سه‌رۆك بارزانی: داستانا پردێ سه‌ركه‌فتنا ئازادیخوازا بوو لسه‌ر داگیركا‌را
WAAR-دهۆك:
سه‌رۆك مه‌سعوود بارزانی راگه‌هاند؛ داستانا پردێ وه‌رچه‌رخانه‌كا دیرۆكی بوو و سه‌ركه‌فتنا ئازادیخوازا بوو ل سه‌ر داگیركا‌ر و پیلانگێرێن ناڤخوه و ده‌ره‌كی.
ل گۆره‌یی مالپه‌رێ فه‌رمی یێ سه‌رۆك بارزانی، ئه‌ڤرۆ ل پیرمام سه‌رۆك مه‌سعوود بارزانی، پێشوازی ل نڤیسه‌ر و ره‌وشه‌نبیرێ مه‌زن یێ گه‌لێ كورد، جان دۆستی كر و بارزانی، رۆلێ جان دۆستی د بوارێ فه‌رهه‌نگێ دا بلند نرخاند و دیار كر، دوژمنان هه‌موو شیانێن خوه بۆ ژناڤبرنا گه‌لێ كوردستانێ ته‌رخان كرن، لێ شكه‌ستن، نها ژی شه‌رێ شكاندنا ئیراده و باوه‌رییا گه‌لێ مه دكه‌ن و ب مخابنی ڤه، هند ب ناڤ ره‌وشه‌نبیر و ئالیێن سیاسی یێن هه‌رێمێ ژی، بووینه پشكه‌ك ژ وێ پلانا دوژمنان.
سه‌رۆك بارزانی به‌حس ل رێفراندۆم و خیانه‌تا شازده‌ی ئۆكتۆبه‌رێ و پاشان داستانێن پردێ و سه‌حێلا ژی كر و گۆت: رێفراندۆم سه‌ركه‌فتنا ئیراده‌یا گه‌لێ كوردستانێ و یه‌كخستنا ئیراده‌یا ئازادیخوازییا كوردستانییان بوو ل سه‌رانسه‌ری جیهانێ، داستانێن پردێ و سه‌حێلا ژی، وه‌رچه‌رخانه‌كا دیرۆكی بوون و سه‌ركه‌فتنا ئازادیخوازا بوو ل سه‌ر داگیركا‌ر و پیلانگێرێن ناڤخوه و ده‌ره‌كی.
ل داویێ ژی سه‌رۆك بارزانی داخواز كر، نڤیسه‌ر و ره‌وشه‌نبیرێن كوردستانی، رۆلێ خوه ببینن و رێیا ره‌وشه‌نبیرێن نشتیمانپه‌روه‌ر بگرن و نه‌هێلن پیلانێن دوژمنان یێن دژی گه‌لێ كوردستانێ سه‌ربكه‌فن و وێ په‌یامێ بده‌نه لاوێن كورد، كو ئارمانجێن مه‌زن هه‌بن و خودان باوه‌ری بن ب خوه و پاشه‌رۆژا گه‌لێ خوه.
تُتاح هذه الصورة أيضا في: کوردی