لژنەیا دارایی: تا سەرێ ھەیڤێ بودجا ههرێمی دێ ژ بەغدا گههیت
گاڤ نیوز – 
لژنەیا دارایی ل پەڕلەمانێ ئیراقێ بۆ گاڤ نیوز راگەھاند، تا سەرێ ھەیڤێ پێشبینی دکەین ٢٠٠ ملیار دینار ژ بەغدایێ بۆ ھەرێما کوردستانێ بھێنه هنارتن.
جڤاتا وەزیرێن ئیراقێ بڕیار دایە ھەیڤانە ٢٠٠ ملیار دیناران بۆ ھەرێما کوردستانێ رەوانە بکەت، ژ ھەیڤا ئێک یا ئەڤسالە ژی دھێتە ھەژمارتن، کو د چارچووڤێ بجھـئینانا بودجەیا ئیراقێ یا سالا ٢٠٢١ێ دایە، ھەرێم ژی دێ پابەندی رادهستكرنا داهاتێ ٢٥٠ ھزار بەرمیلێن پەترۆلا رۆژانە و ٥٠% ژ داھاتێ ناڤخۆ بیت، ل هەمبەر ئیراق دێ ١٢.٦٧% ژ بودجەیا ئیراقێ بۆ هەرێمێ رەوانە کەت.
شێروان میرزا، ئەندامێ لژنەیا دارایی ل پەڕلەمانێ ئیراقێ بۆ گاڤ نیوز گۆت: ئەوا حکومەتا ئیراقێ بڕیار ل سەر دایی قانوونی یە و چ کێشە ل سەر رەوانەکرنا ٢٠٠ ملیار دیناران بۆ ھەرێما کوردستانێ نینن.
ھەروەسا دوپاتکر، ئەو پێشبینی دکەن تا سەرێ ھەیڤێ ٢٠٠ ملیار دینار ژ بەغدا بۆ ھەرێمێ بھێن و ب کارەکێ نۆرمال ژى ناڤکر هندەک ئالیێن ئیراقى نەرازى بن، بریار ژ ئالیێ پەڕلەمانى ڤە هاتیە پەسەندکرن و جڤاتا وەزیران ژى ل سەر رازى بوویە.
گۆت ژی، رەوانەکرنا وی پارەیی چ کێشەیێن قانوونی و سیاسی نینن و دوپاتکر، ئەوا حکومەتا ئیراقێ کری ل گۆرهی رێککەفتنان و بێ فشار بوویە.
تُتاح هذه الصورة أيضا في: کوردی