ئێش وئازارێن ئێزدیان د بەردەوامن؟
خالد خدر 
ئەڤە نێزیكی پێنج سالایە بتریا ئێزدیان ئاوارەنە و دوورن ژ ئاخ و جیێن خۆ ب تایبەتی خەلكێ مە یێ شنگالێ،بتریا وان دناڤ كەمپان دا ژیانا خۆ دەربازدكن و هندەك دناڤ كاڤل وخانیێن نەتەمام و چادرێن ژدەرڤەی كەمپان دا دژین و ژمارا وان ب سەدێن هەزارایە ،ب مخابنی ڤە خەلكێ مە ژیانەكا دژوار و بێ سەروبەر دەرباز دكت ،كو ژبلی كێمیا خزمەتگۆزاری و شەپرزەیا دناڤ چادران دا ،ئاریشە و كێشێن ساخلەمی و جڤاكی وهەژاری زێدەبووینە و گەف هەنە لسەر پێكڤەگرێدانا خێزانێ،بتر ژ چار سالان بۆرین ژ جینۆسایدا شنگالێ و ژیانا ئاوارەبوونێ، هێشتا ئێش وئازارێن ئێزدیان دبەردەوامن ، دەڤەرا شنگالێ هاتە ئازادكرن لبن دەستێ چەكدارێن تیرۆرستێن داعش و لسەر دەستێن پێشمەرگەیێن قارەمانێن كوردستانێ و ب هاریكاری و پشتەڤانیا هێزێن هەڤپەیمانا و ب نەخشە و پلانا رێزدار سەرۆك (مەسوود بارزانی ) ، بەلێ جیێ داخێ یە كو خەلكێ شنگالێ نكاری زوو جارەكا دی بزڤرنە جیێن خۆڤە ژبەر چەند ئەگەرێن دیار و بەرچاڤ ژوان ژی دەڤەر ب تەمامی هاتبوو وێرانكرن و خانی ومالێن وەلاتیان هاتبوونە خرابكرن و یێن ماین هاتبوونە مینرێژكرن و ژێرخانەیا دەڤەرێ ب تەمامی هاتبوو ژناڤبرن و هیچ بنەمایەكی ژیانێ لێ نەمابوو،ئەگەرا ژ هەموویێ مەزنتر و بهێزتر ئەو بوو هەبوون و بەربەلاڤبوونا هێزێن چەكدارێن جۆراوجۆرێن نە یاسایی كو بتریا وان ژ دەرڤەی سنوورێ عێراقێ هاتینە دەڤەرا شنگالێ وهەموو لبن سێوانا پارتیا كاركەرێن كوردستانێ وهەموو بوونە هۆكارێ نە ئارامی و نە جێگیربوونا رەوشا دەڤەرا شنگالێ و دەڤەر بخۆ كرنە گۆرەپانە ژبۆ ئەنجام دانا چالاكیێن خۆ یێن نەرەوا و سەدەمێ هەموو بەسن كو ببنە رێگر ژبۆ نەزڤراندنا خەلكێ مەیێ ئێزدی بۆ شنگالێ،ژئالیەكی دی ڤە ژی هەبوونا ڤان هێزێن سەرب پەكەكێ بوویە سەدەم كو بەردەوام حكومەتا توركیا گەفان و هەرەشێ بكەتن كو دێ هێرشەكا لەشكەری بەتە سەر ڤان هێزێن ناڤهاتی ل چیایێ شنگالێ و بۆ چەندین جارا و ل گەلەك هەلكەفتان ولسەر زارێ مەزنە بەرپرسێن توركیا ب تایبەتی سەرۆك كۆمارێ وان (رەجەب تەییب ئەردۆگان ) ؟،ئەڤە ژی رەوشەكا ب مەترسی یە بۆ ئێزیان چنكو ب دەهان هەزارا خەلكێ مە یێ ئێزی نهۆ ل شنگالێ یە و زێدەباری هەبوونا ژمارەكا نەیا كێم یا گەنجان دناڤا ڤان هێزێن هەنێ دا، تشتێ ژ هەموویێ كامباختر و بتر رەوشا شنگالێ تێكدایی و ئالۆزكری و وەسا كری خەلكێ مە نە زڤرتەڤە هێرش و داگیركرنا دەڤەرا شنگالێ ژ ئالیێ چەكدارێن هێزێن حەشدا شەعبی ڤە ل پایزا سالا(2017)ێ ،ئەو بوو دیسا دەڤەرا شنگالێ كەفتە نە ئارامیێ ودام ودەزگایێن فەرمی و شەرعی یێن شنگالێ خۆ ڤەكێشان گەل هێزێن ئەولەهی و لەشكەری یێن سەرب هەرێما كورستانێ ڤە ،ب مخابنی ڤە ژیانا خەلكێ دیسا ئالۆز بوو و نەئارامیەك كەفتە دەڤەرێ ب ئەگەرا هاتنا هێزێن حەشدێ كو بەردەوام خەلكێ مە داخوازا زڤرینا ئیدارە وهێزێن ئەولەهی و پێشمەرگەی دكن بۆ شنگالێ،هندەك ئالیان پرۆپاكندە دكرن كو ئەگەر رێیا( شنگال – دهۆك ) ڤەبت دێ ئاوارە زڤرنە شنگالێ ڤە،بەلێ بەروڤاژی دەركەفت بەلكو خێزان ژ شنگالێ دئێنە هەرێما كوردستانێ و ئەوژی ژبەر رەفتار و زێدەگاڤیێن وان هێز وئالیێن چەكدارێن ل شنگالێ بەرامبەر خەلكێ مە.
تُتاح هذه الصورة أيضا في: کوردی