شەرع دجڤاتا چیایێ شنگالێ دا
حەیدەر عەرەبۆ یوسڤانی
بێگۆمان شرع دناڤ هەموو مللەت و نەتەوان و هۆزێن دنیایێ دا هەیە ، هەر ئێك ژی ب شێوەیەكی شەرعا خۆ ڤە ددەت و دبتە جیێ باوەریێ دناڤ وان دا ،لێ شەرع دناڤ جڤاكا ئێزدیان دا یا جیاوازە ژ مللەتێن دی یێن جیهانێ،پشتی هاتنا شیخادی بۆ پەرستگەها لالش و پێكئینانا دەستوورێ مالا ئادیا،دادگەهەك دامەزراند ژبۆ چارەسەكرنا كێشێن ئۆلی و جڤاكی و كۆمەلایەتی،و ئێكەمین شرعچی ل سەردەمێ شیخادی ( شێخ هەسەن پیر)بوو ب بابێ بەرەكاتی دهاتە ناسین.
شرعچی دجڤاكا ئێزدیان دا مرۆڤەكە سەرپەرشتیێ لسەر چەندین شیرەتكارا دكە و رەنگە هەژمارا شەرعچیان دوو كەس یان بتر ژی بن و كێشێن ئۆلی و جڤاكی چارەسەربكن،شەرعچی ژ كەڤندا جیێ خۆ دناڤ ئێزدیان دا گرتیە هەر وەكو د سەبەقەكا قەولی دە هاتیە گۆتن:
وان قیل و قال كر
ب شرعا وەسال كر
هەوا ل ئادەم حەلال كر
دیرۆكا شەرعێ ل چیایێ شنگالێ ڤەدگەرتە سەردەمێ میر شەرفەدین بەری (850)سالان، ل دەمێ شەرفەدین هاتیە چیایێ شنگالێ چەندین رێورەسمێن ئۆلی و كۆمەلایەتی ل دەڤەرێ دانان و ئێك ژ وان شەرعان خەلك ب رێكیێن یاسایی و كێشەیێن خۆ چارەسەر بكن ، و ئێكەمێن شەرعچی ژی (ئاڤدەل مەهمەد)بوو كو سەرۆك هۆزێ متربیا بوو دگەل میر شەرفەدین سەرەدانا شنگالێ كربوون،و هەتا نهۆ ڤێ هۆزێ ب تایبەت مالباتا (باپیری) ب وەكالەتا شەرفەدین شەرعچی وەرگرتینە بۆ رێڤەبرنا شەرعێ و د بەردەوامن د كارێ خۆدا،هەركەسەكێ ببتە شەرعچی پێتڤیە كەسەكێ ناڤدار و شەهرەزا و ب ئەدەب و ئەركان و باوەرپێكری بت ل دەستوورێ كۆمەلایەتی و پشت بەستنێ ل ەر دیدەڤان و بەلگەنامان بكت و هیچ بریارەكێ نەدەت بێ شێوراخۆ ب شیرەتكارێ خۆ نەكەت،هەروەسا ل دەمێ شەرعێ ڤەددەت و تایبەت وەختێ سلحێ جل و بەرگێن تایبەت هەنە ئەو ژی (شال و سەرپێچ) تایبەتن ب شەرعچی ڤە،هەتا نهۆ ل چیایێ شنگالێ دا ب هەزاران كێشەیێن جڤاكی و كۆمەلایەتی و ئۆلی و زەڤی و زار و رەز و باغ و تەرش و تەوالی…هتد چارەسەركرینە،هەروەسا گۆتنەكا هەی ڤێ چەندێ د سەلمینت دبێژت:(تلیا شەرعچی بری خوین تێ نایێ) ئانكو كێم و زێدە د پەیڤ و سەلاوەتا شەرعچی دا،مەرەما وان ژ ڤێ شەرعێ بتنێ خزمەتا خەلكێ خۆ بكن بێ بەرامبەر ئەڤ چەندە ژی بتر بوویە جیێ باوەریا خەلكی ژی.
و ئەو بریارێن شەرعچی و شیرەتكارێ خۆ ددەن بریارێن وان دناڤ جڤاكی و بریار ب دەستێن شنگالێ دئێنە پەرژاندن، و پشت بەستنێ پێ دكن ل وان بریاران دئێتەكرن،تێ زانین نهۆ سماییل سالح ئاغا شەرعچیە ل مەزارگەهێ شەرفەدین ل شنگال.
تُتاح هذه الصورة أيضا في: کوردی