هندهك لايهن دراڤى ژ وەلاتیێن شنگالێ وەردگرن
ئەڤرۆ نیوز:
قایمقامێ قەزا شنگالێ ئاشکرا کر، ھندەک لایەنێن نەقانوونی ھاتینە د ناڤ شنگالێ دا و وان لایەنان دڤێت قانوونێن خوە ل سەر وەلاتیێن شنگالێ بسەپینن و پاران ژ وەلاتیان وەردگرن و کریارێن کوشتن و رەڤاندنێ ل قەزا شنگالێ ئەنجام ددەن و دبێژیت: ئەڤێ چەندێ ژی ترس و دودلی د ناڤ وەلاتیان دا پەیداکریە و وەلاتی نەوێرن ڤەگەڕنە شنگالێ.
مەحما خەلیل، قایمقامێ قەزا شنگالێ د بەیاننامەکێ دا دیارکریە کو ئەو لایەنێن نەقانوونی ھاتینە د ناڤ شنگالێ دا، رێ نادەندام و دەزگەھێن قانوونی یێن دەولەتێ نادەن کو کارێن خوە ل شنگالێ ئەنجام بدەن و خزمەتا وەلاتیان بکەن و گۆت: “ھەکە رێگری لێ نەھێتە کرن، دێ بیتە ئەگەر کریارێن وان زێدە ببن و ل چەند دەڤەرێن دی یێن عیراقێ ھەمان کریان ئەنجام بدەن”.
ناڤھاتی د وێ بەیاننامێ دا خویا ژی کریە کو جھێ مخابنیێ یە، ھەتا نوکە ئوپەراسیۆنا کونترۆلکرنا ئاخا عیراقێ کو ھێزێن پێشمەرگەی و ھێزێن ئەمنی و حەشدا شەعبی قوربانیێن زۆر بۆ داین، ھەتا کو کونترۆل کری، لێ بۆ خزمەتکرنا شنگالێ و عیراقیان مفا ژێ نەھاتیە وەرگرتن و گۆت: “لەورا ئەرکێ مەیە داخوازێ ژ حوکمەتا عیراقێ بکەین کو گرنگیێ ب رزگارکرنا ئەوا مایی بدەت، بەری ژ دەست بدەت”.
مەحما خەلیل د وێ بەیانناما خوە دا ئاماژە ب وێ چەندێ ژی کریە کو نوکە قەزا شنگالێ بەر ب رەوشەکا خراب دچیت و ھەموو پێکھاتێن دەڤەرێ بێ ئومێد بووینە، ژ ئەگەرێ نەبوونا قانوونێ و ھەیبەتا دەولەتێ و خەمساریا حوکمەتا عیراقێ د ئەنجامدانا کارێن خوە بۆ دابینکرنا ئارامی و ئاشتی و پێکڤەژیان و خوارنێ بۆ وەلاتیان.
تُتاح هذه الصورة أيضا في: کوردی