پێڤەكرن و سواركرن و نووكرنا پەری و لفێن خاسێن ئێزدیان
ئلیاس نەعمۆ خەتاری
دەستپێكێ دێ رۆنكرنەكێ دەمە شێوێ قوبێ و رامانا ئاڤاكرنا قوبێن باب چاكێن ئێزدیان كا چاوایە و چی یە و بۆچی ب ڤی شێوەی هاتینە ئاڤاكرن،هەكە باش بەرێ خۆ ب دەینە شێوێ قوبێ ئانكو رامانا گەهاندنا رۆناهیا رۆژێ یە بۆ سەر ئەردی، سەرێ قوبێ لفێ یە و ژ هەفت پارچێن قوماشی پێكهاتیە و هەفت رەنگێن رۆژێ یە و پاشی سێ تۆبكێن خرن ئەو ژی رامانا وان ئێك رۆژە و ئێك هەیڤە و ئێك ستێرە،پاشی رۆناهیا رۆژێ دئێتە خوار ل سەر بازنەكی ئانكو ل سەر ئەردی پاشی ل سەر جیەكی كو هەشت گۆشەیە و چار ژێ ئاخ و ئاڤ و بای و ئاگرە و چارێن دی ژی هەر چار كنارێن دنیایێ نە، هەر سال جارەكێ دڤێتن لف و پەرێن خاسا بێنە نووكرن و ببەنە پەرستگەها پیرۆزا لالش و ب ئاڤا كانیا سپی و زمزمێ بێنە مۆركرن،ل هێرە خودان خێر ب كارێ خێرێ رادبن و ژبال خۆ ئێك وی قوماشی دكرت و دروت و ب شێوازەكێ رێك و پێك دئێتە دروتن كو لدووڤ رێنمایێن ئاینی یێن ئێزدیان و د دەتە دەستێ مجێوری.پاشی ژ لالشێ دئێنە ئاڤاهیێن خاسا یان مالا مجێوری و ل رۆژەكا دەست نیشانكری دا كو دبێژنێ رۆژا توافێ ب كەیف وخۆشی و دوعا و درۆزێن ئاینی یێن ئێزدیان دگەل دهۆل و زرنایێ و ئاوازێن شازێ ب رێڤەدچن، ئەوێت سالا بۆری دئێنە ڤەكرن و یێن نوو و مۆركری دئێنە گرێدان و سواركرن،ئەگەر بێین و بەرێ خۆ باش ب دەینێ كا رامانا ڤێ چەندێ چی یە دێ بینین گەلەك ئەگەرێن فەر وێت هەین كو ب ئێزدیاتیێ ڤە دئێنە گرێدان ژوان ژی پاراستنا سومبلێن كەڤنێن ئایینی داكو ژناڤ نەچن،چنكو بلنداهیا قوبێ و با و باران ل وەرزێ زڤستانێ و گەرمێ و تۆز و عەجاج بۆ ماوێ سالەكێ هەلبەت پارچێن قوماشی یێن سەرێ قوبێ ڤە هێدی هێدی دێ كەڤن و بێ سەروبەر بن لەوما سالانە ب رێورەسمێن ئایینی ل توافان دئێنە نووكرن.
بەرێ هەموو قوب ژ گێچێ بوون لەوما دڤیا هەر سال جارەكێ بێنە سپیكرن ئانكو قوب ژ سەری هەتا بنی قالكێ وێ را دكرن و جارەكا دی گوندی و خودان خێر ل هەڤ د جڤیان قوب گێچ دكرن دگۆتنێ سپیكرن، پێڤەكرن و سواركرنا لفێ و قوبێن خاسێن ئێزدیان ئەڤە ئێك ژ داب ونەریتێن ئایینی یێن ئێزدیانە نیشانا رۆژەكا تایبەتە و یە گرێدای یە ب وی باب چاكی ڤە،بۆ نموونە رۆژا قەدەم گوهاستنێ یە یان رۆژا قۆناغا هاتنا وی یە یان رۆژا دانانا نیشانگەهێ یە ل وی جی یان ژی رامانا روودانەكا گرنك یا وان سەردەمان بوویە، لەوما خەلكێ مە ل رۆژا توافێ دكەنە هەلكەفت و سماتێ چێدكەن و خێرێ زاڤ دكن و سەربرا دكەنە خێر و ب خێرا وێ رۆژا پیرۆز و ئەڤێ هەلكەفتێ ل هەڤدوو پیرۆز دكن و قوب و نیشانگەها دناڤا چارچۆڤێ ئێزدیاتیێ دا تواف دكن و شریناهیان بەلاڤ دكن و كەیف و خۆشیێ دناڤ ئێزدیان دا بەلاڤ دبت.
هەتا ل رۆژێن تازیا دڤێت شریناهی بێنە بەلاڤكرن كو دبێژنێ پاشیڤ و ل رۆژێن جەژن و هەلكەفت و توافان شریناهیان ل سەر مێهڤانان دئێنە بەلاڤكرن، ل ئەڤان رۆژان هەر مالەكا ئێزدی دڤێت شریناهی هەبن، هەر ژ كەڤندا قەسپ و هژیر و قەیسی و مێویژ و شلك و دۆشاڤ و شەكرۆك و پەقلاوە و دگەل هەموو جۆرێن چكلێتان و…هتد،ل سەر مێهڤانان دهاتنە بەلاڤكرن و هەتا ئێرۆ رۆژ ژی ئەڤ چەندە یە بەردەوامە ئەڤەژی نیشانا وێ چەندێ یە داكو رۆژێن بێن هەموو خۆشی و رۆژێن شرین و دوور ژنەخۆشیان بن.
پەری سواركرن ئێكە ژ داب و نەریتێن توافێن هندەك ژ باب چاكێن مە ئێزدیان، رێورەسمێن پەری سواركرنێ وەكی مە گۆتی پەری سالانە دئێنە مۆركرن ل لالشا نوورانی و ل رۆژا توافێ پەری دئێتە سواركرن ب رێورەسمێن تایبەت و ب ئامادەبوونا بابێ شێخ یان چەند كەسێن ژ جڤاتا بابێ شێخ و ئەگەر دەلیڤە هەبت دگەل مجێور و قەول بێژ و ریهـ سپیێن جڤاكی ئەو ژی ئامادە دبن،بەری یان پەری؟؟؟ ژ هوندرێ خاسا یان ژمالا مجێوری دئیننە دەر و ل ناڤا خەلكێ دگێرن خەلك لێ زیارەتی دبن و بانگ ل خێرێ دكن و پاشی دزڤرنە ڤە.
ژئالیەكێ دیڤە نیشانا هەرە مەزن دناڤا جڤاكێ ئێزدی دا ل رۆژێن جەژن و هەلكەفت و توافان كەیف و خۆشی یە و دیلانێن مللی ب جلوبەرگێن فلكلۆری دئێنەكرن و داب ونەریتێن كەڤن یێن سەردەمێن بەرێ یێن وەختێ باب و باپیران دئێنە بیرئانین ئەڤە ژی نیشانا پاراستنا فلكلۆرێ رەسەنە و ژ ناڤچۆنێ دئێنە پاراستن و مانا رێورەسم و داب ونەریتێن باب كالێن مە ئێزدیانە.
تُتاح هذه الصورة أيضا في: کوردی