بنگەهێ لالش:جینۆسایدا شنگال ئێك ژ زنجیرەیێن پیلانێن هەوالگێری یە ل دژی ئێزدیا و كوردستانێ
_گرتیێن مە شەرەفا مەنە..دیرۆك دلۆڤانیێ ب كەسێ ژ داعشان نابت یێن دەست درێژی كرینە سەر گرتیان
_رەوشا شنگال بڤی شێوەی نامینت،و سەركردایەتیا كوردستانێ دەستبەردار نابت
بیرەوەریا چارێ یا جینۆسایدا شنگال یا دلتەزین دەرباز دبت و هێشتا دۆرێن سێ هەزار ئێزدیان ژ زارۆك و زەلام و ژنان د گرتی و بێ سەروشوونن،و هێشتا پتر ژ (200)هەزار ئێزدی دكەمپان دا دژین و ئاوارەنە،سەرباری ب دەهان هەزار كەسێن دی یێن كۆچكرینە ئەورۆپا و وەلاتێن دیتر،ئەڤە هەموو ژبەر هێرشا هۆڤێن داعشێ بۆ شنگال و دەست بسەر داگرتنا شنگال ب شێوەیەكی درندە و هۆڤانە وەك كارێن درندانە یێن ل چەرخێن بۆری دا هاتینە كرن.
ئەگەر هەوێن قركرنێ یێن ل بەرێ تووش بووینێ ژبەر ئایینی بن،ئەگەرێن نەدیار ل پشت ڤێ كارەساتا داویێ نە،ل پێشیێ هێرشكرنا سەر هەبوونا ئێزدیا ژبال گرۆپێن ئیسلامی یێن رادیكال یێن توندرەو ڤە یێن كوشتن و سەرژێكرن و كەنیزێدكەن،دیسان كۆنترۆلكرنا پێگەهێ شنگال یێ ستراتیژی ب پشتەڤانیا هەوالگێریا هەرێمی،كو ئەڤ روودانێن ڤێ داویێ سەلماندن پیلانەكا هەوالگیریانە یا هەرێمێ دڤیا چەند ئارمانجان بدەست ڤە بینت،ژوانا كێمكرنا رێژا ئاكنجیێن ئێزدی و گرتنا ئالیێ رۆژائاڤایێ باشوورێ هەرێما كوردستانێ،هەموو دزانن كو دەڤەرێن ئێزدیان پشكەكا دیرۆكی نە و ژ كوردستانا دەیك نائێنە ڤەقەتاندن،پاشی كوردستان یا ئارمانج كری بوو پشتی ئێزدیێن بێ گونەه.
ئەو جوگرافیەتا كوردێن ئێزدی تێدا دژین وەكر ئەم باجەكا مەزن د درێژاهیا چەرخێن بۆری دا بدەین،بەلێ خەلكێ شنگال ئەڤ هەموو بارێ گران هەلگرت،بمخابنی ڤە ل دەمێ رزگاركرنا شنگال ژ دەستێ گرۆپێ داعش لسەر دەستێ هێزێن پێشمەرگەیێ قارەمان و ب پشتەڤانیا ئاسمانی یا فرۆكێن هەڤپەیمانیا نێڤ دەولەتی،پیلانێن هەوالگێری یێن هەرێمێ ئەو نەدخوازت،پاشی شنگال بوو گۆرەپانا بەرهەنگاربوون و هەڤركیێ لسەر دەستەلاتێ دناڤبەرا پرانیا هێز و گرۆپێن هەرێمی دا،ئەوێن كو نە ژبۆ چاڤێن رەشێن خەلكێ شنگال و خزمەتكرنا وێ هاتینە،بەلێ تنێ ژبۆ پێگەهێ وێ یێ جوگرافی هاتینە.
ب داخەکا مەزن ڤە پیلانا خیانەتکاریا ١٦ی ئۆکتۆبەرێ هێلا شنگال ژی بکەڤە بەر بایێ فرۆتنا کەرکووکێ و دیسان دەستێ داگیرکەرا گەهشتە ئاخا شنگال، سەر هەموویێ را دبێژین،رەوش ل شنگال وەسان و وەك خۆ نامینت،چنكو سەركردایەتیا سیاسی یا كوردستانێ گرنگیەكا زۆر ددەتە شنگال و سەر هەر كاودانەكی را دەستان ژێ بەرنادەت،و سەرۆك مەسعود بارزانی گرنگیەكا تایبەت ددەتە شنگال و خەلكێ وێ،هەروەسا مە دۆستێن ئەورۆپا و ئەمریكا هەنە ئەو باش ئاگەهدارن لسەر رەوشێ، وئەم دبینن پرۆژێن ئاڤەدانیێ و سەقامگێریێ بۆ شنگال هەنە،بەلێ ئەڤ چەند گرێدایە لسەر پێشهات و رێككەفتنێن دناڤبەرا هەولێر و بەغدا دا دئێنە كرن، سەرەرای هندێ چقاس ل بەندا وێ چەندێ نە كو رەوشا ل بەغدا دێ بەرەف كۆڤە چت.
ل سەر مە ئێزدیان پێویستە هەدارێ بكێشین و خودان ئیرادەیەكا بهێز تر بین،و شاشیان دووبارە نەكەینە ڤە،و ب بێهن فرەهی پێشدا بچن،و باش بزانن هندەك هەنە پلانان بۆ بدەست ڤە ئینانا ئارمانجێن خۆ لسەر كیستێ مە و برینێن خەلكێ مە ددانێن،ب بەلگەڤە پرسا سۆتنا دەنگێن ب هەزاران دەنگدەرێن خەلكێ مە ل كەمپێن ئاوارەبوونێ دا وەك جینۆسایدەكا هەلبژارتنان بوو هات پشتی جینۆسایدا ئەردی و مرۆڤی،ئەو ژی ژبۆ كێمكرنا پێگەها پارتی دیموكراتی كوردستان بوویە كو دەڤەرێن ئێزدیان ژ گرنگترین پێگەهێ پارتی نە.
و بابەتێ گرتیێن ئێزدی نائێتە ژبیركرن،و تەكەز دكەین كو لسەر جڤاكێ ئێزدی ب چینێن خۆ یێن جوداڤە رێزێ لێ بگرن،و ئەو شەرەفا مەنە و شانازیێ پێ دبەین،و دووپات دكەین كو دیرۆك دلۆڤانیێ ب كەسێ نابت یێن دەست درێژی كرینە سەر،ژبەركو ئەڤ كارێن هۆڤانە و درندانە دقانوونا جیهانا سەردەم دا نەماینە،بەلێ ئەو ژ ماوەیەكی بۆ دەمەكی دی ل نك گەل و چینێن جودا دیار دبنە ڤە.
ل داویێ منەتکارێ پوتەدان و خوەدی دەرکەفتنا خەلك و حکومەتا کوردستانێ و ئیدارا پارێزگەها دهۆکێ نە ،ئەوێن کو ئەڤ چار سالە بارێ گرانێ خزمەتکرنا خەلکێ لێ قەومیایی هلگرتی.
سلاڤ بۆ جانگۆریێن كارەساتا شنگال، و ڤەگەریانا بلەز بۆ گرتییان
سلاڤ بۆ جانگۆریێن پێشمەرگەی
سەرشۆری بۆ داعش و هەر ئێكی پشتگیری كری
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
2تەباخا 2018ێ
تُتاح هذه الصورة أيضا في: کوردی