رێڤەبەرێ پەروەردا شنگال:حەشدا شەعبی و سوپایێ عێراقێ رێگرن ل هەمبەر ڤەكرنا پۆلا دوازدێ ئامادەیی
تۆرا لالش یا راگەهاندنێ/لەیت حسێن
ژمارەكا زۆرا قوتابیێن ئاوارێن ئێزدی یێن خووندنا كوردی ڤەگەریاینە دەڤەرێن خۆ ل شنگالێ،ژبەر نەبوونا پۆلا دوازدێ ئامادەیی نكارن بەردەوامیێ بدەنە خووندنا خۆ،رێڤەبەرێ پەروەردا شنگال ژی ئاشكەرا دكت كو حەشدا شەعبی و سوپایێ عێراقێ رێگرن و ئەگەر رەوش بڤی شێوەی بت ئەڤ پۆل نائێتە ڤەكرن.
(عەیشان حەیدەر) قوتابیەكا پۆلا دوازدێ ئامادەیی ژ شنگال دیاركر،رەوشا قوتابخانێ ب گشتی ل شنگال یا باش نینە و كادرێن وانەگۆتنێ نە ل ئاستێ پێتڤی یە و پەرتۆك دكێمن،سەرەرای ژمارەكا مەزن یا قوتابیان ل سەنتەرێ شنگال و گوند و كۆمەلگەهێن ل دەوروبەر هەنە لێ هەتا نهۆ دیارنینە پۆلا دوازدێ دێ بۆ مە ڤەبت یان نە، دخوازین پەروەردا و جیێن شۆلەژێ چارەیەكێ ل كێشا قوتابیان بكن.
هەروەسا قوتابیێ پۆلا دوازدێ ئامادەیی(سەرهاد تەمر)دیاركر،پرۆسا خووندنێ ل شنگال ل ئاستێ پێتڤی نینە و حكومەتا ناڤەندی و ئالیێن نهۆ خۆ ل شنگال دكەنە بەرپرس هیچ هاریكاریەكێ بۆ مە ناكن،داخوازا مە ژ حكومەتا هەرێما كوردستانێ و پەروەردێ ئەوە پۆلا دوازدێ یا خووندنا كوردی بۆ مە ل شنگال ڤەكن دا بكارن بەردەوامیێ ب خووندنا خۆ بدەین.
لدۆر كێشا قوتابیان رێڤەبەرێ پەروەردا شنگال یا خووندنا كوردی(حسێن خدر)ئاشكەراكر،ئەڤە نێزیكی سالەكێ یە پرۆسا خووندنا كوردی ل شنگال باش برێڤە ناچت ژبەر چۆنا حەشدا شەعبی و سوپایێ عێراقێ، ل سالا بۆری یا خووندنێ مە چەند هەول دان بكارن پەرتۆك و پێتڤیێن دی یێن قوتابخانێ بگەهیننە دەڤەرا شنگال لێ ژبەر نەبوونا ئێمناهیێ نەگەهشتن،بۆ ئیسالە ژی مە هەول داینە و ب فەرمی داخواز ژ(UNICEF)كریە بەری هەیڤا(10)پەرتۆكان بگەهیننە شنگال،ئەگەر رەوش بڤی شێوەی بت پۆلا دوازدێ ل وێدەرێ ڤەنابت ژبەركو حەشدا شەعبی و هێزێن دی رێگریێ دكن ل هەمبەر ڤێ چەندێ و هەر جارا رێیا سحێلە هاتە ڤەكرن و ئێمناهی هات دابینكرن دێ چینە شنگال ڤە و پۆلا دوازدێ بۆ قوتابیان ڤەكەین.
تُتاح هذه الصورة أيضا في: کوردی