197 سندۆقێن دەنگێن شنگالێ ب دەست نەهاتنە هژمارتن
باسنيوز:
بەرپرسێ نڤیسینگەها هەلبژارتنان ل لقا 17 یا پارتی ل شنگال راگەهاند كو كۆمسیونێ جارەكا دی زۆلم ل خەلكێ شنگالێ كر و 197 سندوقێن ئاوارەیێن شنگالێ ب دەست نەهژمارتن و سۆتن.
جەعفەر حەسەن عەلی، بەرپرسێ نڤیسینگەها هەلبژارتنان ل لقا 17 یا پارتی ل شنگال، تایبەت بۆ (باسنیوز) دیار كر، نها ئەز ل جهێ ڤاڤارتنا دەنگێن هەلبژارتنێن پەرلەمانێ عیراقێ مە كو بریار بوو دەنگێن 197 سندوقێن شنگالێ و یێن ئاوارەیێن ل بن خیڤەتا دژین ب دەست ژلایێ كۆمسیۆنێ ڤە بهێنە هژمارتن، بەلێ كۆمسیونێ جارەكا دی بڕیارەكا ب زۆلم و زۆرداری ل سەر شنگالێ دا و گۆتن ئەم ڤان سندوقان ب دەست ناهژمێرین و هندەك بیانو و هێجەت گرتنە بەر.
جەعفەر ئاماژە دا وێ چەندێ ژی، ئەڤ بریارا كۆمسیۆنێ بۆ مە جهێ سەرسۆرمانێ بوون، چونكو 50 هزار دەنگێن خەلكێ شنگالێ د ڤان سندوقان دا بوون و رەنگە دا پارتی ب رێیا ڤان سندوقان دوو كورسیێن پەرلەمانێ عیراقێ ب دەستخۆڤە ئینابانە و ژ بەر هندێ ژی مە سكالا ل سەر كۆمسیونێ تۆماركرەڤە.
خالد ئەحمەد، بەرپرسێ هەلبژارتنێن پارتی ل لقێ ئێكێ پارتی ل پارێزگەها دهۆكێ بۆ (باسنیوز) دیار كر، ل رۆژا هەلبژارتنێن پەرلەمانێ عیراقێ كۆمسیۆنێ 197 سندوقێن ئاوارەیێن شنگالێ نەهژمارتن و پشتی بریارا دووبارەكرنا دەنگێن پارێزگەها دهۆكێ ب دەست هاتیە دان، 107 سندوقێن سكالا ل سەر هاتیە تۆماركرن دووبارە دەنگێن وان ب دەست هاتنە هژمارتن و چو جوداهی پەیدانەبوون و د گونجای بوون ل گەل دەنگێن ئەلكترۆنی و پاقژترین هەلبژارتن ل دهۆكێ هاتینە كرن.
تُتاح هذه الصورة أيضا في: کوردی