حکوومەتا هەرێمێ: دڤێت پەکەکە هەرێمێ نەکەتە مەیدانا شەڕان
WAAR-دهۆك:
حکوومەتا هەرێما کوردستانێ بۆمبەبارانکرنا دەڤەرێن هەرێمێ ژ ئالیێ تورکیا ڤە ب جهێ دلگرانیێ ناڤ کر و راگەهاند، پەکەکە ئەگەرە کو سڤیلێن هەرێمێ دبنە قوربانی.
حکوومەتا هەرێما کوردستانێ ئەڤرۆ د راگەهاندنەکێ دا دیار کر، بۆمبەبارانکرنا دەڤەرێن سنۆری یێن هەرێما کوردستانێ ژ ئالیێ تورکیا ڤە، جهێ دلگرانییەکا مەزنە و هەبوونا ب مەبەست یا چەکدارێن پەکەکێ ل گوند و دەڤەرێن سنۆری یێن هەرێمێ، ئەگەرێ بۆمبەبارانانە و هەروەسا ئەگەرە کو ژیانا وەلاتیێن هەرێما کوردستانێ بکەڤیتە د مەترسیێ دا و وەلاتیێن سڤیل ببنە قوربانی.
د راگەهاندنا حکوومەتێ دا هاتییە ژی، هەرێم قەبوول ناکەت ئاخا وێ بۆ گەفکرنێ ل وەلاتێن هەڤسۆ بهێتە بکارئینان و پێدڤییە پەکەکە خوە ژ گوندێن هەرێمێ دوور بکەت و گوندان نەکەتە مەیدانا شەڕ و پێکدادانان.
راگەهاندنا حکوومەتا هەرێمێ د دەمەکی دایە کو رۆژانە تورکیا ب بەهانەیا هەبوونا پەکەکێ دەڤەرێن سنۆری یێن هەرێمێ بۆمبەباران دکەت و وەلاتیێن سڤیل یێن هەرێمێ گەلەک جاران دبنە قوربانی.
تُتاح هذه الصورة أيضا في: کوردی