پەروەردا هەڤدژ و كەسایەتی
جوان عزەت
مرۆڤ ب سروشتێ خۆ لسەر دوو جۆرێن هزركرنان بریاران ددەت هزرەك هەیە بەرێ مرۆڤی ددەتە عالمەكا خەیبی یان خەیالی و هزرەك دی هەیە مرۆڤی دكێشتە ناڤ ژیوارێ شەهوانیا دونیا و پێكهاتەیێن ژیانێ دا ئەڤە ژ روویێ سروشتی ڤە و ژ روویێ جڤاكی ڤە، كارتێكرنا هەڤدژیا كەسایەتیی پەیرەوێ بۆ چارچۆڤێ دوو راسپاردەیا دكت، راسپاردەیەك جەختێ دكەتە سەر دیتن، خواندن و رەفتارێن مرۆڤی و راسپاردا دی جەختێ لسەر گۆتن و كریارێن كەسایەتیا مرۆڤی دكت، نەخاسمە د جڤاكێن شیرەتكاری دا گەلەك جۆرێن كەسایەتیێ هەنە دناڤبەرا رەفتار و كریارێن وان دا هەڤدژی پەیدا دبت،بۆ نموونە ئەگەر نوخبەیەكێ ژ كەسێن سیاسی یان جڤاكی یان رەوشەنبیری ل روژهەلاتێ ب گشتی هزرتێدا بكەین لسەر ڤێ رێ بەردەوامی دایە سالوخەتێن خۆ یێن كەسایەتی، ئانكو د گۆتنان دا ئالا هەلگرێن پەیامێن راستڤەكرن و هەڤگرتن و هەڤ گونجاندنێ نە، بەلێ د كریاران دا خودان دروشمێن بەرژەوەند و سەردەریێن خۆ یێن كەسوكی و دەرفەتێن دەستڤەئینانا دەستكەفتنا نە.
ئەگەر ئەڤ پیشەیە لدوڤ ئەقلێ پێشكەفتیێ دەولەتا مرۆڤایەتی بچت دڤێت د روویێ خۆ یێ كەسایەتی دا پەنایێ بۆ كار و كاركرنا پێنگاڤێن چێكرنا جڤاكێ مرۆڤینیێ ببەن،چنكو ئەڤا نهۆ من ئیشارەت پێ دا وێرانكرنەكە ژ كوشتنا بنەمایێن كەسایەتی لسەر سروشتێ مرۆڤ و مرۆڤایەتیێ، هەروەها هەلوەشاندنەكە لسەر بیروباوەر و بەهرەیێن ئاگەهی و هشیاریا تاكەكەسی د جڤاكان دا، بۆ بتر رۆنكرنێ دكەڤن دا گەلەك جۆرێن كەسایەتیان ئەڤجار چ بناڤێ بنەمایێ ئاینی یان ژی كۆمەلایەتی یان ژی كا هەر چ ناڤ بت ب تایبەتی ئەو كەسێن خۆ ب ئەرك و پیشەنگێن بنەمایێن سیاسی، دەستهەلاتداری، جڤاكی، ئابووری و… د دیتن، شیان جۆرەكێ زالبوونێ لسەر دروستكرنا كەسایەتیا تاكی ب رێیا دوو دەولەتێن هەڤدژ پەیدا بكن، ئێك دەولەتەك لسەر شەنگستێ دلرەقی، زۆرداری، تەپەسەركرن، ترساندن، زالبوون و راكێشنا ئەقلێ ئینسانی ب رێیا ئیستغلاكرنێ دروستبوو، دەولەتا دوویێ لسەر شەنگستێ هزر و بنەمایێن ئیسلاما سیاسی د روویێ دلۆڤانی و وەكهەڤی و دادپەروەریێ، پرەنسپێن سەرەدەریێ و… چێبوو، ئەگەر دروویێ زانستێ دەروونی دا ئەم خووندنێ بۆ ڤێ تێكستێ بكەین دێ باشتر دیاربت، كو ئەڤێ چەندێ جەوهەرێ تاكەكەسی كرە دوو پارچە، پارچەكا وی كەفتە ل بەر لێدانا هەست، هزر و دەروون و دووربوونیا وی ژ جیهان و هزركرنا خەیالێ و پارچا دی كەفتە دناڤ ژیانا دروهێلێ دەرڤە و ئاستێ تاكەكەسیا وی یا جڤاكبوونێ، ژبەرهندێ سەرەدەریا وی د دونیایا دەرڤە دا جۆرەكێ دووریاتیێ بخۆ ڤەگرت و نافخۆیا وی دا جۆرەكێ مراندنا داهێنان كاریێ.
یا ئاشكەرایە ئەڤ دەستەواژەیێن بڤی رەنگی هەر ژ زارۆكاتیێ تاكی فێردكەن، كو لسەر بنچینەیێ شیرەتكرن و خۆزالبووونا شوناسیێ بەردەوامیێ بدەتە رەفتارێن كەلتۆرێ خۆ یێ جڤاكبوونێ، بەلێ بەروڤاژیا وێ دابرانێ دئخێنە ناڤبەرا هزر و شیانێن دیاركرنا بەهرەیێن وی یێن زارۆكینیێ هەتا دگەهتە قۆناغا گەنجاتیێ، بەلێ پرسیارا سەرەكی یا گرنگ ل ڤێرێ ئەوە مرۆڤ ژ خۆ بكت و بێژت،ئەرێ د پەروەردەیا نوو دا مرۆڤی دێ ئەو كەسایەتی یە هەبت، بكارت سیستەمەكێ ل دەرڤەی هەرەمێ ڤان دەستەواژان دروست كت؟ یان ژی دروویێ خەلكەكی دا دێ هەر لسەر كار و كریار و چالاكێن خۆ یێن نە زەلال و تژی ژ هزرێن ناخەكێ ڤەشارتی یێ بەردەوام بت؟!.
تُتاح هذه الصورة أيضا في: کوردی