بریكارێ وەزیرێ رەوشەنبیری و لاوان:
دیرۆكا بنگەهێ لالش دووپات دكت كەتوار و ژیان دۆستە و خەونێن مەزن هەینە دخوازت بجهبینت
تۆرا لالش:
بریكارێ وەزیرێ رەوشەنبیری ولاوان ل حكوومەتا هەرێما كوردستانێ راگەهاند،پیرۆزباهی و رێز و حورمەت بۆ وێ مێژوویا پر بەرهەمێ بنگەهێ لالش و كەد وخەباتا وی و ئەڤ دیرۆكا دوور ودرێژ نیشانا وێ یەكێ یە كو خودان دەستكەفت وبەرهەم و رەوانگەهەكا باشە بۆ بوارێ ئاینی و ژیانێ ب یەكڤە و بەهوەری ب وێ یەكێ هەبوو،كو ژ روویێ كلتۆری ڤە پێتڤیە ئاین و تێگەهشتنێن كلتۆریێن ئێزدیان ببنە واقع و ل نێڤ كۆمەلگەها كوردی دا جیێ خۆ قایم بكت،لەوما دیرۆكا ڤی بنگەهی دووپات دكت كو هەم گرنگە هەم كەتوار و ژیان دۆستە و خەونێن مەزن هەینە دخوازت بجه بینت.
د.سالار عوسمان بریكارێ وەزیرێ رەوشەنبیری راگەهاندژی كو هەبوون وگرنگیا بنگەهێ لالش ل وێ یەكێ دایە كو ل كۆمەلگەهەكا زۆرینە موسلمانن و جیاوازیەكا ئاینی یا دیرۆكی و كەتواری و جڤاكی هەیە،دخوازت ڤێ جیاوازیێ بكەتە كلتۆر وبەرهەم و چالاكی و جۆرەك ل پەیاما ئاشتیێ و دیالۆكێ دگەل ئاینێن دن دورست بكت،و مەهەموویان ڤەگەرینت بۆ مێژوو و رەسەنایەتیا ئاینەكی ،كو پێتڤیە ئەم هەموو بچنە نێڤ كوراتیا وی و ل مێژوویێ وێ تێ بگەهن كو ئەڤ ئایین چاوا ل ڤان هەموو ویستگەهان را گەهشتیە ڤر،ئاماژە دا بەرهەمێن چاپەمەنیێن ئەكادمیێن بنگەهێ لالش و بەردەوامبوونا وان ب گرنگ وەسف كر ژبەركو جۆرەكە ژ دكیۆمێنتكرنێ ژ ئالیێ مێژوویی ڤە،و دیرۆكا بنگەهێ لالش ژی بتر ل ڤان دەقان دە دئێتە ناسكرن.
سەبارەت جینۆسایدا ل سالا(2014)ێ بسەرێ ئێزدیان هاتی و رۆلێ نڤیسەر و هۆنەرمەند و رەوشەنبیرێن كوردستانێ و وەزارەتا رەوشەنبیری ل هەمبەر ڤی كەیسی،بریكارێ وەزیرێ رەوشەنبیری دووپاتكر كو ئەم هەموو كەمتر خەمن هەمبەر ڤی كەیسی و ئازارێن گەلێ كورد ب گشتی، مێژوویا تراژیدیا كوردی ل بوارێ كلتۆری ب تایبەت دبوارێ هۆنەردا جیێ وێ نەهاتیە ڤەكرن،پێتڤیە دانێ ب وێ كەمترخەمیێ بكەین و پێكڤە كار بكن،چنكو مخابن نەبوونا روحیەتا ب هەڤرا كاركرنێ ل كوردستانێ وەك پێتڤی نینە ئەگەر نا ئەو تراژیدیا و ستەم وشەرێ ل درێژاهیا دیرۆكێ دا بەرامبەر ئێزدیان هاتیە كرن مژارێن جیهانی نە بەری كو كوردی بن و هۆنەر دكارت بكەتە پەیام و ب جیهانێ بناسینت،مە ژی وەكو وەزارەت چەند كاروچالاكیێن مە هەبووینە وەكو دەقێن ئەدەبیات و رۆمان و دكیۆمێنتاری هتد…،لێ ل ئاستێ وێ تراژیدیا مەزن كارێن بچوكن، و مە پرۆژەیەكێ مەزن هەبوو لپێش سەرهەلدانا كۆرۆنا و قەیرانا دارایی كو كاریگەری هەبوو ل جێبەجێكرنا وی پرۆژەی كو وەرگێرانە هژمارەكا پەرتۆكان بۆ زمانێن جیهانی دناڤ وان پەرتۆكان دا مە گرنگیەكا مەزن دابوو وێ مێژوویا تراژیدی و ستەما بەرامبەر ئێزدیان هاتیە كرن،لێ ئەو پرۆژە ناراوەستت و ل بارودۆخەكێ گونجای دا دێ جێبەجێ كەین.
