سیروان بارزانی: ههڤپهیمان ژ جاران پتر هاریكارییا پێشمهرگهی دكهن
WAAR-دهۆك:
سهرپهرشتێ بهرهیێ گوێر مهخموور یێ هێزێن پێشمهرگهی راگههاند؛ نها ههڤپهیمان ژ جاران پتر هاریكارییا پێشمهرگهی دكهن و هۆشداری ژی دا كو ب شهڤێ، داعش ل كهركووكێ ژ حكومهتا ئیراقێ بهێزتره.
سیروان بارزانی سهرپهرشتێ بهرهیێ گوێر مهخموور راگههاند؛ چالاكیێن تیرۆرستێن داعشێ ههر ژ مووسل تا مهخموور و كهركووكێ زێدهبووینه و نها ههڤپهیمان بزاڤێ دكهن ب هاریكارییا پێشمهرگهی، ههموو چالاكیێن تیرۆرستان ژناڤببهن، بۆ ڤێ یهكێ ژی هاریكاری و پشتهڤانییا وان ژ جاران زێدهتر لێهاتییه و باشترین نموونه ژی ئۆپهراسیۆنا ههڤپشكا پێشمهرگهی و ههڤپهیمانان بوو ل چیایێ قهرهچوغی كو ئێكهم جاره هێزێن ههڤپهیمان ل بهرهیێن پێشیێ شهڕی دكهن و ههلیكوپتهرێن ئهپاتچی ژی راستهوخوه پشكداری ئۆپهراسیۆنێ ببوون.
سیروان بارزانی هۆشداری ژی دان كو لڤینێن داعشێ ل هند دهڤهرێن كهركووكێ گهلهك زێدهبووینه و ب تایبهت ب شهڤێ، ل هند ناوچهیێن باشۆر و رۆژئاڤایێ كهركووكێ، داعش ژ حكومهتا ئیراقێ گهلهك بهێزتره و كونترۆلا تهمام یا وان دهڤهران د دهستان دایه.
دهربارهیی ههماههنگییا پێشمهرگهی و سوپایێ ئیراقێ سیروان بارزانی گۆت: سوپایێ ئیراقێ دخوازیت پێشمهرگه د بهرههنگاربوونا تیرۆرێ دا هاریكارییا وان بكهت، ژبهركو پێشمهرگهی ناڤ و ناسنامهیا خوه نیشانی ههموو ئالییان دایه و ئهو باش دزانن بێی پێشمهرگه، ژناڤبرنا تیرۆرێ یا ئاسان نینه.
تُتاح هذه الصورة أيضا في: کوردی