رێڤەبەرێ پەروەردا شنگال:كێمیا پەرتۆكان بوویە كێشە بۆ قوتابیان
تۆرا لالش:
رێڤەبەرێ پەروەردا شنگال یا زمانێ كوردی دیاركر،كو پرۆسەیا خووندنێ ل شنگال و كەمپێن ئاوارەیان لدووڤ رێنمایێن وەزارەتا ساخلەمیا هەرێما كوردستانێ دەستپێكریە،لێ كێمیا پەرتۆكان و نەبوونا ئۆفیسەكێ ل شنگال كێشەیێن قوتابیان بەرفرەهتر لێكریە.
لدۆر پرۆسا خووندنێ ل ناڤا كەمپا و قەزا شنگال رێڤەبەرێ پەروەردا شنگال یا زمانێ كوردی(مەیسەر حەجی) بۆ رۆژناما دەنگێ لالش راگەهاند،پرۆسەیا خووندنا كوردی ل شنگال و كەمپێن ئاوارەیان لژێر رێنمایێن وەزارەتا ساخلەمیا هەرێما كوردستانێ بەردەوامە،لێ كێماسی ژی هەنە دناڤ قوتابخانان دا،ژبەركو ئیسال ل سەرانسەری هەرێما كوردستانێ پەرتۆك نەهاتبوونە چاپكرن و قوتابخانەیێن پەروەردەیا شنگال پێتڤی ب پەرتۆكانە ژبۆ قوتابیان و رەوشا وان یا دارایی نەیا هاریكارە بۆ چاپكرنا پەرتۆكان،لەوما كێمیا پەرتۆكان بوویە كێشە بۆ پشكەكا قوتابیان.
سەبارەت رەوشا كەرتێ پەروەردێ ل شنگال و كەمپان مەیسەر حەجی دیاركر،ژبەر نەبوونا نوونەریەكا پەروەردا زمانێ كوردی ل شنگال و نەبوونا ئۆفیسەكا وان ل شنگال ئاریشەیێن قوتابیان بەرفرەهتر كرینە،وان ب فەرمی داخواز ژ وەزیرێ پەروەردەیا حكوومەتا هەرێما كوردستانێ كریە بۆ ڤەكرنا بارەگەهەكی بۆ ب رێڤەبرنا كاروبارێن پەروەردێ ل دەڤەرێ،لێ پرسگرێكا هەرە مەزن تا كو نهۆ ل شنگال هەی نەبوونا ئینتەرنێتێ یە.
رێڤەبەرێ پەروەردا شنگال ئەو چەندە ژی ئاشكەراكر،ژ دەستپێكا ئازادبوونا شنگال لسەردەستێَ هێزێن پێشمەرگەی(46) قوتابخانا ل شنگال هاتینە ڤەكرن و هەژمارا قوتابخانێن دناڤ كەمپان دا (43)ێ نە و هەژمارا قوتابیێن ل ڤان قوتابخانا دخوونن (29)هەزارن ژبلی یێن سەنتەرێ شنگال،لێ دسەر ڤێ چەندێ دا قوتابخانە دكێمن.
مەیسەر حەجی گۆتژی گەلەك مامۆستایێن شنگال سەر ب پەروەردێن دی یێن دهۆكێ ڤەنە و دچنە دەوامێ،ئەڤ چەندە ئێك ژ ئەگەرایە كو ب نەچاری ڤە ئەم (945)وانەبێژان وەربگرین ل سنوورێ پەروەردا شنگال ب پشتەڤانیا وەزارەتا پەروەردەیا حكوومەتا هەرێما كوردستانێ،ئەو وانەبێژ دەرچۆیێن كولیژ و پەیمانگەهانە.
تُتاح هذه الصورة أيضا في: کوردی