۆپكانێ ئاماژێ ب وێ چەندێ ددەت كو هەتا نهۆ تیما وان پشكداری دچەندین خۆلێن تۆپكانێ دا كریە و ناسناڤ ب دەست خۆڤە ئیناینە،لێ وەكو پێتڤی پشتەڤانی ل مە نەهاتیە كرن.
(هەیڤا قاسم)ئێك ژ یاریزانێن تیما كچێن شنگالێ یا تۆپكانێ یە بۆ رۆژناما دەنگێ لالش گۆت:هەر ژ زارۆكینیا خۆ دا من حەزا یاریكرنا تۆپكانێ هەبوو و بەردەوام راهێنان دگەل هەڤالێن خۆ دكرن و رۆژ بۆ رۆژێ ئاستێ من باشتر لێهات،ئەڤە ماوێ پتر ژ سێ سالانە ل كەمپا خانكێ و هندەك هەڤالێن خۆ یێن نوو هەنە ژبلی ژ دەست دانا وان هەڤالێن ژ كچكاتی دا دگەل ئێك دا و دەمێ رێكخراوا تیرۆرستیا داعش دەست بسەر شنگالێ دا گرتی ئەم ئاوارەبووین و ژێك دووركەفتین،نهۆ ئەم هەڤالێن خۆ یێن كەمپێ دگەل ئێك تۆپكانێ دكەین،ئەڤ سێ سالە دگەل تیمەكا تەپاپێ دكەمپا خانكێ دا پشكدار دبم و پشكداریێ دخۆلێن تۆپكانێ یێن یاریزانێن كچ یێن ئاوارێن شنگالێ دناڤ كەمپان دا دكەم،هەروەسا چەند خۆلێن تۆپكانێ هاتنە ڤەكرن و هەتا نهۆ مە چەندین ناسناڤ دەست خۆڤە ئیناینە.
یاریزانێ ئەو چەندە ژی رۆنكر،تیما مە ژ( 30) كچان پێك دئێت و رۆژانە دگەل ئێك راهێنانان دكەین و بەردەوام پشكداریێ دخۆلان دا دكەین،لێ وەكو پێتڤی چ پشتەڤانی بۆ مە نەهاتیەكرن و ئەم دخوازن ژ جیێن شۆلەژێ پتر گرنگی ب تیمێ بێتە دان،داكو ل داهاتی پتر پێشڤەبچین و دەستكەفتان ب دەست خۆڤە بینین.
تُتاح هذه الصورة أيضا في: کوردی