د.سالار عوسمان دیاركرژی حكوومەتا هەرێما كوردستانێ نەرینەكا زەلال دەربارەی ئێزدیان هەیە و ل پشتی راپەرینێ گرنگی ب لێكتێگەهشتنەكا كلتۆریانە و مێژوو و رەسەناتیا كلتۆرێ ئێزدیان دایە،كو ئێزدی یەك ژ سوومبلێن پێكڤەژیانێ یە ل كوردستانێ،لێ ب نەرینا من ژ روویێ پراكتیكی ڤە وەكو پێتڤی گرنگی ب كەیسا ئێزدیان نەهاتە دان پێتڤیە ئەو نەرینا زەلال یا حكوومەتا هەرێما كوردستانێ دەربارەی ئێزدیان و ئەو لێكتێگەهشتنا وێ ل ڤێ كەیسێ و مێژوو وئازار و وجودێ جوگرافی و جڤاكیێ ئێزدیان ببتە بەرهەمێن مەزن وەكو مۆزەخانە وكتێبخانە و فلمێن مەزن و دگەل حكوومەتێ هەڤكاربن بۆ جێبەجێكرنا ڤی بواری، دكتۆری ب پێتڤی زانی كو هەول بەردەوامبن و فشارێ بێخنە سەر حكوومەتا عێراقێ داكو شنگال ببتە پارێزگەهـ و دامودەزگەهـ وناڤەندێن ڤەكۆلینێ یێن مەزن بێنە ڤەكرن و گرنگی ب بوارێ مەعریفی و ناساندنا كلتۆرێ وێ بێتە دان و ل رێیا وێنە و دەنگ وهۆنەر و ئەدەبیات وتێكست ودەقان سەرەنجا دونیایێ رابكێشن بۆ سەر شنگال كەتوار و مێژوویا ئێزدیان،گۆتژی تراژیدیا ئێزدیان هندە یا مەزنە و كتوارەكی روهن و زەلالە وژدانێ مرۆڤاتیێ هەژاند و هەموو دونیا بوونە هەڤسۆز و هەڤخەم،لەوما دڤێت هیچ گهۆرینەكا هۆنەری و كلتۆری تێدا نەئێتە كرن و وەكو خۆ بێتە ڤەگوهاستن ژبەركو واقعەكی تراژیدی یە،هەروەسا هەر بستەك ژمێژوو وجوگرافیا شنگال و ئێزدیخانێ بابەتێ فلم و تەعریف وگرێدانا كوردستانێ ب دونیایێ و راكێشانا دونیایێ بۆ كوردستانێ ل هەمان دەمدا.
ل داویێ د.سالار عوسمان گۆت:شنگال هەتا هەتایێ ئەو پارچەیا ئازیز و پر خەما كوردستانێ یە و ئاینێ ئێزدیان ئاینێ رەسەنێ كوردستانێ یە،مێژوویا مەیە شانازیێ پێ دبەین.
تُتاح هذه الصورة أيضا في: کوردی